Partýpopp

Stundum er allt í lagi að leyfa ímyndunaraflinu og einfaldleikanum að njóta sín!

Frá því ég man eftir mér hef ég elskað að blanda saman poppi, lakkrís og Smarties, það er bara eitthvað við þessa blöndu sem er fáránlega gott :)

Partýpopp

  • 1 poki örbylgjupopp
  • 1 poki lakkrísreimar (klipptar niður)
  • 2 litlir pakkar af Smarties

Throphy Cupcakes – Neopolitan

Seattle-vinkonur mínar komu á ferðafund til mín um daginn fyrir komandi húsmæðraorlof okkar í maí. Það var auðvitað ekkert annað í stöðunni en útbúa eitthvað sem tengir okkur við þennan dásamlega stað svo úr varð að ég prófaði L O K S I N S að baka þessar bollakökur. Ég veit ekki hversu oft við mæðgur kíktum á Trophy Cupcakes í University Village og nældum okkur í eina Neopolitan Cupcake.

Tinna vinkona á bókina frá þeim og fékk ég hana lánaða til að geta útbúið þessa dásemd.

Ég get svo svarið það að þær brögðuðust nákvæmlega eins og í búðinni og þið hreinlega verðið að prófa!

Súkkulaði bollakökur

Uppskriftin gefur um 20-24 bollakökur. Ég notaðist við 1M stút frá Wilton og sprautaði fyrst hvítu smjörkremi á kökuna og því næst bleika jarðaberjasmjörkreminu. Marglitu kökuskrauti er stráð yfir og kirsuber sett á toppinn.

  • 320 gr hveiti
  • 85 gr bökunarkakó
  • 2 ½ tsk lyftiduft
  • 1 ½ tsk matarsódi
  • ¾ tsk salt
  • 3 egg
  • 300 ml bolli mjólk
  • 110 ml matarolía
  • 1 msk vanilludropar
  • 380 gr sykur
  • 200 ml sjóðandi vatn
  1. Hitið ofninn 175°C.
  2. Sigtið saman hveiti, kakó, lyftiduft, matarsóda og salt og leggið til hliðar.
  3. Blandið eggjum, mjólk, olíu og vanillu saman í hrærivélinni.
  4. Bætið þá sykrinum og öllum þurrefnunum saman við. Hrærið á lágum hraða til að byrja með en síðan á meðalhraða í um tvær mínútur eða þar til deigið er orðið slétt og fallegt.
  5. Blandið að lokum sjóðandi vatninu varlega saman við deigið með sleif þar til það verður slétt að nýju. Deigið á að vera þunnt.
  6. Leyfið deiginu að hvíla í 15 mínútur og hrærið þá aðeins upp í því að nýju.
  7. Fyllið ¾ hluta af bollakökuformunum með deigi og bakið þar til prjónn kemur út með smá kökumylsnu (ekki blautu deigi) eða í um 20 mínútur.
  8. Kælið bollakökurnar og útbúið kremið á meðan.

Vanillu- og jarðaberja smjörkrem

  • 500 gr smjör við stofuhita
  • 900 gr flórsykur (sigtaður)
  • 2 tsk vanilludropar
  • ¼ tsk salt
  • 200 gr fersk maukuð jarðaber (eða jarðaberjasulta)
  • Marglitt kökuskraut
  • Niðursoðin kirsuber með stönglum
  1. Þeytið smjörið þar til létt og ljóst.
  2. Bætið flórsykrinum saman við í litlum skömmtum og blandið á lágum hraða.
  3. Að lokum fara vanilludroparnir og saltið saman við blönduna og kremið þeytt í nokkrar mínútur þar til létt og ljóst og skafið nokkrum sinnum niður á milli.
  4. Takið rúmlega 1/3 af vanillukreminu til hliðar og setjið jarðaberjamaukið saman við tæplega 2/3 af kreminu og blandið vel.
  5. Ég notaði stút 1M frá Wilton og byrjaði á því að sprauta jarðaberjakreminu í rúman hring og síðan vanillukreminu þar ofan á. Þá er kökuskrauti stráð yfir og kirsuber sett á toppinn.

