Hnetumolar

aIMG_7048

Hér eru á ferðinni poppandi góðir hnetumolar með súkkulaði….Mmmmm

Hnetumolar

  • 80 gr Dry Roasted Macadamia Nuts frá Nutrisal
  • 140 gr Dry Roasted Cashew Nuts frá Nutrisal
  • 80 gr Dry Roasted Peanuts frá Nutrisal
  • 200 gr Polly súkkulaðikúlur
  • 50 gr Maxi popp
  • 400 gr suðusúkkulaði

  1. Saxið allar hnetur gróft niður.
  2. Skerið Polly súkkulaðikúlur til helminga.
  3. Myljið Maxi popp gróft með lófunum.
  4. Blandið öllu saman í stóra skál.
  5. Bræðið suðusúkkulaði og hellið yfir hnetublönduna og blandið vel saman.
  6. Klæðið kökuform (um 30 x 20 cm) með bökunarpappír og hellið hnetublöndunni þar í og þjappið vel.
  7. Kælið eða frystið þar til súkkulaðið harðnar og skerið/brjótið niður í smærri mola.

Salthnetu eplabaka

Salthnetu eplabaka

  • 150 gr smjör við stofuhita
  • 150 gr hveiti
  • 100 gr púðursykur
  • 50 gr sykur
  • 3 stór epli (jonagold)
  • 80 gr súkkulaðirúsínur
  • 80 gr salthnetur
  • Kanelsykur eftir smekk

  1. Hitið ofninn 180°C
  2. Blandið saman smjöri, hveiti og báðum tegundum af sykri, leggið til hliðar.
  3. Afhýðið eplin og skerið í þunnar sneiðar, leggið til hliðar.
  4. Smyrjið eldfast bökuform og setjið um 2/3 af deiginu í botninn og þrýstið aðeins upp á kantana.
  5. Raðið helmingnum af eplunum ofan á, stráið kanelsykri yfir, því næst restinni af eplunum og aftur kanelsykri.
  6. Stráið síðan súkkulaðirúsínum, salthnetum og restinni af deiginu yfir toppinn og bakið í um 30 mínútur þar til gyllt.
  7. Berið fram með rjóma eða ís.

Center súkkulaði- og karamellubrownies með súkkulaðirjóma

Á dögunum prófaði ég nýja útfærslu af brownies þar sem ég setti karamellusúkkulaðið Center á milli deiglaga fyrir bakstur og ég ætla ekki að segja ykkur hvað hún var góð þessi. Síðan þeytti ég rjóma með Nesquik kakói og fór sá súkkulaðirjómi einstaklega vel með bitunum.

Center karamellu brownies

  • 225 gr smjör við stofuhita
  • 260 gr sykur
  • 3 egg
  • 3 tsk vanilludropar
  • 270 gr suðusúkkulaði (brætt)
  • ½ tsk salt
  • 2 msk bökunarkakó
  • 160 gr hveiti
  • 3 msk volgt vatn
  • 3 x Center (3 x 78gr) skorin til helminga

Center brownie

  1. Hitið ofninn 175°C.
  2. Klæðið skúffukökuform ( ca 30 x 40 cm) með bökunarpappír og geymið.
  3. Skerið Center súkkulaðið til helminga og geymið.
  4. Þeytið saman sykur og smjör.
  5. Bætið eggjum saman við einu í einu og skafið niður á milli, því næst vanilludropunum og bræddu súkkulaðinu.
  6. Þurrefnin koma þar á eftir og volgt vatnið.
  7. Setjið ½ af deiginu í formið, stráið Center á milli og setjið svo restina af deiginu þar yfir.
  8. Bakið í um 35-40 mínútur eða þar til prjónn kemur út með smá kökumylsnu á (ekki blautu deigi).
  9. Kælið vel , lyftið upp úr forminu og skerið í bita.
  10. Berið fram með þeyttum súkkulaðirjóma.

Súkkulaðirjómi

  • 400 ml rjómi
  • 2 tsk Nesquik kakó

Þeytt saman og borið fram með kökunni.

Mini IHOP morgunverðarpönnsur

Á mánudaginn útbjuggum við elsta dóttir mín „Brunch“ í tilefni af Verkalýðsdeginum og langri skólafríshelgi hjá eldri dömunum á heimilinu. Við ákváðum að prófa nýja pönnukökuuppskrift og þar sem við elskum IHOP (International House of Pancakes) þá gúgluðum við eftirlíkingu af slíkri uppskrift. Reyndar eru pönnukökurnar á IHOP risastórar og dugar ein fyrir flesta með öðru meðlæti en þar sem við vorum ekki enn búnar að prófa nýju pönnuna okkar sem gerir nokkrar litlar pönnsur í einu ákváðum við að gera mini útfærslu af þessum og voru þær dásamlega góðar!

