Súkkulaði hafraklattar

Rakst á þessa uppskrift um daginn á síðunni „Money Saving Mom“ og hreinlega varð að prófa. Molarnir voru dásamlega góðir og gott að eiga þá í frystinum og geta gripið sér einn og einn. Þessa bita þarf ekki að baka og því tekur enga stund að útbúa þá!

Súkkulaði haframjölsklattar

  • 1 bolli hnetusmjör
  • ½ bolli hunang
  • ½ bolli kókosolía
  • 2 bollar gróft haframjöl
  • 1 bolli kókosmjöl
  • 1 bolli saxaðar hnetur (hér notaði ég Macadamia og Cashew)
  • 1 bolli suðusúkkulaðidropar
  • 1 tsk vanilludropar

Súkkulaði hafraklattar

  1. Bræðið hnetusmjör, hunang og kókosolíu í potti við lágan/meðalhita þar til vel blandað. Fylgist vel með, hrærið í allan tímann og passið að blandan brenni ekki við, takið af hitanum.
  2. Bætið haframjöli, kókosmjöli, súkkulaðidropum, hnetum og vanilludropum saman við og blandið saman með sleif
  3. Klæðið um 25×25 cm kökuform með bökunarpappír og þjappið blöndunni niður í formið.
  4. Kælið í að minnsta kosti klukkustund og skerið síðan í litla bita.
  5. Gott að eiga þessa bita í frystinum og taka nokkra út í einu til að gæða sér á.

Emil í Kattholti

Elsku litli vinur minn hann Stefán Kári varð fimm ára í lok sumars. Hún Inga vinkona mín og mamma hans er algjör snillingur þegar kemur að veisluhöldum svo ég laumaði myndavélinni með mér til að geta komið þessum dásamlegu hugmyndum hingað inn. Þemað var Emil í Kattholti og verður að segjast að hann Stefán Kári er hálfgerður Emil.

Afmæliskakan er útskorinn tölustafur og smjörkrem látið fljóta saman.

Sykurpúðar á priki sem búið er að dýfa í súkkulaði og strá hafrakexmylsnu yfir.

Ávaxtaspjót slá alltaf í gegn.

Snilldar framsetning á vatnsmelónu, búið að stinga ísprikum í melónurnar.

Hvítar Rice Krispies kökur, getið til dæmis fundið uppskrift hér nema þið sleppið matarlitnum og setjið í pappaform í stað þess að skera út.

SK2

Mini Pulled Pork samlokur og ostabakki….Mmmm svo gott!

Allir krakkar fengu síðan gjafabox með sér heim, þetta eru litlir blómapottar úr IKEA, pappi settur í hvern og þeir fylltir með góðgæti.

SK1

Merkimiðana og fleira sem er útprentað pantaði Inga hjá Pixel og Ingunn hjá Andlitsmálun Ingunnar sá um að gera krakkana svona fína í framan :)

SK

Soffía og Stefán eru bestu vinir og þau eru sko algjör Emil og Ída!

Ömmusnúðar

Þessa dásamlegu stökku kanelsnúða bakaði  hún amma Guðrún ofan í okkur í tonnavís frá því ég man eftir mér. Það þurfti ekki annað en leggja inn pöntun og snúðar voru komnir með heimsendingu stuttu síðar, meira að segja kom nokkrum sinnum risastórt Mackintosh box af snúðum til okkar til Seattle á meðan við bjuggum þar. Þetta lýsir henni elsku ömmu minni vel því hún vildi alltaf allt fyrir okkur gera.

Ég tók þessar myndir í júlí 2016 og hélt ég væri löngu búin að setja inn uppskriftina. Það var hins vegar ekki fyrr en við stelpurnar hennar vorum að fara að baka snúða fyrir erfidrykkjuna hennar um daginn að ég áttaði mig á því að þetta var hvergi að finna. Þá var farið í handskrifuðu uppskriftarstílabókina hennar og auðvitað fundum við þá fljótt þar. Aðeins er að finna innihald og ekki aðferð við flestar uppskriftir hjá ömmu enda gerði hún þetta eftir sinni hendi og svona dass og smá hér og þar. Við náðum engu að síður að gera þá ansi ömmulega ef ég segi nú sjálf frá.