Þetta jarðaberjasmjörkrem…..namm! Ég notaði fersk, maukuð jarðaber, held það gefi enn betra bragð en sultan.

Svo er hún svo falleg að ekki skemmir það nú fyrir!

Skólabollur

aIMG_1260
Ég útbjó þessar bollur einn sunnudagsmorguninn í febrúar. Stelpurnar voru mjög hrifnar af þeim og höfðu þær með sér í nesti út vikuna (við settum þær í frystinn og tókum jafnóðum út).

Það er svo auðvelt að baka vel af öllu svona og eiga síðan í frystinum. Við hitum oft aðeins í ofninum aftur og þá verða þær alltaf eins og nýbakaðar og bestar eru þær með smjöri og osti.

Skólabollur

  • 120 gr smjör
  • 3,5 dl mjólk
  • 1 pk þurrger
  • 1 dl púðursykur
  • 640 gr heilhveiti
  • ½ tsk salt
  • 2 dl Til hamingju fimm korna blanda
  • Egg til penslunar
  1. Bræðið smjör við vægan hita og hitið mjólkina út í þar til ylvolgt (passa að hita ekki of mikið til að drepa ekki gerið). Blandið þurrgerinu í volga blönduna og og leyfið að gerjast í nokkrar mínútur.
  2. Setjið öll þurrefnin saman í hrærivélarskálina og hellið mjólkurblöndunni saman við og hnoðið með króknum. Stundum þarf að bæta smá meira af heilhveiti saman við en best er að reyna að vinna deigið eins blautt og hægt er fyrir hefun því þá verður auðveldara að hnoða það í bollur.
  3. Hjúpið skál með matarolíu og veltið deiginu upp úr henni, setjið því næst rakan klút/plastfilmu yfir skálina og leyfið deiginu að hefast í um 45 mínútur.
  4. Hnoðið í bollur (c.a 20-22 stk), raðið á bökunarpappír, setjið klútinn aftur yfir og leyfið að hefast í um 30 mínútur.
  5. Hitið ofninn 220°C, penslið bollurnar með eggi og bakið í um 10 mínútur eða þar til bollurnar verða gylltar.

Brjálæðislega góð brownie

Eins og þið hafið væntanlega tekið eftir þá elska ég að leika mér með kökumix!

Fyrir námskeið um daginn ákvað ég að gera tilraun með Chocolate Fudge Brownie Mix frá Betty Crocker með Caramel súkkulaði og pekanhnetum. Hún heppnaðist mjög vel og rann ljúflega ofan í mannskapinn í kaffinu á námskeiði í nútímalegum kökuskreytingum.

Ég notaði 2 x Brownie Mix, blandað samkvæmt leiðbeiningum á pakka og notaðist við 30 x 40 cm stórt ferkantað kökuform.

Áður en ég hellti því í formið saxaði ég 3 stk Caramel súkkulaðistykki og 100 gr af pekanhnetum og hrærði saman við deigið þegar það var tilbúið. Gott er að klæða formið með bökunarpappír og spreyja á pappírinn með matarolíuspreyi (þá er auðveldara að losa kökuna frá þegar hún er skorin í bita).

Kakan er bökuð samkvæmt leiðbeiningum á pakka en gæti þurft aðeins lengri tíma þar sem um tvöfalda uppskrift er að ræða. Best þykir mér að stinga prjóni í kökuna og þegar það kemur smá kökumylsna á prjóninn en ekki blautt deig þá er kakan tilbúin. Síðan þarf að kæla kökuna vel áður en henni er lyft upp úr forminu og skorin í bita.

Dásamlega fljótleg og bragðgóð lausn á kaffitímanum!

