Súkkulaðibitakökur eru eitt það allra besta, sérstaklega örlítið volgar með ískaldri mjólk! Þessar súkkulaðibitakökur eru hins vegar teknar upp á æðra stig með leynihráefni sem ég lauma í ansi margar uppskriftir.
Ég vildi gera hrekkjavökukökur fyrir ykkur en langaði líka að prófa þessa uppskrift með súkkulaðidropum svo úr varð að ég útbjó þrefalda uppskrift. Gerði hrekkjavökukökur úr 1/3 og síðan notaði ég dökka súkkulaðidropa í 1/3 og hvíta súkkulaðidropa í 1/3.
Leynihráefnið er gamli góði ROYAL búðingurinn en hann gerir kökurnar svoooo djúsí og góðar að það nær engri átt.
Súkkulaðibitakökur drauma þinna
Grunnuppskrift
- 120 g smjör við stofuhita
- 150 g púðursykur
- 1 tsk vanilludropar
- 1 egg
- 1 pk Royal búðingur (duftið)
- ½ tsk. matarsódi
- ¼ tsk. salt
- 150 g hveiti
Svo er hægt að leika sér með það sem fer saman við……
Hrekkjavökukökur
Hér notaði ég 1 pk Royal karamellubúðing
- 140 g M&M (appelsínugul, brún og græn)
- 20 g hrekkjavöku“sprinkles“
Dökkir súkkulaðidropar eru í kökunum hér að ofan og ljósir í þeim að neðan. Allar þessar týpur voru tjúllað góðar svo ég held ég verði bara að mæla með þið prófið þær allar!
Súkkulaðidropar
Hér notaði ég 1 pk Royal vanillubúðing í hvora uppskrift
- 150 g hvítir eða dökkir súkkulaðidropar
Aðferð
- Þeytið saman smjör og púðursykur.
- Bætið eggi og vanilludropum saman við, skafið niður á milli og þeytið vel.
- Setjið búðingsduftið saman við og loks matarsóda, salt og hveiti.
- Skafið niður á milli og þegar deigið er orðið vel blandað má setja það sem hugurinn girnist saman við með sleif.
- Ég blandaði M&M og kökuskrauti saman við eina uppskrift, hvítum súkkulaðidropum við þá næstu og dökkum súkkulaðidropum við þá þriðju.
- Gott er að kæla deigið í 30-60 mínútur og rúlla því svo í kúlur.
- Rúllið kúfaðri matskeið í kúlu (þarf ekki að vera fullkomin) og raðið á bökunarplötu með smá bil á milli því hún á eftir að fletjast út.
- Bakið við 175°C í 12-15 mínútur eða þar til kantarnir fara að gyllast.
Megið endilega fylgja Gotterí líka á INSTAGRAM