Mini IHOP pönnukökur

  • 1 ¼ bolli hveiti
  • 1 ½ tsk lyftiduft
  • 2 ½ tsk sykur
  • ½ tsk salt
  • ½ tsk matarsódi
  • 1 ½ – 2 bollar „buttermilk“ (mjólk og 3 tsk sítrónusafi látið sitja í 5 mín)
  • 2 msk matarolía
  • 1 egg

  1. Blandið þurrefnum saman í skál.
  2. Hellið því næst 1 ½ bolla af buttermilk, matarolíu og eggi saman við og blandið þar til kekkjalaust. Þynnið deigið með meiri buttermilk ef ykkur þykir þess þurfa.
  3. Steikið á meðalháum hita þar til loftbólur myndast og snúið þá við.
  4. Berið fram með ávöxtum og sýrópi.
  5. Þessi skammtur hentaði vel fyrir okkur fjölskylduna (4 talsins) með beikoni, eggjum og ávöxtum og voru aðeins örfáar litlar pönnukökur eftir.

Við eigum æðislega gott kanadískt sýróp sem fólk sem við áttum húsaskipti við í fyrra kom með frá Kanada að gjöf fyrir okkur. Ef einhver veit hvort þessi tegund fáist hér á landi erum við alveg til í að fá upplýsingar um það, því þessi brúsi er við það að klárast og heldur langt að þurfa að skottast til Kanada fyrir nýjan.

Mæli með þið skellið í „Brunch“ um helgina!

Betty bjargar páskunum!

Þessi er fyrir þá sem hafa lítinn tíma en langar að útbúa páskalega köku fyrir komandi daga!

Eldri dóttir mín skellti í þessa dásemd og verð ég að segja að Betty súkkulaðikaka hreinlega klikkar aldrei og allir kunna að meta þennan einfaldleika.

Botnar

  • 1 x Betty Crocker Devils Food Cake Mix
  • 1 x egg, 4 msk bökunarkakó og 1 x Royal súkkulaðibúðingur aukalega
  1. Blandið kökumixi saman samkvæmt leiðbeiningum á pakka nema bætið auka eggi og bökunarkakói saman við í upphafi.
  2. Þegar búið er að skafa niður á milli og hræra vel er dufti af einum súkkulaði Royal búðing blandað saman við og hrært rólega (varist að blanda of lengi hér).
  3. Spreyið 2 x 20 cm form með matarolíuspreyi og skiptið deiginu jafnt á milli.
  4. Bakið við 160° þar til prjónn kemur út með engu kökudeigi og kælið botnana.

Krem

Að þessu sinni gerði hún neðangreinda uppskrift af súkkulaði smjörkremi til að smyrja á milli botna, þekja kökuna og afgangurinn var settur í sprautupoka með 1 M stút.

Að auki notaði hún 1 dós af Betty Crocker Vanilla Frosting, bætti 1/2 kassa af flórsykri saman við og skipti í 4 hluta. Síðan var útbúið smá gult, bleikt og fjólublátt smjörkrem og fjórði hlutinn var áfram hvítur. Með þessu  móti voru komnir 5 litir (mega að sjálfsögðu vera færri) til að sprauta stjörnur með.

Súkkulaðismjörkrem

  • 125 gr smjör (mjúkt)
  • 500 gr flórsykur
  • 2 tsk vanilludropar
  • 2 msk sýróp
  • 5 msk bökunarkakó
  • Nokkrar msk af volgu vatni
  1. Setjið öll hráefnin nema flórsykur og kakó í hrærivélarskálina og hrærið vel saman.
  2. Blandið flórsykri og kakó saman og bætið varlega útí blönduna, skafið niður á milli og hrærið þar til kremið er slétt og fellt.
  3. Bætið vatni saman við eftir hentugleika. Gott er að hafa kremið aðeins mýkra til að smyrja á milli botna og til að þekja kökuna svo gott gæti verið að setja smá auka flórsykur í afganginn og hræra saman áður en hann fer í sprautupoka.

Skreytingaraðferð

  • 3 ks af Fingers (mögulega aðeins meira svo 4 ks ef þið viljið vera örugg)
  • 3 pokar af Cadbury’s eggjum
  1. Byrjið á því að raða Fingers allan hringinn á kökunni. Hjá henni náðu þeir ekki alveg að vera jafn háir kökunni svo hún geymdi smá pláss efst og sprautaði síðan stjörnum niður á brúnina til að ná að þekja kökuna með kremi niður að kexinu.
  2. Takið því næst alla sprautupokana (súkkulaði og Betty kremið í bland) og sprautið stórum stjörnum með 1 M stút hér og þar á topp kökunnar. Ef þið eruð aðeins með einn 1 M stút þá er ekkert mál að klára einn lit í einu, sprauta bara stórar stjörnur hér og þar og fylla upp í með næstu litum.
  3. Raðið að lokum súkkulaðieggjum hér og þar á toppinnn.

Þessi kom alveg ótrúlega vel út hjá henni og tók alls ekki langan tíma að gera! Til stelpnanna komu nokkrir gestir í köku og ísköld mjólk fór að þeirra mati best með henni :)

Páskatertan 2017

Systir mín átti afmæli í gær og kom fjölskyldan saman í kvöldkaffi. Ég bauðst til að gera köku enda langaði mig að prófa eina páskaköku sem ég sá uppskrift af á síðunni Chewtown. Ég reyndar breytti um fyllingu og hlutföll í kökunni og gerði hreiðrið á annan hátt, hér fyrir neðan fáið þið mína útfærslu af þessari páskabombu.