Pekanhnetu bananabrauð

Ég var á vinnustofu í HR um daginn og í kaffinu var boðið upp á dásamlega gott bananabrauð með hnetukurli ofan á. Ég fékk nú ekki uppskriftina en fór beint heim og „gúglaði“ fram og tilbaka og endaði á að finna þessa uppskrift á Tutti Dolci og útfærði með örlitlum breytingum.

Þessi uppskrift er alveg dásamleg og svo gott að finna fyrir hnetumulningnum ofan á brauðinu.

Pekanhnetu bananabrauð

Brauð

  • 225 gr hveiti
  • 40 gr heilhveiti
  • 1 tsk lyftiduft
  • 1 tsk matarsódi
  • ½ tsk salt
  • 1 tsk kanill
  • ¼ tsk negull
  • 2 stappaðir bananar (vel þroskaðir)
  • 50 ml maple sýróp
  • 3 msk púðursykur
  • 30 gr smjör (brætt)
  • 100 ml buttermilk (mjólk látin standa með 1 tsk af sítrónusafa í 5 mínútur)
  • 1 egg
  • 1 tsk vanilludropar

Pekanhnetutoppur

  • 110 gr Til hamingju pekanhnetur (saxaðar gróft niður)
  • 3 msk púðursykur
  • 3 msk hveiti
  • ½ tsk kanill
  • 3 msk bráðið smjör
  1. Blandið báðum tegundum af hveiti, lyftidufti, matarsóda, salti, kanil og negul saman í skál og leggið til hliðar.
  2. Setjið stappaða banana, sýróp, púðursykur, smjör, buttermilk, egg og vanilludropa í hrærivélarskálina og blandið rólega saman.
  3. Því næst fara þurrefnin saman við í litlum skömmtum og gott að skafa vel niður á milli.
  4. Fyrir pekanhnetutoppinn þá eru öll hráefnin sett saman í skál og blandað saman í „kröst“. Þá er blöndunni dreift jafnt yfir deigið.
  5. Smyrjið formkökuform vel og bakið við 175°C í 30 mínútur, setjið þá álpappír yfir (laust) og bakið í um 30 mínútur í viðbót eða þar til prjónn kemur hreinn út.

Ef ykkur vantar eitthvað gott með kaffinu þá mæli ég svo sannarlega með að þið prófið þessa uppskrift!

Blaut bollakaka á mínútu

Ég hef lengi ætlað að prófa svokallaða „Lava cake“ í örbylgjuofninum. Hef hins vegar ekki haft trú á því að hægt sé að baka köku með þessu móti svo góð sé en afsannaði þá kenningu mína klárlega í dag. Þessi kaka galdraðist fram á örfáum mínútum og er algjör snilld ef ykkur langar í eitthvað gómsætt og hafið ekki mikinn tíma. Ég útbjó uppskrift sem hentar í tvo bolla en auðvitað má helminga hana ef ykkur langar bara í einn bolla eða til dæmis tvöfalda hana ef gera á bolla fyrir fjóra.

Blaut bollakaka á mínútu

Þessi uppskrift gefur tvo bolla af dásamlegri blautri súkkulaðiköku

  • 60 gr smjör
  • 80 gr suðusúkkulaði
  • 40 gr sykur
  • 1 egg
  • 40 ml mjólk
  • 40 gr hveiti
  1. Bræðið saman smjör og suðusúkkulaði í litlum skaftpotti eða í örbylgjuofni.
  2. Hrærið sykurinn og eggið saman við með písk eða gaffli þar til vel blandað.
  3. Því næst fer mjólkin saman við og að lokum hveitið, hrærið vel þar til kekkjalaust.
  4. Spreyið tvo bolla með matarolíuspreyi, skiptið deiginu niður og hitið einn bolla í einu í örbylgjuofninum á hæstu stillingu í 1 mínútu og 10 sekúndur.

