Elsku litli drengurinn þeirra Máneyjar og Janna fékk fallega nafnið sitt um helgina. Ég föndraði þessa sumarlegu skírnartertu fyrir gullmolann og er hún í grunninn súkkulaðikaka með súkkulaðismjörkremi, eins og svo oft áður.
Máney vildi hafa kökuna í gráum og gulum tónum og í „naked cake“ stíl. Það er hægara sagt en gert að fá ljósgul falleg blóm þar sem mörg gul blóm eru mjög sólargul og jafnvel út í appelsínugult. Ég fékk þetta fallega stóra ljósgula blóm sem kallast Einhöfða Chrysi í blómabúðinni Hlín hér í Mosfellsbæ og skreytti kökuna með samskonar hvítum blómum sem voru minni, brúðarslöri og makkarónum. Nafnaskiltið kom að sjálfsögðu frá Hlutprent og get ég varla gert köku lengur nema hafa svona fallegt skilti á toppnum, það gerir bara svo mikið!
Neðri botninn eru 3 x 20 cm botnar og sá efri 2 x 15 cm botnar (hefði líka mátt vera 3 x 15 cm). Stoðir og pappaspjald er á milli hæða og súkkulaðismjörkrem á milli. Ég sprautaði ramma á hvern botn með hvítu kremi og fyllti inn í með súkkulaðikreminu (svo það sæist ekkert í það).
Til hamingju með fallega nafnið þitt Sævar Máni Jessen!