 Kakan er skemmtilega páskaleg og krúttleg

páskakaka

Súkkulaði páskakaka með banana- og Daimrjóma

Botnar

  • 280 gr hveiti
  • 60 gr bökunarkakó
  • 100 gr púðursykur
  • 1 tsk matarsódi
  • 1 tsk salt
  • 200 gr grísk jógúrt
  • Fræ úr einni vanillustöng
  • 4 egg
  • 300 gr brætt smjör
  1. Hitið ofninn 160°C.
  2. Setjið þurrefnin saman í skál og blandið saman.
  3. Setjið því  næst brætt smjörið, grísku jógúrtina, vanillufræin og loks eggin eitt í einu saman við þurrefnin. Blandið vel og skafið niður á milli.
  4. Skiptið niður í 2 x 20cm bökunarform sem hefur verið klætt með bökunarpappír í botninn og vel smurt á hliðunum.
  5. Bakið í um 30 mínútur eða þar til prjónn kemur út með smá kökumylsnu á (ekki blautu deigi).

Súkkulaðihreiður og egg

  • 150 gr hjúpsúkkulaði
  • 2 pk Cadbury‘s egg (180 gr)
  1. Finnið skál sem hentar sem hreiður og leggið bökunarpappír yfir hana og inn í hinumegin (mæli alveg með að gera 2 hreiður því þau eiga það til að brotna þegar tekin í sundur).
  2. Bræðið hjúpsúkkulaðið og setjið í zip lock poka og klippið lítið gat á endann.
  3. Drisslið súkkulaðinu fram og aftur yfir bökunarpappírinn og passið að setja vel alls staðar svo það sé sterkara þegar pappírinn verður losaður frá.
  4. Setjið í frysti í 15 mínútur, losið skálina úr og því næst bökunarpappírinn mjög varlega.
  5. Ekki hafa áhyggjur þó þetta brotni eitthvað því það er fínt að taka brotin og líma (m.súkkulaði) hér og þar og bæta við litlum „greinum“ utan á með því að tína upp lítil brot og líma.
  6. Leyfið að kólna á meðan ganaché er útbúið.

Fylling

  • 500 ml stífþeyttur rjómi
  • 2 x bananar skornir í bita
  • 140 gr smátt saxað Daim (ég setti það í mixerinn smá stund)
  1. Blandið öllu saman og smyrjið á milli botnanna þegar þeir hafa kólnað.

Ganaché

  • 110 gr suðusúkkulaði
  • 25 gr smjör
  1. Bræðið saman í örbylgjuofni í stuttan tíma í senn, hrærið vel á milli og þegar vel blandað má hella blöndunni á efri botninn og dreifa úr (allt í lagi þó það leki aðeins niður)
  2. Að lokum má staðsetja súkkulaðihreiðrið á toppnum (bíðið þar til ganaché hefur kólnað samt því annars bráðnar hreiðrið).

Bananar og Daim í bland við rjóma var undursamleg blanda og sérlega með þessum súkkulaðibotnum og ganaché!

Ferming, veitingar og hugmyndir

Þann 26.mars síðastliðinn fermdist elsta dóttir okkar hún Harpa Karin. Mér finnst merkilega skemmtilegt að skipuleggja veislur en undirbúningur fyrir fermingaveislu er þónokkur og ótrúlega mörg atriði sem huga þarf að, allt frá fatnaði yfir í veitingar. Við héldum veisluna heima og vorum með opið hús þannig að gestagangur dreifðist vel yfir daginn. Þar sem ég er frekar mikið skipulagsgúrú var allt skráð í excel á þessu heimili og mun þetta skjal án efa aðstoða okkur við komandi fermingar.

Ég ákvað að taka saman lista, bæði yfir veitingar og aðra þætti og deila með ykkur í þeirri von að geta aðstoðað aðra sem standa í sömu sporum. Hér fyrir neðan er því að finna ýmsar upplýsingar ásamt aragrúa af myndum úr veislunni.

aIMG_5505

Veitingar – hugmyndir og magn

Það yrði líklega mín versta martröð ef veitingar myndu klárast í veislu hjá mér, játa mig klárlega seka um að hafa alltaf veitingar fyrir allt hverfið og er þetta auðvitað ekkert nema sóun, bæði á mat og fjármunum :)

Við áttum von á 85 gestum (63 fullorðnum og 22 börnum) og buðum upp á ýmsa smárétti, kökur í eftirrétt og vorum með nammibar. Ég tók saman það magn sem var pantað/útbúið og skráði svo hjá mér hvað stóð eftir til að geta gefið öðrum raunhæfa áætlun. Magn fer eflaust mikið eftir því hversu góðar veitingarnar eru, hversu svangir gestirnir eru og vorum við skólafélagarnir að grínast með að setja upp áætlun með svengdarstuðli  fyrir hvern gest til að ná að áætla þetta með minni óvissu, já svona fer verkefnastjórnunarnámið með mann :)