Ég prófaði nokkrar tilraunir með mismunandi tíma og kökur sem voru 1 mín og 20-30 sek voru líka dásamlegar, mér fannst bara gott að hafa þessa í blautari kantinum. Örbylgjuofnar eru þó misjafnir í styrk svo prófið endilega einn bolla og aukið eða minnkið tímann með seinni bollann ef þið viljið meira eða minna bakaða köku. Kælið kökuna í um 5 mínútur og berið fram með ískúlu og heitri karamellusósu (sjá uppskrift hér að neðan).

Kakan lyftir sér alveg upp á brúnina á bollanum og sígur síðan aðeins aftur þegar hún er tekin úr örbylgjuofninum og skilur þannig akkúrat eftir pláss fyrir eina góða ískúlu og karamellusósu.

Litlu krúttlegu múmínbollarnir mínir fengu semsagt nýtt hlutverk í dag og grunar mig að ég eigi eftir að prófa að baka í þeim aftur síðar. Ég er nefnilega viss um að allt bragðast betur í fallegum bolla!

Karamellusósa

  • 2 karamellur með sjávarsalti frá Konnerup & Co
  • 2 tsk rjómi
  1. Hitið karamellur og rjóma saman í potti við meðalháan hita þar til þykk sósa hefur myndast, bætið örlítið meira af rjóma saman við ef þið viljið þynnri sósu.

Ég hreinlega get ekki mælt nægilega vel með þessum dásamlegu karamellum, þær eru svoooooooo mjúkar og bragðgóðar að ég hef ekki kynnst öðru eins! Ég fékk þær að gjöf en komst að því þær fást í versluninni BAST í Kringlunni og vonandi bráðum í einhverri verslun hér í Mosfellsbænum svo ég þurfi ekki að fara alla leið í Kringluna til að endurnýja birgðirnar :)

Starbucks sítrónukaka

Þegar ég bjó í Seattle pantaði ég mér oftar en ekki sneið af Lemon pound cake á Starbucks ef það var ekki Birthday Cake Pop, Bacon Breakfast Sandwich eða Frappucchino :)
Þar sem við erum nokkrar vinkonurnar á leið í húsmæðraorlof þangað í maí fór ég að hugsa um allt sem við þyrftum að gera og borða….já borða! Það er nefnilega æði margt sem ég sakna að geta ekki keypt mér dags daglega, líkt og þessi dásamlega sítrónukaka.

Ég googlaði þessa uppskrift og sá að það eru til æði margar Copycat síður sem bjóða upp á hinar ýmsu Starbucks uppskriftir og þetta líklega bara sú fyrsta sem ég ætla að prófa. Hér er hún að minnsta kosti fyrir ykkur að njóta!

Kakan

  • 3 egg
  • 190 gr sykur
  • 60 gr smjör (við stofuhita)
  • 1 tsk vanilludropar
  • 2 tsk sítrónudropar
  • 3 msk sítrónusafi
  • 210 gr hveiti
  • 1 tsk lyftiduft
  • ½ tsk matarsódi
  • ½ tsk salt
  • 100 ml matarolía (ljós)
  • Rifinn börkur af einni sítrónu
  1. Þeytið saman egg, sykur og smjör þar til létt og ljóst.
  2. Bætið þá vanillu- og sítrónudropum saman við ásamt sítrónusafa.
  3. Því næst fara þurrefnin saman við og blandað rólega saman þar til deigið verður slétt og fallegt.
  4. Að lokum er matarolíunni og sítrónuberkinum blandað saman við og hrært vel.
  5. Smyrjið formkökuform vel eða notið matarolíusprey og bakið í 170°C heitum ofni í 40-45 mínútur eða þar til prjónn kemur út með engri kökumylsnu.

Sítrónuglassúr

  • 250 gr flórsykur
  • 3-4 msk nýmjólk
  • 1 tsk sítónudropar

Blandið öllu saman í skál þar til slétt og hellið/smyrjið yfir kökuna.

