Blómamarengs

Tinna vinkona mín varð þrítug fyrr í sumar og er hún algjör snillingur í kökugerð. Hún útbjó tölustafina 3 og 0 úr dásamlegum blómamarengs, tók fyrir mig myndir og sendi mér uppskriftina til þess að leyfa ykkur að njóta!

Það hefur sýnt sig undanfarið að númerakökur eins og þessar eru að slá í gegn. Í flestum tilfellum hef ég séð svokallaðar „Cream Tart“ númerakökur en þar er kakan þétt í sér, þunn og í tveimur til þremur lögum og skreytt með lifandi blómum og fleiru skemmtilegu. Ég hef hins vegar ekki séð þetta búið til úr marengs fyrr svo nú ættu marengsaðdáendur að taka vel eftir.

Uppskrift fyrir einn tölustaf:

  • 6 eggjahvítur
  • 300 gr. sykur
  • ½ tsk lyftiduft
  • 1 ½ bolli Rice Crispies
  • ½ bolli möndluflögur

Ferlið

  1. Prentið út tölustafi sem fylla um það bil út í A3 blað. Dragið útlínur í gegn á bökunarpappír. Látið tölustafinn snúa öfugt þannig að þegar búið er að baka marengsinn sé hægt að snúa við á kökudisk.
  2. Bakið í 90 mín á blæstri við 120 gráður. Leyfið marengsinum að kólna í um klukkustund í ofninum áður en hann er tekinn út.
  3. Áður en þið setjið  lyftiduftið, Rice Crispies og möndluflögur út í marengsinn takið þá smávegis til hliðar og setjið í skál til að búa til rósir. Blandaði bleikum, rauðum og bláum matarlit út í til að fá lillabláan lit á marengsinn. Búið til rósir (1M stútur frá Wilton) og dropa (8B stútur frá Wilton) og látið bakast með tölustafnum í 90 mín. Áður en rósirnar og droparnir eru bakaðir má strá yfir smá kökuskrauti og leyfa því að bakast með.
  4. Sprautið svo rjóma (með smá flórsykri) á marengsbotnana með 8B stútnum og skreytti síðan með marengsskrautinu, lifandi blómum, berjum (jarðarber, hindber, brómber, kirsuber) og frönskum makkarónum.

Hversu fallegt! Hægt er að finna ótal skreytingarhugmyndir af númerakökum á netinu. Ég sagði við Tinnu að ég þyrfti nauðsynlega að prófa að útbúa eina svona á næstunni og myndi mig langa að búa til númeraköku úr brownie botnum til að prófa eitthvað nýtt svo fylgist með þegar að því kemur!

30 ára!

Blóm og ávextir….mmm

Jarðaberja sorbet

Ég hef lengi ætlað að prófa að gera heimatilbúinn ís og þegar ég fékk ísgerðarvélina frá Kitchen Aid í gjöf á dögunum var ekki í boði annað en að prófa hana og það strax! Þar sem það kom sumar í einn dag í síðustu viku ákvað ég að byrja á því að útbúa sorbet ís sem er einmitt svo sumarlegur og frískandi á bragðið.

Ég nældi mér í fersk jarðaber frá Dalsgarði í Mosfellsdal en það eru án þess að ég ýki, heimsins bestu jarðaber! Ég þarf að kaupa nokkur box hverju sinni þar sem stelpurnar mínar eru búnar með 1-2 áður en ég kemst út afleggjarann hjá þeim :)

Ég fór síðan á stúfana að skoða uppskriftir og fann eina mjög girnilega uppskrift af jarðaberjasorbet hjá Valentinu á Real Italian Kitchen en þar er hún að gefa upp leyniuppskrift sem móðir hennar útbýr fyrir veitingastaðinn sinn og nú kemur hún hér fyrir ykkur.

Athugið að mikilvægt er að hafa geymt ísgerðarvélina í frysti í að minnsta kosti 15 klukkustundir áður en þið farið að útbúa ís.