ömmusnúðarnir

Ömmusnúðar

  • 500 gr hveiti
  • 180 gr smjörlíki við stofuhita
  • 150 gr sykur
  • 2 tsk lyftiduft
  • 1 tsk hjartarsalt
  • 1 egg
  • Mjólk eftir þörfum
  • Rjómi og kanelsykur til að smyrja á milli

  1. Hitið ofninn 180°C
  2. Setjið allt saman í hrærivélarskálina (nema rjóma og kanelsykur) og blandið með K-inu
  3. Hellið bara smá mjólk í einu (nokkrum msk í einu) og takið blönduna úr hrærivélina meðan hún er enn frekar þurr en þó þannig að þið getið kreist deigið saman í lófanum og það heldur sér saman.
  4. Færið yfir á borð og hnoðið svolitla stund, deigið mýkist við það og ef ykkur finnst þurfa meiri mjólk þá má setja nokkrar tsk í einu saman við og hnoða vel á milli.
  5. Fletjið síðan deigið út á hveitistráðu borði, c.a 30 x 40/50 cm.
  6. Penslið með rjóma og stráið vel af kanelsykri yfir.
  7. Rúllið upp (frá lengri hliðinni) og skerið niður rúmlega 1 cm sneiðar og raðið á bökunarplötu.
  8. Bakið þar til snúðarnir fara að gyllast.

Ég skal mæla magnið af mjólkinni betur í næstu tilraun og uppfæri þá uppskriftina hér inni en þetta bara spurning að setja eins mikið af mjólk og þið komist upp með án þess að deigið verði of blautt til að hægt sé að fletja það út og rúlla upp.

 

Nacos ídýfa og nýr uppskriftarflokkur

Ég hef lengi gengið með þá hugmynd í maganum að útbúa sérstakan uppskriftarflokk fyrir „partýrétti“ sem sniðugir eru í ýmsar veislur. Þegar ég hef haldið veislur hef ég einbeitt mér að því að skrifa um kökurnar og kökuskreytingarnar en nú hef ég loksins látið verða að því að beina myndavélinni víðar svo hér munu fleiri skemmtilegir réttir detta inn á næstunni.

Þessi uppskrift kemur frá Þórunni vinkonu minni og eru bráðum tuttugu ár síðan hún kynnti mig fyrir þessari dásamlegu uppskrift og verð ég að segja að hún er frábærlega fersk og góð og erfitt að hætta þegar maður byrjar!

Þessa færslu útbjó ég fyrir Gott í matinn á dögunum og var við það að gleyma að setja hana hingað inn en hvet ykkur nú til þess að bjóða upp á þessa dásemd í næstu veislu eða bara fyrir fjölskylduna eða vinina um helgina!

Nacosdýfa

  • 1 lítil krukka salsasósa (medium)
  • 1 dós rjómaostur (við stofuhita)
  • 1 rauðlaukur
  • Iceberg (c.a ¼ haus eftir stærð)
  • 1 x rauð paprika
  • ½ púrrulaukur
  • Nokkrir sveppir (c.a 8 stk)
  • Mini tómatar og nokkrir hringir af blaðlauk til skrauts
  • Nacos (saltað/venjulegt finnst mér passa best og hringlóttu flögurnar frá Santa Maria henta vel)

ferlið

  1. Setjið salsasósu og rjómaost í hrærivélarskálina og blandið þar til kekkjalaust og létt í sér.
  2. Saxið rauðlauk mjög smátt og dreifið í botninn á þeirri skál/fati/bakka sem verður fyrir valinu.
  3. Smyrjið rjómaostblöndunni yfir rauðlaukinn.
  4. Saxið grænmetið smátt (nema tómata) og dreifið yfir blönduna (að sjálfsögðu má nota annað grænmeti, bara það sem ykkur þykir gott).
  5. Skerið nokkra mini tómata til helminga og skreytið.
  6. Gott er að kæla nacosdýfuna aðeins áður en hennar er notið en þó ekki nauðsynlegt.

 

Hrekkjavöku ostakaka

Hér er á ferðinni dásamlega góð ostakaka með Hrekkjavökuívafi sem ég útbjó fyrir Gott í matinn!