Frábærlega flippuð Flipperkaka

Í dag er Öskudagurinn og er skemmtileg hefð hér í Leirvogstunguhverfinu að börnin ganga í hús og syngja fyrir nammi síðdegis. Enginn þarf að fara úr hverfinu sínu og allir koma glaðir heim með fulla poka af góðgæti. Ég verð að segja að hvergi er betra að búa en hér í „sveitinni“ þar sem allir eru alltaf tilbúnir að taka þátt í svona skemmtilegheitum.

Við erum líka nokkrar mömmur sem höfum tekið okkur saman undanfarin ár og boðið öllum stelpunum í bekknum hjá miðjunni minni í Öskudagspartý að loknu nammirölti. Þá koma allar stelpurnar í bekknum saman, fá heimabakaða pizzu ala Lillý, köku og gotterí og horfa síðan á mynd.

Ég hef tekið að mér kökugerð sem kemur kannski ekki á óvart og í dag ákvað ég að prófa eitthvað skemmtilega flippað. Þar sem ég ELSKA Flipper nammi ákvað ég að búa til eitthvað einfalt en óhefðbundið og þetta varð útkoman, svona frábærlega flippuð Flipperkaka!

Kakan er 1 x Betty Crocker Devils Food Cake mix, skipt í 2 x 20 cm form. Súkkulaðismjörkrem er sett á milli og vanillusmjörkrem notað í skreytinguna að utan (hvítt grunnlag og svo alls konar litir dregnir saman yfir grunnlagið).

Ég setti stóru Flipperana á grillprik sem ég síðan braut af og stakk í kökuna. Stelpurnar eru 12 í bekknum og það rétt hafðist að koma 12 Flipperum hringinn. Síðan setti ég minni Flippera hringinn í kringum kökuna og sykurperlu á milli þeirra líkt og þeir væru að leika með bolta.

Já krakkar mínir, það þarf svo sannarlega ekki alltaf að vera flókið, ekki einn einasti sprautustútur notaður og kremið má vera skemmtilega ójafnt og einhvern veginn svo lengi sem það er nógu marglitað :)

Mæli með þið prófið! Þetta sló svo sannarlega í gegn hjá stelpunum í 3ÁF í Varmárskóla í dag :)

 

Bolla bolla

Í síðustu viku sýndi ég hvernig baka ætti vatnsdeigsbollur á Instastory hjá Gott í matinn, matargerðarlínu MS. Ég gerði tvær mismunandi fyllingar, aðra jarðaberja og hina súkkulaði og get ég ekki gert upp á milli hvor mér fannst betri.

Hér fyrir neðan getið þið fundið uppskriftirnar í máli og myndum.

Vatnsdeigsbollur

  • 125 gr smjör frá Gott í matinn
  • 230 ml vatn
  • 150 gr hveiti
  • ½ tsk salt
  • 1 tsk lyftiduft
  • 2 egg
  1. Hitið ofninn 185°C.
  2. Bræðið smjörið í potti og hellið vatninu þá saman við, hitið að suðu og leyfið síðan hitanum að rjúka aðeins úr.
  3. Blandið saman hveiti, lyftidufti og salti og hrærið saman við smjörblönduna með sleif þar til kekkjalaus deigkúla myndast í pottinum..
  4. Pískið saman eggin í skál og leggið til hliðar.
  5. Flytjið deigkúluna yfir í hrærivélarskál með K-inu. Leyfið mesta hitanum að rjúka úr með því að hræra deigið á lægsta hraða stöku sinnum í um 10 mínútur.
  6. Bætið þá eggjablöndunni saman við í litlum skömmtum og skafið niður í milli. Deigið þarf að vera nægilega þykkt til að það leki ekki niður þegar á plötuna er komið svo skiljið frekar smá eftir af eggjablöndunni fremur en að fá of þunnt deig en venjulega er hægt að nota bæði eggin (ekki nema þau séu mjög stór).
  7. Notið skeiðar eða sprautupoka og skiptið niður í 16-18  bollur á 2 bökunarplötum íklæddum bökunarpappír.
  8. Bakið í 20-25 mínútur og alls ekki opna ofninn fyrr en að 15 mínútum liðnum í það minnsta því annars er hætta á að bollurnar falli.
  9. Kælið og útbúið glassúr og fyllingu á meðan. Athugið að nóg er að útbúa aðra hvora fyllinguna fyrir þennan fjölda af bollum eða minnka hvora um sig um helming.

