Kókos-Sörur

Þar sem maðurinn minn er mikill aðdáandi alls með kókos prófuðum við þetta árið að gera kókosútfærslu af sörunum ásamt því sem við gerðum líka þessar hefðbundnu.

Þessar eru alveg S V A K A L E G A góðar svo ef ykkur langar að eiga eitthvað gott yfir hátíðarnar þá mæli ég með þessum!

Kökur

  • 90 gr gróft kókosmjöl frá „Til hamingju“
  • 180 gr möndlur frá „Til hamingju“
  • 220 gr flórsykur
  • 4 eggjahvítur
  1. Setjið möndlurnar í matvinnsluvél þar til þær verða að mjöli og blandið þá saman við flórsykurinn.
  2. Stífþeytið eggjahvíturnar og blandið saman við möndlublönduna með sleif.
  3. Vefjið að lokum kókosmjölinu saman við blönduna með sleif.
  4. Setjið kúfaðar teskeiðar með smá millibili á bökunarplötu og bakið við 180°C í um 13-16 mínútur.
  5. Kælið og útbúið kremið á meðan.

Krem

  • 4 eggjarauður
  • 6 msk sýróp
  • 260gr smjör við stofuhita
  • 3 msk bökunarkakó
  • 2 tsk kaffi
  1. Stífþeytið eggjarauðurnar þar til þær eru þykkar og gulleitar.
  2. Velgið sýrópið á meðan og hellið varlega útí þeyttar rauðurnar  í mjórri bunu og þeytið áfram.
  3. Blandið smjörinu saman við blönduna og þeytið áfram þar til létt og ljóst.
  4. Að lokum fer kakóið og kaffið saman við blönduna og þeytt áfram.
  5. Gott er að miða við góða teskeið af kremi á hverja köku og hægt að setja það á með hníf eða sprautupoka. Gott er að setja magnið á miðjuna og draga svo niður að hliðunum til að mynda  nokkurs konar topp með kreminu. Athugið að smyrja kreminu á sléttu hliðina!
  6. Setjið kökurnar í frysti jafnóðum á meðan þið smyrjið og þá verða þær tilbúnar til dýfingar þegar þið eruð búin að setja krem á allar.

Hjúpur

  • Um 300gr af dökku súkkulaði
  1. Bræðið súkkulaðið í lítilli djúpri skál í örbylgjuofni eða vatnsbaði. Ef örbylgjuofninn er notaður er gott að hita súkkulaðið í 20-30 sekúndur í einu og hræra á milli.
  2. Takið um 3-5 kökur úr frystinum í einu og dýfið í súkkulaðihjúpinn. Reynið að ná taki á kökunni fyrir neðan kremið og dýfið nægilega djúpt til að súkkulaðið snerti kökuna sjálfa allan hringinn og kremið verði þannig þakið hjúp.
  3. Leyfið súkkulaðinu að storkna og geymið svo í frysti/kæli og berið fram eftir hentugleika.



Skildu eftir skilaboð

Netfang þitt mun ekki vera birt

Current month ye@r day *