Jarðaberjasorbet

  • 200 ml vatn
  • 250 gr jarðaber
  • 150 gr sykur
  • Safi úr einni sítrónu
  • Safi úr einni appelsínu
  • 1 x eggjahvíta
  1. Setjið vatn, jarðaber og safann bæði úr sítrónunni og appelsínunni í mixer/notið töfrasprota og blandið vel.
  2. Bætið þá sykrinum saman við og þeytið aðeins að nýju, leyfið blöndunni þá að kólna í ísskáp í um eina klukkustund.
  3. Takið Kitchen Aid ísskálina úr frystinum og festið á hrærivélina. Kveikið á stillingu 4 áður en þið byrjið að hella blöndunni í skálina því annars gæti hún frosið við kantana.
  4. Hellið jarðaberjablöndunni saman við og hrærið í um 18 mínútur. Bætið þá þeyttri eggjahvítunni saman við með sleif og hrærið áfram í 4-8 mínútur í viðbót eða þar til blandan er við það að fara upp úr skálinni.
  5. Blandan er dásamleg beint upp úr skálinni en til þess að geta gert kúlur með ísskeið þarf að setja hana í plastbox og frysta í að minnsta kosti 4 klukkustundir.

Fyrst er blandan hálfgert mauk en eftir því sem mínúturnar líða þykknar hún upp.

Eftir að eggjahvítunni hefur verið blandað saman við fara hlutirnir síðan að gerast og passa þarf að hætta að hræra áður en blandan sullast upp úr ísskálinni :)

Jammí, hversu girnilegur er þessi sorbet! Það má að sjálfsögðu borða hann beint upp úr skálinni og er hann dásamlega mjúkur og góður þannig. Ef þið náið hins vegar ekki að klára hann eða viljið geyma þar til síðar eða móta úr honum kúlur er gott að setja hann í þétt plastsbox og geyma í frystinum. Til þess að útbúa ískúlur þarf til dæmis að frysta hann í að minnsta kosti 4 klukkustundir.

Hægt er að kaupa ísgerðarvélina í Rafland og þar er einnig að finna ýmsa aðra aukahluti fyrir Kitchen Aid hrærivélar.

aísskál

Þessi færsla er unnin í samstarfi við Rafland og Kitchen Aid á Íslandi

 

Bökuð epli í bolla

Um daginn gerði ég dásamlega blauta súkkulaðiköku í bolla og hef ég eiginlega verið að bíða eftir því að prófa fleiri bollauppskriftir en þegar maður fær endalausar hugmyndir af einhverju góðgæti er erfitt að koma öllu að. Þegar „Going on Vacation“ múmínbollinn bættist í safnið ákvað ég hins vegar að láta slag standa og prófa eina nýja uppskrift. Ég held ég setji mér það hér með sem markmið að prófa eina nýja kökuuppskrift í bolla í hvert sinn sem ég fæ mér nýjan Múmínbolla.

Hér er á ferðinni nokkurs konar eplapæ með karamelluívafi og vá hvað þetta var góð blanda!

Bökuð karamelluepli í bolla

Eplablanda

  • 1 x stórt Jonagold epli (eða tvö minni gul/græn epli)
  • 1 msk hveiti
  • 1 tsk sítrónusafi
  • 1 msk púðursykur
  • 1 msk saxaðar pekanhnetur
  • Walkers karamellur (þessar í fjólubláu bréfunum)

„Kröst“ á toppinn

  • 50 gr brætt smjör
  • 50 gr haframjöl
  • 1 ½ msk púðursykur
  • 1 msk maple sýróp
  • 1 tsk kanill
  • ¼ tsk salt

  1. Skerið eplið niður í litla teninga (um það bil 0,5 x 0,5 cm).
  2. Blandið restinni af hráefnunum fyrir eplablönduna saman við eplabitana fyrir utan karamellurnar.
  3. Skiptið eplablöndunni niður í 3-4 bolla og fyllið þá rúmlega til hálfs, setjið þá eina til tvær karamellur ofan á og útbúið því næst „kröstið“.
  4. Setjið öll hráefnin fyrir „kröstið“ saman í skál og setjið ofan á eplablönduna og karamelluna.
  5. Bakið í örbylgjuofninum í 3- 3 ½ mínútu eða þar til blandan fer aðeins að „bubbla“.
  6. Takið þá úr ofninum, hrærið upp í blöndunni  og blandið öllu saman og leyfið aðeins að kólna (varið ykkur því bollinn er heitur).
  7. Gott er að bera bökuðu eplin fram með góðri ískúlu og smá af söxuðum pekanhnetum.