bolla

Jarðaberjafylling

  • 400 ml rjómi frá Gott í matinn
  • 2 msk sykur
  • 250 gr fersk og vel stöppuð jarðaber (eða maukuð í blandara)
  1. Þeytið saman sykur og rjóma.
  2. Vefjið stöppuðum jarðaberjum saman við rjómann og sprautið á hverja bollu.

Súkkulaðifylling

  • 400 ml rjómi frá Gott í matinn
  • 200 gr Heslihnetusmjör
  1. Þeytið rjómann.
  2. Vefjið súkkulaðismjörinu saman við blönduna og sprautið á hverja bollu (leyfið marmaraáferðinni að halda sér svo ekki hræra of mikið).

Súkkulaðiglassúr

  • 100 gr smjör frá Gott í matinn (brætt)
  • 350 gr flórsykur
  • 2 msk bökunarkakó
  • 2 tsk vanilludropar
  • 2 msk kaffi
  • 2 msk vatn

Setjið öll hráefnin saman í skál og pískið saman, smyrjið á bollurnar með skeið/litlum spaða.

aIMG_1931

Gaman að setja kökuskraut, hnetukurl eða annað lítið sælgæti á toppinn til skrauts.

 

Vatnsdeigs-vanillulengjur

Þessar lengjur prófaði ég í fyrra og var svo sein að setja inn fyrir bolludaginn að ég ákvað bara að að geyma uppskriftina. Mig langaði svo að prófa að gera lengjur þar sem það er stundum pínu klaufalegt að borða bollu með rjóma og allt fer út um allt :) Hugsaði  með mér það gæti verið sniðugt að hafa lengjur og það var alveg rétt, mæli klárlega með því!

Myndi reyndar mæla með að gera þær enn mjórri en ég er með þær því þær stækka svo mikið við bakstur.

Vatnsdeigs-vanillulengjur

  • 160 gr smjör
  • 400 ml vatn
  • ½ tsk salt
  • 210 gr hveiti
  • 5 lítil egg (eða 4 stór)
  1. Hitið ofinn 200°C og gerið 2 bökunarplötur með smjörpappír tilbúnar.
  2. Bræðið smjör og hellið vatni út í og hitið að suðu, takið þá pottinn af hellunni og leyfið að rjúka úr blöndunni stutta stund og færið yfir í hrærivélarskál með K-inu.
  3. Setjið öll eggin í skál og pískið saman, setjið til hliðar.
  4. Bætið salti og hveiti saman við smjörblönduna og blandið saman, því næst smá og smá af eggjablöndunni saman við og skafið vel niður á milli.
  5. Setjið deigið í sprautupoka/zip-lock og notist við um 1,5cm stút eða klippið gat á pokann.
  6. Sprautið í lengjur og bakið í um 20-25 mínútur eða þar til lengjurnar eru vel gylltar (ekki opna ofninn á meðan bakað er).

Vanillufylling

  • 1 pk Royal vanillubúðingur blandaður í 400ml mjólk, kældur samkvæmt leiðbeiningum.
  • 500  ml stífþeyttur rjómi

  1. Smyrjið vanillubúðing á hverja lengju og því næst þeyttum rjóma (c.a 2/3 búðingur og 1/3 rjómi á hverri lengju eða eins og þið óskið)

Súkkulaðiglassúr

  • 7 dl flórsykur
  • 4 msk bökunarkakó
  • 3 tsk vanilludropar
  • 3 msk kaffi
  • 2-3 msk vatn
  • 3 msk brætt smjör
  1. Hrærið öllum hráefnunum saman í hrærivélarskálinni þar til slétt og fellt glassúkrem hefur myndast. Smyrjið á hverja lengju að vild.