Ég ætla nú hins vegar bara að setja hér inn það magn sem hefði dugað að panta (og smá afgangur orðið eftir)  miðað við þá rétti sem í boði voru á þessu heimili. Hver rétturinn á fætur öðrum var betri og fór mjög jafnt af öllu. Auðvitað væri hægt að hafa færri tegundir en þá þyrfti að auka aðeins við magnið á hverjum rétti.

aIMG_5563

Magn af veitingum fyrir 85 gesti

Smáréttir

  • Kokteilsnittur (Canapé) – 200 stk
  • Mini pítur – 100 stk
  • Mini hamborgarar – 100 stk
  • Litlar hakkbollur – 100 stk
  • Kjúklingaspjót – 100 stk
  • Djúpsteiktar risarækjur – 150 stk
  • Ávaxtapinnar – 60 stk
  • Rækjukokteill – 70 stk
  • Beikonvafðar döðlur – 100 stk
  • Ostapinnar – 70 stk
  • Skinkuhorn – 100 stk

Meðaltal af smáréttum á gest = 13 bitar

aIMG_5666

Dásamlega fallegar og góðar kokteilsnittur frá Smurbrauðsstofu Sylvíu.

aIMG_5592

Mini pítur frá Pítunni slógu heldur betur í gegn hjá ungum sem öldnum.

aIMG_5598

Mini hamborgarar frá American Style, við völdum bernaise og beikon borgara í bland. Það var umtalað í veislunni og eftir hana hvað þeir hefðu verið djúsí og góðir þar sem smáborgarar vilja oft verða örlítið þurrir, þessir voru hins vegar langt frá því!

aIMG_5617

Litlar hakkbollur frá Stórkaup, eldaðar í Hoi Sin sósu og sesamfræjum stráð yfir í lokin (eldaðar kvöldinu áður og bornar fram kaldar í veislunni).

aIMG_5613

Kjúklingaspjót frá Stórkaup (elduð að morgni og borin fram köld í veislunni síðdegis).

aIMG_5585

Butterfly rækjur frá Stórkaup (djúpsteiktar í olíu að morgni og bornar fram kaldar síðdegis með Sweet Chili sósu), slógu algjörlega í gegn!Heimagerðir smáréttir

Heimatilbúnir smáréttir sem vinir og ættingjar aðstoðuðu við að gera:

  • Ostapinnar (keypti skorna bita í Ostabúðinni og svo voru settar ólífur, vínber eða salami á pinnana og þeim stungið í hálfa litla melónu. Þetta var bæði fallegt og bragðgott borðskraut, p.s allir skrautpinnar pantaðir á Ali Express).
  • Rækjukokteill í litlum skálum (Soðin rækja, ferskt mangó í litlum tengingum, vel saxaður rauðlaukur (marineraður í limesafa í 30 mín), Pinapple Churry Chutney sósa og Ruccola).
  • Beikonvafðar döðlur (Ferskar steinhreinsaðar döðlur og um 2 snúningar af beikoni, útbúið kvöldinu áður og hitað að morgni, borið fram kalt síðdegis).
  • Ávaxtaspjót (Melóna, ananas, jarðaber, bláber, vínber eða hvað sem ykkur dettur í hug, keypti spjótin í Tiger og þetta var gert að morgni, geymt í kæli þar til síðdegis. Mikið gott að hafa smá ferskt í bland við allt hitt).
  • Skinkuhorn (1,5 uppskrift af þessum hér, bestu horn í heimi og hvert einasta kláraðist).

aIMG_5724

Kökur/sætir bitar

  • Makkarónur – 50 stk
  • Vanillubollur – 60 stk
  • Bollakökur – 20 stk
  • Kökupinnar – 100 stk
  • Kransakökubitar – 35 stk
  • Kransakaka – 12 hringir hefðu dugað
  • Fermingarterta – 6“ og 12“ hefðu dugað (öll 10“ var umfram)
  • Rice Krispies kransakaka – 13 hringir hefðu dugað

Meðaltal af sætum bitum á gest fyrir utan fermingartertu, kransaköku og Rice kransaköku= 3 bitar

Ég myndi þó ekki mæla með því að hafa kökurnar neitt minni en uppskriftirnar segja til um viljið þið halda tignarlegu og fallegu útliti þeirra. Það er líka svo gott að eiga smá afgang dagana á eftir :)  

aIMG_5629

Makkarónurnar hafði ég ekki tíma til að baka og keypti tilbúnar frosnar í Stórkaup. Mikið sem þær komu á óvart, voru hver annari bragðbetri og ekki skemmdi þetta fullkomna útlit heldur fyrir, kláruðust upp til agna.

aIMG_5783

Vanillubollurnar keypti ég einnig í Stórkaup, þær voru ódýr kostur og virkilega góðar (stráðum smá flórsykri yfir áður en þær voru bornar fram).