Hvað er skemmtilegra en það að bjóða upp á eplaköku í krúttlegustu bollum heims! Mig grunar líka að ansi margir Íslendingar séu að safna þessum bollum og nú er heldur betur komið nýtt notagildi fyrir þá. Bolli er sko ekki bara bolli, hann má vera kökuform líka :)

Hamborgarar með Chili Majónesi

Grillaðir hamborgarar eru tilvalinn matur í komandi sumarveislur, svona ef sumarið lætur kannski sjá sig hér á Suðurlandinu :)

E. Finnsson var að setja Chili Majónes í flösku á markað og drottinn minn hvað þetta er mikil snilld! Við fjölskyldan útbjuggum hamborgara til að prófa hana og höfðum ýmislegt meðlæti með. Vöfflufranskar höfum við elskað síðan við bjuggum í USA og finnst mér frábært að geta keypt þær út í búð (þær yfirleitt alltaf til í Krónunni til dæmis) og svo vorum við að prófa að gera sultaðan rauðlauk í fyrsta skipti og hann var alveg dásamlegur í bland við þetta allt.

Hamborgarar með Chili majónesi

  • 500 gr nautahakk
  • 60 gr mulið Ritz kex
  • 1 pískað egg
  • 1 tsk Chile lime krydd
  • 1 tsk Steikarkrydd (má líka setja 2 af þessu og sleppa hinu)
  • Ostsneiðar
  • 10-15 stk sveppir
  • 3 rauðlaukar
  • 3 msk púðursykur
  • 6 msk smjör
  • 4-5 hamborgarabrauð
  • Grænmeti (hér eru kál og tómatar)
  • Vöfflufranskar
  • Beikon
  • Chili Majónes frá E. Finnsson

  1. Blandið hakki, Ritz kexi, eggi og kryddum saman í skál og blandið saman með höndunum.
  2. Þjappið hakkblöndunni í hamborgarabuff eða notið hamborgarapressu. Uppskriftin gefur 4-5 hamborgara eftir því hversu þykka þið viljið hafa þá.
  3. Gott er að plasta og kæla buffin á meðan meðlæti og annað er undirbúið.
  4. Hitið ofninn og setjið franskar á eina ofnskúffu og beikon á þá næstu (bökunarpappír undir), setjið í ofninn á meðan þið gerið annað meðlæti og grillið hamborgarana.
  5. Hvítlauksristaðir sveppir: Skerið sveppi í sneiðar og steikið upp úr smjöri, kryddið til með salti, pipar og hvítlauksdufti.
  6. Sultaður rauðlaukur: Skerið laukana í sneiðar og steikið upp úr smjöri, kryddið til með salti og pipar. Þegar hann hefur linast er púðursykrinum blandað saman við og leyft að malla við lágan hita í nokkrar mínútur.
  7. Grillið því næst borgarana og hitið brauðin (mér finnst gott að hafa þau í álpappír á efri grindinni því þá verða þau svo mjúk og góð), ekki gleyma ostinum og smá auka kryddi í lokin.
  8. Ég keypti nokkur krydd í Williams & Sonoma í Seattle um daginn og Steakhouse rub kryddið þeirra er dásamlegt á ýmislegt kjöt og svo var Chile lime kryddið líka skemmtileg tilbreyting. Hér getið þið þó að sjálfsögðu notað þau krydd sem ykkur þykja góð.
  9. Raðið þessu síðan öllu saman og njótið með Chili Majónesi.

Þessi færsla var unnin í samstarfi við Vogabæ

 

Nacos partýdýfa

Nacosdýfur eru í miklu uppáhaldi á þessu heimili og oftar en ekki er „eðlan“ útbúin eða dásamlega ferska dýfan sem Þórunn vinkona kenndi mér að gera fyrir eins og tuttugu árum síðan! Held ég þurfi síðan klárlega að skjalfesta hvað við fjölskyldan setjum í okkar „eðlu“ við fyrsta tækifæri og setja hingað inn.

