Skinkuhorn – veisluútgáfa

Um helgina skelltum við mæðgur í skinkuhorn í tilefni þess að Gummi frændi var í heimsókn og varð hann 18 ára á sunnudaginn!

Við vöktum hann með nýbökuðum hornunum, söng og súkkulaðiköku. Ég hef áður sett inn uppskrift af einföldum skinkuhornum og er þetta í grunninn svipuð uppskrift nema með smá útfærslum fyrir hátíðleg tilefni.

Skinkuhorn – veisluútgáfa

  • 150gr brætt smjör
  • 750ml mjólk
  • 1 ½ pk þurrger (litlu pokarnir)
  • 1250gr hveiti
  • 90gr sykur
  • 2 tsk salt
  • 3 pakkar Skinkumyrja
  • 200gr skinka skorin í litla bita
  • Rifinn ostur (inn í og ofan á)
  • Egg til penslunar

  1. Bræðið smjörið við miðlungshita
  2. Hellið mjólkinni út í og hitið þar til blandan er ylvolg.
  3. Hellið þá gerinu saman við og leyfið að standa í amk 5 mínútur þar til gerið fer örlítið að freyða.
  4. Setjið öll þurrefnin (hveiti, sykur,salt) í hrærivélarskálina á meðan og hellið mjólkurblöndunni svo varlega saman við og hnoðið með króknum (eða í höndunum).
  5. Stundum þarf að bæta örlítið meira af hveiti við en deigið má þó alveg vera örlítið blautkennt fyrir hefun.
  6. Smyrjið skál með matarolíu (ég notaði reyndar PAM matarolíusprey), mótið kúlu úr deiginu og komið fyrir í skálinni, snúið 1x til að maka olíunni allan hringinn og setjið því næst hreinan rakan klút yfir skálina og hefið í um 45 mínútur.
  7. Á meðan er gott að gera bökunarplötur tilbúnar, skera niður skinkuna og rífa ostinn.
  8. Skiptið deiginu í 10 hluta (svo hverjum í 8 einingar).
  9. Fletjið hvern hluta út og skiptið niður með pizzahníf. Raðið smurostinum, skinkunni og osti á hvern hluta og rúllið upp frá breiðari endanum.
  10. Munið að snúa upp á endana þegar á plötuna er komið til að koma í veg fyrir að góðgætið renni út á endunum.
  11. Penslið með pískuðu eggi og stráið smá osti yfir hvert horn.
  12. Bakið í 190°C heitum ofni í 12-15 mínútur eða þar til hornin verða gullinbrún.

Þessi 80 skinkuhorn eru ekki lengi að klárast skal ég segja ykkur en gott er að lauma strax hluta af þeim í frystinn og grípa svo með í nesti eða þegar gesti ber að garði.

 



Eitt ummælið við “Skinkuhorn – veisluútgáfa

  1. Pingback: Ferming, veitingar og hugmyndir | Gotterí og gersemar

Skildu eftir skilaboð

Netfang þitt mun ekki vera birt

Current month ye@r day *