Kökupinnar og bollakökur

Bollakökur og kökupinna útbjó ég sjálf og skreytti í stíl við kökuborðið. Ég gerði súkkulaði bollakökur með vanillu smjörkremi og vanillu kökupinna með bleikum og hvítum súkkulaðihjúp sem ég keypti í Allt í köku, sykurmassablómin útbjó ég sjálf og litaði með gylltu og bleiku matarlitardufti og sykurperlum. Þið getið fundið ýmsar uppskriftir af bæði bollakökum og kökupinnum undir „Uppskriftir“ hér á síðunni.

aIMG_5360

Kransaköku sem og kransakökubita  bjó ég einnig til í stíl við litaþemað og hægt er að finna uppskrift af hvorutveggja hér á síðunni.

aIMG_5522

Fermingartertuna bakaði ég einnig sjálf og var daman snemma ákveðin í því að bjóða upp á „Naked cake“ enda virðist slíkt vera í tísku í dag. Uppskriftina finnið þið hér, Orkedíurnar fékk ég í Hlín blómahús í Mosfellsbæ, gullblöðin á Ali Express og skrautskiltið hjá Hlutprent, allar nánari upplýsingar er að finna undir uppskriftinni sjálfri.

aIMG_5491

Rice Krispies kransakökuna gerði ég líka. Ég geri alltaf töluvert meiri blöndu en flestir sem ég sé að útbúa þessa köku en það sem mér þykir gaman að hafa hana svona háa og tignarlega. Burðarþolið virðist einnig verða betra með þykkari og þjappaðri hringjum svo ég mæli með þið prófið þessa útgáfu.

aIMG_5573

Nammibar

Hérna vorum við í raun með allt of mikið í hverri sort og um 2/3 voru enn afgangs í hverri nammikrús en fylla þurfti reglulega á poppið. Okkur fannst bara ekki fallegt að stilla þessu upp nema með fullum skálum svo hér verður til nóg af nammi fram yfir páska. Það fóru hins vegar um 4 pokar af hvorri tegund af poppinu (Maxi popp venjulegt og Maxi popp með karamellu).

aIMG_5349

Við reyndum að hafa litina af namminu í stíl við fermingarþemað sem var gyllt, hvítt og bleikt en þar sem kökur voru brúnleitar að hluta fékk brúnt nammi einnig inngöngu á barinn :) Nammibox, nammipokar, Candy Bar skiltið og nammiskeiðar var allt pantað á Ali Express.

aIMG_5323

Kúlusúkk og snjóbolta keypti ég hjá Kólus sælgætisgerð og koma þessar krúsir úr IKEA, borðar og merkimiðar frá Sösterne Grene.

aIMG_5318

Við vorum bæði með venjulegt Maxi popp og síðan Maxi popp með karamellu og þessar tvær skálar þurfti að fylla reglulega á. Skálarnar fékk ég að láni en ég hef séð svipaðar í Hagkaup.

aIMG_5342

Bleikt Smarties keyptum við í Big Box eftir að hafa séð umræðu um þá verslun á fermingarvefnum.

aIMG_5321

Frænka mín keypti gull Hershey’s kisses í Boston fyrir mig og voru þeir bæði með möndlum sem og hreinu mjólkursúkkulaði. Ég var þá búin að panta sérmerkta límmiða á botninn á þeim hjá Label Creations og voru þeir bæði ódýrir og fljótir að berast inn um lúguna (tók c.a viku frá því ég pantaði). Skál keypt í USA og fengin að láni hjá vinkonu.

aIMG_5855

Á nammibarnum var svo ein skál með jarðaberjakaramellum sem ég keypti á nammibar Krónunnar og önnur með mini sykurpúðum sem ég fékk einnig þar.

aIMG_5339

Drykkir

Ég steingleymdi að taka þetta saman en við vorum með Pepsi, Pepsi Max, Appelsín, Kristal og Límónukristal allt í litlum dósum og höfðum í fötum fullum af ís. Keyptum einn kassa af hverju (24 stk) og það var alveg einhver afgangur en okkur öllum finnst dósagos best svo þetta mátti vel vera skammtað rúmlega.

aIMG_5795

Ribena djús blönduðum við líka í stóra krukku með krana saman við 4 lítra af Lime Kristal og fylltum 1 x á svo ég myndi segja 1x Ribena flaska og 3 x 2 lítrar af  Límónu kristal ættu að duga. Þetta var mjög vinsælt, sérlega hjá yngri kynslóðinni sem fannst spennandi að skammta sér sjálf í glas/flösku.

aIMG_5743

Kaffi var c.a 12 uppáhellingar og hver er um 8  bollar svo hellt var upp á eina 96 bolla af kaffi en einhverju var nú hellt úr hitakönnunum í lok veislu.

Veisluborðið

Tékklisti

Hér fyrir neðan er að finna það sem ég punktaði hjá mér í undirbúningi fermingarinnar. Það má vel vera ég sé að gleyma einhverju og myndi ég segja þessi listi verði breytilegur og ég komi til með að bæta við hann í framtíðinni.