Þessi ferska dýfa með Cheddar osti er hins vegar frábærlega góð! Ég útjó hana fyrir Gott í matinn á dögunum þar sem sérstakar HM pakkningar af sýrðum rjóma komu á markað og þessi dýfa er einmitt tilvalin til að hafa með komandi fótboltaleikjum, í saumaklúbbinn eða bara hvað sem er!

Nacosdýfa

  • 225 gr sýrður rjómi frá Gott í matinn
  • 225 gr rjómaostur við stofuhita frá Gott í matinn
  • 450 gr salsasósa
  • 1 tsk tacokryddblanda
  • ½ meðalstór iceberghaus
  • 2 stórir tómatar
  • 1/3 Óðals cheddar ostur
  • 3 msk skornar ólífur

aIMG_5224

  1. Setjið sýrðan rjóma, rjómaost, salsasósu og tacokrydd í hrærivélina og þeytið saman þar til kekkjalaus blanda myndast.
  2. Hellið blöndunni í fallegt fat/skál/bakka.
  3. Saxið iceberg kálið smátt, skerið tómatana í teninga og rífið ostinn fínt.
  4. Stráið grænmetinu og því næst ostinum yfir salsablönduna.
  5. Að lokum fara skornar ólífur yfir ostinn og gott er að plasta og kæla dýfuna í að minnsta kosti klukkustund.
  6. Berið fram með stökkum nacos flögum.

Litlar karamellu pavlour

Þessar dúllur útbjó ég fyrir útskriftina mína um síðustu helgi ásamt alls kyns öðrum sætum bitum og þessar eru algjör B O M B A, hinn fullkomni og fagri eftirréttur.

Karamellu pavlour

  • 4 eggjahvítur
  • 4 dl púðursykur
  • 300 ml þeyttur rjómi
  • 1 rúlla af Center karamellumolum
  • 3 msk rjómi
  • Hnetukurl
  1. Hitið ofninn 110°C.
  2. Þeytið saman eggjahvítur og sykur þar til stífir toppar myndast.
  3. Setjið í stóran sprautupoka með hringlaga stút (eða klippið gat á sterkan poka)og sprautið litla toppa á bökunarplötu (um það bil 4-5 cm í þvermál). Búið síðan til smá holu í miðjuna með botninum á teskeið til að meira pláss myndist fyrir rjómann.
  4. Bakið í 50 mínútur og kælið.
  5. Bræðið saman Center mola og rjóma í potti þar til falleg karamellubráð hefur myndast, leyfið að kólna í nokkrar mínútur á meðan þið þreytið rjómann.
  6. Sprautið rjóma á hverja pavlou og „drisslið“ karamellubráð yfir rjómann ásamt hnetukurli. Gott er að setja karamellubráðina í lítinn sprautupoka/zip-lock poka og klippa lítið gat á endann.
  7. Uppskriftin gefur um 35-40 stk af litlum pavloum.

Hér sjáið þið þær síðan á eftirréttaturninum fína ásamt öðru góðgæti.

Center rúllurnar fást meðal annars í Hagkaup, Nettó, Iceland, Fjarðarkaup og 10-11

 

Kokteilboð

Þann 16.júní síðastliðinn útskrifaðist ég með MPM meistaragráðu frá Háskólanum í Reykjavík. Ég er mjög góð í því að halda veislur fyrir aðra en var varla að nenna því fyrir sjálfa mig. Ég ákvað hins vegar ef nú væri ekki tilefni til að skála þá hvenær! Úr varð dömu kokteilboð fyrir mínar nánustu og voru um 18 konur sem komu og fögnuðu þessum tímamótum með mér.

Dagskráin var ansi þétt þennan laugardaginn þar sem útskriftinni í HR var flýtt um 3 klukkustundir til þess að allir gætu verið komnir til sinna heima áður en fyrsti landsleikur Íslands í Rússlandi myndi hefjast! Ég var því búin að raða upp öllu heima og aðeins átti eftir að setja veitingarnar á sína staði og taka drykki úr kæli.

Ég pantaði sushi og snittur, útbjó ostabakka og risa eftirréttaturn og kokteilboðið var milli kl:17:00-20:00 þennan dag……já og svona eitthvað lengur fyrir hluta sem var alveg dásamlegt, bara við stelpurnar að sitja, borða og blaðra og hafa það kósý.