Hrekkjavöku ostakaka

Botn

  • 308 gr mulið Oreo (2x 154 gr pakki)
  • 120 gr smjör
  • ½ tsk salt
  • 1 tsk vanillusykur

Ostakakan sjálf

  • 500 gr rjómaostur til matargerðar frá Gott í matinn (við stofuhita)
  • 90 gr sykur
  • 1 tsk vanillusykur
  • 4 gelatínblöð
  • 60 ml sjóðandi vatn (til að leysa upp gelatínið)
  • 400 ml þeyttur rjómi
  • 3 x Mars súkkulaðistykki, skorin í smáa bita

Súkkulaði ganaché

  • 40 gr suðusúkkulaði (smátt saxað)
  • 2 msk rjómi

Aðferð

  1. Byrjið á botninum. Blandið saman muldu Oreo, salti, vanillusykri og bræddu smjöri. Klæðið botn (og hliðar ef vill) á 20-22 cm springformi með bökunarpappír og þjappið blöndunni á botninn og aðeins upp hliðarnar. Setjið í kæli á meðan kakan sjálf er útbúin.
  2. Leggið gelatínblöð í kalt vatn í um 10 mínútur, kreistið þá vatnið úr og setjið í sjóðandi vatn (60ml). Hrærið vel saman og tryggið að blandan sé uppleyst og leyfið því næst að ná stofuhita.
  3. Þeytið rjómann og geymið.
  4. Þeytið því næst saman rjómaost, sykur og vanillusykur þar til létt og ljóst.
  5. Hellið gelatínblöndunni saman við rjómaostablöndunni þegar hún hefur kólnað niður og vefjið síðan rjómanum saman við með sleikju.
  6. Útbúið ganaché: hitið rjómann að suðu og hellið yfir smátt saxað súkkulaðið, leyfið að standa í 2 mínútur og hrærið svo saman. Leyfið að kólna aðeins þar til það fer að þykkna og setjið þá í sprautupoka/klippið lítið gat á zip lock poka til að sprauta köngulóarvefinn á þegar búið er að setja kökuna saman.
  7. Skiptið ostakökublöndunni í tvo hluta og hrærið Mars bitunum saman við annan hlutann.
  8. Hellið fyrst hlutanum með Mars bitunum á botninn og því næst hvíta hlutanum og sléttið vel úr í forminu.
  9. Sprautið ganaché á miðjuna og svo í hringi með um það bil 1,5 cm á milli. Dragið þá prjón í gegn frá miðjunni og myndið þannig köngulóarvef.
  10. Kælið í að minnsta kosti 4 klst eða yfir nótt og losið þá úr forminu og færið yfir á disk.

Shopkins afmælisþema

Í vor var Shopkins æðið yfirráðandi hjá henni Elínu minni og kom ekkert annað til greina en halda Shopkins afmæli. Það kom skemmtileg umfjöllun um veisluna á www.mbl.is en síðan steingleymdi ég auðvitað að setja hana hingað inn í kjölfarið svo hér kemur hún loks!

Súkkulaðigosbrunnur og ávextir

  • 1,2 kg af Odense súkkulaðidropum (seljast í 100gr pokum)
  • 280 ml ljós matarolía
  • 1 ananas
  • 3 öskjur jarðaber
  • 1 askja brómber
  • 1 gul melóna (notast við kúluáhald til að taka innan úr)
  • 1 klasi rauð vínber
  • 1 klasi græn vínber
  • 1 poki mini sykurpúðar (fást t.d í Sösterne Gröne og Krónunni)
  • Grillprik

Skerið ávextina niður í hæfilega stóra bita og raðið ásamt sykurpúðum á grillpinna. Ég gerði um 30 pinna og síðan fór restin af ávöxtunum í skálar og hver og einn gat búið til sinn uppáhaldspinna og dýft í súkkulaðið.

Bræðið súkkulaðið í tvennu lagi í örbylgjuofninum á næsthæsta hita í um það bil 30 sekúndur í senn og hrærið vel á milli. Þegar súkkulaðið er bráðið er matarolíunni blandað saman við og hitað einu sinni til viðbótar. Súkkulaðiblöndunni er síðan hellt í skálina á gosbrunninum og kveikt á, blandan á að vera orðin það vel út þynnt að hún rennur fallega niður brunninn. Ef þið eigið ekki súkkulaðigosbrunn má vel notast við Fondue skálar eða hreinlega bara bræða súkkulaði og hella í venjulega skál, það er merkilegt hvað slíkt stendur lengi án þess að storkna. Ef það fer síðan að storkna má bara setja það örstutt aftur í örbylgjuofninn og aftur á borðið.