  • Velja fermingardagsetningu
  • Útbúa gestalista
  • Senda út boðskort (við pöntuðum hjá Pixel og komu þau mjög vel út).
  • Bóka sal (ef veislan er ekki haldin heima).
  • Bóka ljósmyndara (Gott að fara í myndatökuna um mánuði fyrr, fara í prufugreiðslu og förðun í leiðinni ef þess er óskað. Með þessu móti er minna álag þegar nær dregur og hægt að útbúa myndabók eða framkalla myndir fyrir veisluna. Við vorum með Bent hjá Benzo ljósmyndun og myndirnar hefðu ekki getað heppnast betur).
  • Panta allt skraut (Ef þetta á að vera pantað erlendis frá er gott að vera tímanlega til að losna við óþarfa stúss þegar nær dregur. Við pöntuðum nánast allt á AliExpress og dunduðum okkur með fyrirvara að setja saman pom-poms o.fl.).
  • Panta gestabók, sálmabók, servettur og kerti og láta merkja. Við keyptum áletraða gestabók og sálmabók í Garðheimum en ákváðum að við vildum ekki hefðbundið fermingarkerti né servettur og keyptum slíkt því ómerkt).
  • Ákveða fermingargjöf fyrir fermingarbarnið
  • Velja fatnað á fermingarbarnið (og fjölskylduna). Gott að gera þetta í tíma til að geta farið snemma í myndatöku og haft allt klárt.
  • Panta hár og förðun (í prufu líka ef vill).
  • Ákveða veitingar og kökur (skipuleggja hvað á að bjóða upp á og panta ef þarf).
  • Ákveða fyrirkomulag veislu (t.d hvort foreldrar eða fermingarbarn hafi ræðu/bjóði gesti velkomna, hvernig skuli boðið að ganga til veitinga, stilla upp gjafaborði o.þ.h).
  • Fá aðstoð/þjóna í veislu (mikið gott að geta slakað aðeins á og spjallað við gestina og látið aðra sjá um áfyllingu af veitingum).
  • Kaupa lifandi blóm til skreytinga. Við keyptum öll blóm á föstudegi, fermdum á sunnudegi og geymdum á köldum stað. Þau voru öll dásamlega falleg á fermingardaginn og gott að losna við að þeytast eftir þeim á fermingardaginn sjálfan.

Myndabók

Við hönnuðum og pöntuðum ljósmyndabók hjá Pixel fyrir ferminguna og fannst gestunum gaman að glugga í þær myndir í veislunni, einnig hengdum við myndir á spotta upp á vegg í stofunni.

aIMG_5355

Þar sem daman æfir listskauta með Birninum voru skautarnir að sjálfsögðu hengdir upp á vegg fyrir ofan gestabókina. Þar var einnig lítið box og miðar þar sem gestir máttu skrifa það sem þeir héldu Harpa myndi verða þegar hún yrði stór. Hugmyndina fékk ég í fermingu hjá Gyðu vinkonu minni og þetta ásamt gestakveðjunum var gaman að lesa eftir veisluna.Bland í poka

Annað

Hér er að finna skemmtilegar umræður fermingarforeldra og margar nytsamlegar hugmyndir Fermingar undirbúningur og hugmyndir.

Leiðbeiningamiðstöð heimilanna leiðbeinir einnig með hugmyndir og magn af veitingum.

Hér fyrir neðan eru síðan myndir úr ýmsum áttum úr veislunni.

Blóm

Alls konar blóm urðu fyrir valinu og var gaman að hafa fersk blóm í vösum um allt húsið.

aIMG_5560

Litla systir að skrifa miða til Hörpu sinnar, hún segir hún eigi eftir að verða dýralæknir þegar hún verður stór.

Fermingartertan

Kökuhlaðborðið

aIMG_5573

Fallega fermingarstelpan mín

aIMG_5584

Smáréttadiskar fá Ali Express, gafflar úr Partýbúðinni, servettur úr Epal.

aIMG_5724

Eyjan okkar var undirlögð fyrir smáréttina. Hún er 3,3 m á lengd og fann ég einmitt nægilega stóran dúk í Rúmfatalagernum sem náði yfir hana alla! Plexistandinn gaf vinkona mín mér fyrir einhverju síðan eftir að hafa keypt hann fyrir brúðkaupið sitt og loksins gafst tilefni til að nota hann.

aIMG_5769

Hvítu viðarstafina pantaði ég á Ali Express og límdi niður með kennaratyggjói á standinn en raðaði bara á borðið.

Jæja, ætli þetta sé ekki lengsta færsla sem ég hef sett inn og vonandi komast upplýsingar og hugmyndir  vel til skila. Ef þið eruð með frekari fyrirspurnir ekki hika við að senda mér línu á gotteri@gotteri.is.

Annars er að finna ítarlega umfjöllun um veisluna í síðasta tölublaði Vikunnar fyrir áhugasama!

Fermingarterta með gulláferð

aIMG_5461

Nú er komin rúm vika frá fermingu frumburðarins og við tók undirbúningur fyrir komu þriðju skottunnar á heimilið sem ætlar að láta sjá sig í aprílmánuði. Það hefur því ekki gefist mikill tími til að sinna öðru en því en hér kemur uppskrift af þessari dásamlega góðu fermingartertu sem samanstendur af brownie botni, jarðaberjamús, svampbotnum og rjóma….já og við skulum ekki gleyma gullblöðum sem óhætt er að borða!

aIMG_5409

Hún er mjög svipuð og margra laga jarðaberjatertan sem ég útbjó í fyrra fyrir útskrift systurdóttur minnar enda er erfitt að standast svona súkkulaði – jarðaberja- og rjómablöndu.