Mig hefur lengi langað til að prófa að útbúa eftirréttarturn þar sem alls konar litlum bitum er blandað saman á nokkrum hæðum. Ég útbjó mini pavlour, brownie bita, marengstoppa, súkkulaðimús, bollakökur og keypti frosnar makkarónur þar sem ég hafði ekki tíma til að baka slíkar.  Inn á milli setti ég síðan blóm og ber og á efstu hæðina kom ég fyrir lítilli útskriftarköku. Þetta heppnaðist ótrúlega vel og ég verð að segja að þetta er með því sniðugra sem ég hef gert, hver og einn getur valið að smakka allt eða aðeins hluta.

Er hann ekki dásamlegur!

Ég mun setja uppskriftir af hverju og einu fljótlega hingað inn svo endilega fylgist með!

Þessi framsetning gæti verið tilvalin fyrir brúðkaup, fermingu eða aðrar veislur, hægt er að leigja plexistandinn hér  og setja allt sem hugurinn girnist á hann.

Það passaði einstaklega vel að hafa sushi og hvítvín í svona dömuboði og pantaði ég bæði eldaða og hráa bita í bland hjá Tokyo Sushi og sótti í Glæsibæ á heimleið úr Hörpunni. Þeir voru svo góðir að ég náði meira að segja að plata mömmu sem aldrei hefur smakkað sushi til að smakka á þeim elduðu og hún kom aftur til að sækja sér fleiri bita, enda ekki furða…..mmmm

Þar sem tvær af gestunum eru barnshafandi passaði ég mig á því að hafa aðeins eldaða bita á einum stað og síðan blandaða bita annars staðar til að taka enga óþarfa áhættu. Ég færði bitana yfir af plastbökkunum á langt trébretti og einnig lyfti ég nokkrum bitum upp á lítinn kökudisk. Það er svo fallegt að raða þessum bitum upp á skemmtilegan hátt.

Mmmmm…..hægt er að panta veislubakka frá Tokyo Sushi hér.

Hér fyrir ofan sjáið þið blandaða bakkann. Einnig færði ég meðlætið yfir í litlar skálar og þetta sló algerlega í gegn.

Ég var með nokkra litla ostabakka hér og þar á veisluborðinu þar sem það er alltaf gott að narta í slíkt með og inn á milli smáréttanna.

Í fermingu dóttur minnar í fyrra pantaði ég kokteilsnittur hjá Smurbrauðsstofu Sylvíu og þær voru svo dásamlega góðar að ég hafði samband við hana Guðrúnu smurbrauðssnilling aftur. Ég pantaði 80 stk af þremur mismunandi tegundum og þær kláruðust allar, svo góðar voru þær!

Roastbeef snitturnar voru vinsælastar og fyrstar til að klárast!

Laxasnitturnar eru svo guðdómlega fallegar með þessari skreytingu.

Það er bara eitthvað við svona kokteilsnittur sem gerir veisluborðið einstaklega fágað og glæsilegt. Þessir fallegu svörtu standar sem Finnur vinur okkar smíðaði sjálfur fyrir fermingu dóttur sinnar eru auðvitað gordjöss og snitturnar sóma sér vel á þeim!

Í veislu sem þessari er nauðsynlegt að skála fyrir áfanganum! Ég lét því LOKSINS verða að því að fá mér Essence kampavínsglösin frá Iittala þrátt fyrir að hafa haldið ótal áramótapartý án þess að geta skálað í almennilegum glösum!

Habbý vinkona sá um að fylla á glösin og síðan röðuðum við þeim fallega upp.

Skál!

Ég er með algjört æði fyrir „Naked cakes“ þessa dagana og því var útskriftarkakan lítil þannig.

Ég útbjó litla gulrótarköku sem ég færði yfir á toppinn á plexistandinum og fallega skiltið á toppnum fékk ég hjá Hlutprent eins og svo oft áður.

Hér koma síðan nokkrar fleiri myndir af veisluborðinu………

Eftirréttaturninn var svo dásamlegur að erfitt var að hætta að mynda hann.