Rice Krispies kökur

  • 50 gr smjör
  • 5 msk sýróp
  • 250 gr suðusúkkulaði
  • Rice Krispies

Hitið smjör, sýróp og suðusúkkulaði saman í potti við miðlungsháan hita og leyfið blöndunni að bubbla aðeins í lokin og takið síðan af hellunni. Bætið þá Rice Krispies saman við í litlum skömmtum. Setjið minna en meira í einu og hrærið vel á milli. Mér finnst best að hafa vel af súkkulaðiblöndu svo kökurnar verði svona frekar klístraðar og „djúsí“ en hægt er að drýgja blönduna betur með smá meira Rice Krispies fyrir þá sem vilja. Setjið í pappaform sem ykkur þykja falleg (hægt að nota bæði lítil og stór) og síðan er hægt að stinga fána eða öðru skrauti í hverja köku.

Cupcake Queen Shopkins afmælisterta

Kakan

  • 1,5 Betty Crocker Devils Food Cake kökumix samkvæmt leiðbeiningum á pakka (ég blandaði reyndar tvöfalt og notaði restina í bollakökur).

Kökumix hrært samkvæmt leiðbeiningum og hellt í vel smurt risa bollakökuform. Ef þið eigið ekki slíkt er hægt að gera nokkra botna, setja krem á milli og skera út. Ég var síðan með pappaspjald sem sat á grillpinnum á milli hæða til að auðveldara væri að skera kökuna.

Smjörkrem (á þessa köku gerði ég 3 x neðangreinda uppskrift)

  • 125gr smjör (mjúkt)
  • 500gr flórsykur
  • 3 tsk vanilludropar
  • 3 msk sýróp
  • Smá vatn
  • Gulur og túrkís matarlitur
  • Kökuskraut

Blandið öllum hráefnum saman í hrærivélarskálinni þar til slétt og fellt. Skiptið kreminu  niður og litið (um 1/3 gulur og 2/3 blár).

Grunnið kökuna fyrst með þunnu lagi af kremi til að binda alla kökumylsnu. Smyrjið þá aftur þykkara lagi á neðri hlutann og sléttið eins og hægt er. Fyrir efri hlutann notaðist ég við stóran hringlaga stút (c.a 3 cm í þvermál) og sprautaði upp í spíral. Áður en efri hlutinn storknaði stráði ég svo kökuskrauti og sykurperlum hér og þar.

Sykurmassaskraut

  • Tilbúið Gumpaste (fæst í Allt í köku)
  • Svartur og bleikur matarlitur
  • Kökuskraut
  • Gullsprey/gyllt glimmer

Blandið smá klípu af gumpaste saman við bæði svartan og bleikan matarlit. Rúllið út og stingið út augu, mótið augnhár, nef, munn, augabrúnir og raðið saman. Fæturna fremst bjó ég til úr bleiku gumpaste og skreytti með kökuskrauti. Kórónuna stakk ég út með hvítu gumpaste og spreyaði með gylltum lit, stráði gylltu glimmeri yfir áður en það þornaði og stakk sykurperlum í hér og þar. Hendurnar mótaði ég með hvítu gumpaste og smurði síðan gulu smjörkremi yfir.

Poppy Popcorn Shopkins afmælisterta

Kakan

  • 1 Betty Crocker Red Velvet Cake kökumix samkvæmt leiðbeiningum á pakka.
  • Smjörkrem (1,5 x uppskrift hér að ofan)
  • Sykurperlur

Kökumix hrært samkvæmt leiðbeiningum og hellt í „Barbie“ bökunarform. Skreytt með smjörkremi í rauðu, bláu og hvítu eftir að dúkkunni hefur verið stungið í kökuna miðja. Fyrst er smurt þunnu lagi af kremi á kökuna og síðan sprautaðar stjörnur með 1M stút frá Wilton og sykurperlum stungið í hér og þar.