Á morgun kemur Vikan síðan út og þar getið þið fundið ítarlega umfjöllun um veisluna, veitingar og annað skemmtilegt. Ég er að sama skapi að vinna í tékklista fyrir fermingar út frá þessari reynslu og vonandi verður hann klár um helgina svo ég geti gefið þeim sem eiga eftir að ferma góð ráð.

aIMG_5573

Fermingarterta með gulláferð (uppskriftin dugar fyrir þrjú form, 6,8 og 12´´)

Hér þarf að notast við smelluform og kökuplast (fæst í Allt í köku en einnig oft hægt að fá að kaupa í bakaríum). Eftir að kökubotnar hafa verið bakaðir þarf að klæða smelluformið að innan með kökuplasti og raða lögunum saman inn í því. Mikilvægt er að vera einnig með pappaspjöld fyrir tvo minni botnana og „burðarsúlur“.

Brownie botnar

  • 450 gr smjör
  • 285 gr sykur
  • 210 gr púðursykur
  • 6 egg
  • 600 gr suðusúkkulaði
  • 1 tsk salt
  • 5 msk bökunarkakó
  • 225 gr hveiti
  • 7 msk volgt vatn
  • 4 tsk vanilludropar
  1. Þeytið saman sykur (báðar tegundir) og smjör þar til létt og ljóst.
  2. Bætið eggjunum saman við einu í einu og skafið á milli.
  3. Bræðið súkkulaðið og hrærið í blönduna.
  4. Setjið þurrefnin út í og loks vatnið og vanilludropana.
  5. Klæðið smelluform með bökunarpappír í botninn og spreyið PAM á hliðarnar.
  6. Skiptið deiginu á milli formanna svo allir botnarnir verði svipaðir á þykkt.
  7. Bakið í 175° heitum ofni í um 30-35 mínútur eða þar til prjónn kemur út með smá kökumylsnu á endanum (ekki blautu deigi).
  8. Kælið og geymið þar til allt annað er tilbúið.

Svampbotnar

  • 6 egg
  • 570 gr sykur
  • 375 gr hveiti
  • 3 tsk lyftiduft
  • 300 ml vatn
  • 150 gr smjör
  1. Þeytið saman sykur og egg þar til létt og ljóst.
  2. Hitið saman vatn og smjör og leggið til hliðar.
  3. Blandið hveiti og lyftidufti saman við eggjablönduna og loks vatni og smjöri þegar bráðið.
  4. Skiptið niður í formin 3.
  5. Bakið við 200°C í um 15 mínútur eða þar til botnarnir verða gullinbrúnir.
  6. Kælið og skiptið síðan hverjum botni í tvennt með kökuskera, geymið þar til síðar.

Jarðaberjamús

  • 15 gelatín blöð
  • 230 gr sykur
  • 1 kg fersk jarðaber (maukuð í blandara)
  • 5 msk sítrónusafi
  • 1 l rjómi (þeyttur)
  1. Leggið gelatínblöðin í bleyti í um 1 líter af köldu vatni.
  2. Hitið saman maukuð berin, sítrónusafann og sykurinn þar til heitt (alls ekki sjóða).
  3. Bætið gelatíni saman við berjablönduna, hafið hana á vægum hita og hrærið vel á milli hvers blaðs.
  4. Hitið þar til vel blandað (um 5 mín) og færið þá yfir í skál og leyfið að ná stofuhita. Því næst má kæla blönduna í um klukkustund en hræra vel í henni á milli.
  5. Mikilvægt er að vakta blönduna vel og um leið og hún fer að verða hlaupkennd má blanda henni saman við þeytta rjómann með sleif og smyrjið ofan á brownie botnana. Kælið og leyfið músinni að taka sig áður en haldið er áfram (amk 1 klst).

Þeyttur rjómi og áframhaldandi samsetning

  • 1 l þeyttur rjómi á milli svampbotnanna
  1. Stífþeytið rjómann og haldið því næst áfram með samsetninguna.
  2. Fyrri svampbotinn settur ofan á jarðaberjamúsina, því næst þeyttur rjóminn og loks seinni svampbotninn.
  3. Nú þarf að plasta kökurnar og kæla í að minnsta kosti 4 klukkustundir eða yfir nótt.
  4. Smelluforminu er þá smeygt af og plastið fjarlægt. Kakan ætti hér að vera stíf og fín.
  5. Hér þarf að hjúpa hverja köku með þunnu lagi af hvítu smjörkremi, stafla henni með stoðum og skreyta að vild. Að þessu sinni notaði ég Orkedíur, rósir, brúðarslör og litlar makkarónur sem ég keypti frosnar í Stórkaup (litaði ljósar makkarónur með gulldufti) ásamt því sem ég pantaði „eadable gold sheets“ á Aliexpress og föndraði þau óreglulega yfir dökka súkkulaðibotninn. Til að setja punktinn yfir i-ið stakk ég gullskrauti með nafni fermingarbarnsins frá Hlutprent efst á kökuna og vakti það mikla lukku.

Kakan verður skemmtilega röndótt að innan, brún, bleik og hvít. Gullblöðin voru örþunn og í raun ekkert bragð af þeim, voru meira þarna fyrir útlitið.

aIMG_5458

 

Kransakökubitar

Hér kemur uppskrift af dásamlegum kransakökubitum sem skreyttir voru í stíl við þemað í fermingarveislu dóttur minnar um síðustu helgi.