Mæli klárlega með þessu!

Fallegu snitturnar.

Girnilegi sushibakkinn!

Fallegi vasinn hennar Lukku vinkonu.

Til þess að auðvelda ykkur að áætla magn af veitingum fyrir 3 klukkustunda kokteilboð (þar sem nokkrar sátu lengur) þá koma hér smá ráðleggingar.

20 dömur 

  • 80 kokteilsnittur
  • 130 sushibitar
  • Ostabakkar (4 ostar, kex, ávextir, hráskinka, salami, sultur, ólífur o.fl)
  • 90 litlir sætir bitar (súkkulaðimús, makkarónur, browniebitar, muffins, mini pavlour o.fl)
  • 4 hvítvínsflöskur
  • 2 rauðvínsflöskur
  • 3 freyðivínsflöskur
  • 15 bjórdósir
  • 20 sódavatn og gosdósir í bland

Þessi færsla er styrkt að hluta til.

Pestólokur með Dala brie

Gerði þessa uppskrift um daginn fyrir Gott í matinn og VÁ, VÁ, VÁ hvað þær voru dásamlega góðar! Er klárlega að fara að prófa að nota Brie í fleiri samlokur á næstunni svo fylgist með!

Þessar sóma sér vel á veisluborðinu eða í nestistöskuna.

Pestóloka með Dala Brie

  • 3 x lítil baguette brauð
  • Eitt bréf pestóskinka
  • 1 ½ Dala Brie ostur
  • Rautt pestó
  • Klettasalat
  • Gouda ostsneiðar
  1. Afþýðið baguette brauðin og skerið eftir endilöngu (þau eru seld sex talsins í poka og eru frystivara). Þessi verða mjúk og góð þegar búið er að rista þau.
  2. Smyrjið góðu lagi af pestó á neðri hluta brauðsins.
  3. Því næst fara ostsneiðarnar á og svo skinkan. Eitt bréf á að innihalda sex stórar skinkusneiðar og því duga tvær sneiðar á hverja loku. Brjótið skinkuna saman eftir endilöngu og leggið ofan á ostsneiðarnar.
  4. Skerið Dala Brie í hæfilega stóra bita og skiptið niður á brauðin.
  5. Lokið og grillið þar til brauðið brúnast og osturinn bráðnar(gott að klemma grillið ekki alveg niður til að koma í veg fyrir að osturinn leki af brauðinu).
  6. Þegar brauðið er tilbúið má leyfa hitanum aðeins að rjúka úr, taka efra lokið af og setja klettasalat á hverja loku.
  7. Síðan má skera hverja loku niður í minni bita.

1 árs afmælisveisla

Elsku litla gullið mitt hún Hulda Sif varð eins árs gömul þann 19.apríl síðastliðinn. Það var að þessu sinni Sumardagurinn fyrsti og því var ekkert annað í stöðunni en að bjóða upp á mjög sumarlegt afmælisþema og varð gult og hvítt fyrir valinu.

Elín Heiða stóra systir varð 9 ára þann 19.mars og héldu þær saman upp á afmælin sín fyrir vini og ættingja þrátt fyrir að Elín hafi verið búin að fá sína skautaafmælisveislu með bekkjarsystrunum á afmælisdaginn í mars.

Hér fyrir neðan má finna hugmyndir úr veislunni í máli og myndum…….

aIMG_3819

 

Afmæliskakan sjálf var tveggja hæða súkkulaðikaka, skreytt með smjörkremi.

Við skelltum í eina aukaköku til þess að báðar fengju nú að blása á kerti á „sinni“ köku og hér er á ferðinni lítil og krúttleg súkkulaði „naked cake“.

Það er svo gaman að skreyta kökur með lifandi blómum!

Rice Krispies kökur í ýmsum útfærslum slá alltaf í gegn!

Hér erum við með Rice Krispies „ís“ sem búið er að dýfa í hvítt og síðan gult Candy melts, uppskrift og aðferð að finna hér.

Þessir dúllulegu „donuts“ eru sykurpúða hrískökur, hringirnir snúnir út með plastglasi og svo sleif notuð til að búa til holu í miðjuna. Þeir síðan kældir og að lokum dýft í hvítt Candy melts og kökuskrauti stráð yfir, þetta sló alveg í gegn!