Peppa Mint Shopkins afmælisterta

Kakan

  • 1 Betty Crocker Vanilla Cake kökumix samkvæmt leiðbeiningum á pakka.
  • Smjörkrem (2 x uppskrift hér að ofan)
  • Sykurperlur og smá bleikt glimmer

Kökumix hrært samkvæmt leiðbeiningum og hellt í „Barbie“ bökunarform. Skreytt með bleiku smjörkremi eftir að dúkkunni hefur verið stungið í kökuna miðja. Fyrst er smurt þunnu lagi af kremi á kökuna og síðan sprautað blúndumynstur með stút nr 125 frá Wilton og bleiku glimmeri stráð yfir allt saman í lokin. Að lokum er grænbláum sykurperlum stungið í hér og þar.

Sleikjókúla

  • 30 stk Chupa Chups sleikjóar
  • ½ gul melóna (hreinsuð að innan)
  • Hjartapinnar (keyptir í Tiger)
  • Álpappír

Melónan holuð að innan (ég bjó til melónukúlur fyrir súkkulaðigosbrunnin úr því) og álpappír settur yfir hana alla. Sleikjópinnum og hjartapinnum stungið í kúluna.

Bollakökur

  • Betty Crocker Devils Food Cake kökumix
  • Smjörkrem (1 x uppskrift að ofan)
  • Smarties, M&M eða Skittles
  • Papparör og útprentaðar Shopkinsmyndir – heimatilbúið skraut

Bollakökur bakaðar, smurðar með smörkremi, skreyttar með Smarties/Skittles/M&M og priki stungið í miðjuna.

Hjúpaðir sykurpúðar

  • 1 poki Haribo sykurpúðar
  • ½ poki Candymelts í hverjum lit (ég notaði 3 liti)
  • Kökuskraut og Smarties
  • Pappaprik

Stingið pappapriki í sykurpúðana svo þeir verði vel fastir. Bræðið Candy Melts og dýfið hálfa leið upp sykurpúðann, skreytið með kökuskrauti og Smarties og leyfið að storkna.

Popp í pappapokum og karamellur settar í litlar marglitar krúsir

 

 

Brakandi bitar

Hér er á ferðinni  tilraunauppskrift úr sumarfríinu þar sem við mæðgur útfærðum Rice Krispies kökurnar örlítið og bættum Nóa kroppi í uppskriftina, vá hvað það var gott!

Brakandi bitar

  • 75 gr smjör
  • 200 gr suðusúkkulaðidropar
  • 5 msk sýróp
  • 150 gr Rice Krispies
  • 150 gr Nóa kropp + 50 gr til skrauts

  1. Setjið smjör, súkkulaði og sýróp í pott og leyfið suðunni að koma upp og lækkið þá strax niður og hrærið vel í nokkrar mínútur.
  2. Takið súkkulaðiblönduna af hellunni og leyfið að standa í nokkrar mínútur (takið til pappaform á meðan)
  3. Hrærið þá Rice Krispies og Nóa kroppi saman við og skiptið niður í formin.
  4. Setjið nokkur Nóa kropp á hverja köku áður en hún kólnar því þannig næst fallegt útlit á kökurnar.

Grillað góðgæti

Ég er enn að vinna upp myndir og uppskriftir frá því í sumarfríinu og lengra, greinilegt að ég er duglegri að baka og mynda en blogga!!!

Hér eru á ferðinni brjálæðislega góðir grillaðir bananar. Við hreinlega fáum ekki nóg af því að grilla okkur súkkulaðibanana með ýmsum útfærslum og hér kemur enn ein fyrir ykkur að njóta!

Grillaðir bananar

  • Bananar (ekki of þroskaðir)
  • Siríus rjómasúkkulaði með kremkexi
  • Suðusúkkulaðidropar

  1. Skerið endana af hverjum banana og rauf eftir honum miðjum.
  2. Komið vel fyrir á smá „álpappíshreiðri“ svo þeir liggi ekki alveg á grillinu.
  3. Fyllið með báðum tegundum af súkkulaði og reynið að koma eins miklu í hvern og þið komist upp með.
  4. Grillið yfir meðalhita í nokkrar mínútur eða þar til súkkulaðið er bráðið.

Á þessu heimili er grillað allan ársins hring, vetur, sumar, vor og haust svo það er alltaf tilefni til að gera góðan súkkulaðibanana í eftirrétt!