Sáraeinfalt er að útbúa svona bita sjálfur og töluvert ódýrara en að kaupa þá tilbúna, hvet alla til að prófa og ég myndi segja það þyrfti ekkert sérstak tilefni til. Þeir eru frábærir með kaffinu hvenær sem er og hægt að frysta og taka nokkra út þegar gesti ber að garði.

Mæli síðan með að þið leyfið hugmyndarfluginu að ráða þegar þið skreytið bitana, þeir þurfa alls ekki að vera skreyttir á „gamla mátann“.

Kransakaka

Uppskriftin er frekar stór þar sem ég var að gera þá fyrir veislu og lítið mál fyrir ykkur að útbúa aðeins hálfa uppskrift til að prófa.

Kransakökubitar (um 50 stk)

  • 600 gr ODENSE Marcipan (þetta bleika)
  • 300 gr sykur
  • 4 eggjahvítur

  1. Brytjið marsipanið niður í nokkra hluta og setjið í hrærivélarskál með sykrinum, blandið vel saman með K-inu.
  2. Hrærið eggjahvíturnar saman og setjið í nokkrum skömmtum saman við marsipanblönduna. Blandan þarf að vera það blaut í sér að hægt sé að sprauta henni með stút svo hún er töluvert blautari en þegar kransakaka er útbúin.
  3. Sprautið toppa með stút 1M frá Wilton og bakið við 210°C í um 9-10 mínútur eða þar til topparnir verða örlítið brúnir á köntunum.
  4. Kælið og dýfið síðan ½ topp í brætt súkkulaði að eigin vali og skreytið með kökuskrauti.

Við röðuðum bitunum síðan í kringum kökuna sjálfa og settum innan í hana líka.

Kransakaka

Kransakaka

Síðastliðinn sunnudag var frumburðurinn okkar hún  Harpa Karin fermd. Ég hafði aðeins einu sinni áður bakað kransaköku og það fyrir sjö árum síðan þegar systurdóttir mín fermdist. Þá bakaði ég í formum en til þess að ná henni jafn stökkri allan hringinn ákvað ég nú að notast við ráð Örvars bakarameistara og varð útkoman svona ljómandi fín.

Veislan í heild sinni kemur til með að birtast í Vikunni í næstu viku svo fyrir þá sem vilja góðar hugmyndir fyrir veisluborðið þá mæli ég með að þið nælið ykkur í eintak. Ég kem síðan til með að setja inn fleiri hugmyndir og góð ráð hér á bloggið þegar tími gefst til á næstunni.

Kransakaka (15-18 hringir)

  • 1,5 kg ODENSE Marcipan (þetta bleika)
  • 750 gr sykur
  • 3 eggjahvítur

Odense marsipan

  1. Brytjið marsipanið niður í nokkra hluta og setjið í hrærivélarskál með sykrinum, blandið vel saman með K-inu.
  2. Hrærið eggjahvíturnar saman og setjið í nokkrum skömmtum saman við marsipanblönduna. Ef hvíturnar eru stórar þarf mögulega ekki að nota þær allar, setjið því minna í einu og passið að blandan verið ekki of blaut.
  3. Gott að taka síðan blönduna og hnoða aðeins í höndunum, plasta vel og kæla í amk 4 klst eða yfir nótt.
  4. Rúllið út jafnar lengjur um 1,5cm í þvermál, sláið með þykkhöndinni á ská ofan á hverja lengju til að mynda örlítið þríhyrndara lag og mælið síðan hringina út með reglustiku. Fyrst 10cm og síðan bætið 3cm við hvern hring (10,13,16 o.s.frv). Það fer síðan aðeins eftir þykktinni hversu mörgum hringjum þið náið (ég náði 15 hringjum en hefði getað náð fleiri).
  5. Raðið á bökunarpappír og bakið við 200°C í um 13 mínútur (ofnar eru misjafnir svo hér þarf bara að fylgjast vel með og taka hringina út þegar þeir eru aðeins farnir að dökkna).
  6. Kælið hringina vel, sprautið glassúr yfir og raðið saman. Einnig er hægt að frysta hringina og raða þeim saman síðar en þá verður kakan seigari en ella.
  7. Skreytið að vild, ég bjó til súkkulaðiskraut úr afgangs súkkulaði, límdi slaufu, pappaprik og merkta kossa, límt á með bræddu súkkulaði sem aðeins hefur fengið að þykkna.

Kransakaka

Glassúr fyrir kransaköku

  • 1 eggjahvíta
  • ½ tsk sítrónusafi
  • Flórsykur (fer eftir stærð eggjahvítu hversu mikill)

  1. Þeytið allt saman og bætið flórsykri jafnt og þétt saman við eggjahvítublönduna þar til blandan fer að þykkna og verða teygjanleg.
  2. Sprautið þá undir neðsta hringinn og festið hann á disk. Því næst má sprauta boga á hvern hring og leggja næsta ofan á áður en glassúrinn harðnar, þannig festist kakan nægilega vel saman.