Litlar dúllur standa alltaf fyrir sínu. Mini súkkulaði bollakökur með hvítu smjörkremi sem sprautað er á með stút 2D frá Wilton, kökuskrauti stráð yfir og að lokum M&M á toppinn.

Hér eru á ferðinni gulrótarköku bollakökur (Betty gulrótarkökumix) og gult smjörkrem ásamt smá sykurskrauti.

Marmara kökupinnar sem ég var að prófa í fyrsta skipti. Um er að ræða vanillu kökupinna (Betty vanillu kökumix og vanillu krem) sem dýft er í gult og hvítt Candy melts til að fá fallega marmaraáferð. Ég var með hvítt bráðið Candy melts sem ég setti síðan alltaf smá og smá af gulu saman við og dýfði í gegnum báða liti í einu og út kom skemmtilega mismunandi marmaramynstur.

Einnig voru nokkrir einfaldir gulir gerðir á hvolfi með sykurskrauti og sykurmassafiðrildum.

Á fullorðinsborðinu var síðan að finna þessa hér, ég held þetta séu uppáhalds súkkulaði kökupinnarnir mínir, það er eitthvað við þetta Rice Krispies og súkkulaði í bland.

Elín Heiða fékk fallega hvíta skautastelpu á sína köku og voru það snillingarnir hjá Hlutprent  sem sáu um að útbúa afmælisskiltin fyrir mig og þau eru alveg ótrúlega flink, geta gert nánast allt milli himins og jarðar.

Hulda Sif fékk 1 árs skilti!

Gamla góða Egils ananasþykknið í vatni slær alltaf í gegn hjá krökkunum og að þessu sinni settum við nokkrar ferskar ananassneiðar út í.

Á eyjunni voru síðan ýmsar kræsingar fyrir allt fullorðna fólkið og má þar helst nefna (þó margt hafi gleymst að mynda): Ostabakka, mini hamborgara, púðursykurmarengsinn hans pabba (sem hann gerði), jarðaberjatertu frá tengdó, kökupinna, snakk og fleira :)

Þessir dásamlegu og djúsí hamborgarar komu frá American Style. Við pöntuðum hjá þeim fyrir ferminguna í fyrra og grunar mig að þetta sé langt því frá í síðasta skipti sem leitað verður þangað þar sem þeir hafa slegið í gegn bæði hjá ungum sem öldnum.

Hversu krúttaðir eru þeir!

Fallegu stelpurnar mínar, vantar bara þá elstu sem lá lasin upp í herbergi á meðan veisluhöldum stóð :(

Hulda Sif 1 árs gullmoli

Mini bláberja skyrkökur

Þessar dúllur eru alveg dúndur góðar get ég sagt ykkur og tilvalinn og sumarlegur eftirréttur!

Mini bláberja skyrkökur

Botn

  • 300 gr Digestive kex
  • 50 gr brætt smjör

Skyrblanda

  • 1 x KEA skyr með vanillubragði (stór dós)
  • 500 ml rjómi

Bláberjasósa

  • 250 gr bláber
  • 50 ml vatn
  • 3 msk sykur
  • ½ tsk sítrónusafi
  • ½ tsk vanilludropar
  1. Botn: Myljið kexið (setjið í matvinnsluvél) og hellið bræddu smörinu yfir og hrærið saman. Leyfið að kólna á meðan bláberjasósan er útbúin.
  2. Bláberjasósa: Setjið öll hráefnin í pott og leyfið suðunni að koma upp, lækkið þá niður í meðalhita, hrærið vel í þar til sósan fer að þykkna (tekur um 10 mínútur). Setjið sósuna til hliðar og leyfið henni að kólna aðeins á meðan þið útbúið skyrblönduna.
  3. Skyrblanda: Þeytið rjómann og vefjið vanilluskyrinu saman við.
  4. Samsetning: Setjið um 2 msk af kexmylsnu í hvert glas, því næst skyrblöndu og síðan bláberjasósu þar ofan á, skreytið með ferskum bláberjum.

Einnig væri hægt að raða skyrkökunni saman í eina stóra skál ef þið kjósið.