Í haust fórum við ásamt vinum okkar í helgarferð til Vestmannaeyja. Það var búið að vera lengi á döfinni að fara þangað en einhvern vegin flýgur tíminn alltaf frá manni og sumrin líða allt of hratt. Síðasta sumar gerði það líka svo við ákváðum bara að haustið væri tíminn fyrir þessa ferð og vorum heppin með veður og var þessi ferð dásamleg í alla staði.
Við komum með Herjólfi frá Landeyjarhöfn um kvöldmatarleyti á föstudegi, náðum okkur í pizzu og komum okkur fyrir í sumarhúsinu sem við höfðum leigt hjá VR. Það trónir efst í hæðinni fyrir ofan bæinn með útsýni í allar áttir.
Á laugardeginum var síðan algjör túristadagur hjá okkur. Við vorum búin að ákveða að fara út að borða bæði í hádeginu og um kvöldið og bara njóta þess að spila og hafa kósý í bústaðnum eftir það, sem og við gerðum. Þetta var því smá eins og utanlandsferð…..ég meina, við fórum með bát burt af meginlandinu!
Laugardagurinn byrjaði á því að við gengum á Eldfell, það var ekki erfið ganga og ég myndi segja hún sé algjör skylda fyrir þá sem vilja njóta náttúrufegurðar í fyrsta gæðaflokki.
Svona göngur er síðan miklu skemmtilegri með góðum vinum….
….og litlum villingum!
Eftir góða göngu settumst við inn á veitingstaðinn GOTT og getið þið lesið nánar um þann dásamlega stað hér á blogginu.
Við sátum og nutum matarins heillengi og ætluðum varla að tíma að fara aftur út að halda ævintýradeginum okkar áfram.
Eftir góðan kaffibolla og eftirrétti var samt kominn tími til að halda af stað.
Næsta stopp var safnið í Eldheimum. Þangað var alveg hreint magnað að koma og kynna sér sögu Vestmannaeyja og eldgossins sem átti sér þar stað árið 1973 og stóð yfir í fimm mánuði!
Þar fengu allir tæki og headset til að hlusta og ganga á milli svæða og krökkunum þótti þetta jafn spennandi og okkur fullorðna fólkinu.
Eftir Eldheima var farið að spranga og allir prófuðu það og jeminn það er sko ekkert grín, þetta er alveg erfitt! Ég hélt þetta væri mitt síðasta en prófaði samt nokkrum sinnum og ég held að með æfingunni gæti ég alveg lagt þetta fyrir mig, hahaha!
Það er skemmtilegt að skoða sig um í Vestmannaeyjum!
Meira að segja ruslatunnurnar eru fallegar.
Eftir skemmtileg ævintýri var komið að kvöldmat, enda snúast svona ferðalög jafn mikið um að borða góðan mat og að gera eitthvað skemmtilegt að mínu mati.
Einar meistarakokkur sem rekur veitingastaðinn Einsa kalda sá um að færa okkur dýrindis veitingar þetta laugardagskvöld og getið þið lesið nánar um þann frábæra stað í þessari færslu hér. Hann er meira að segja búinn að gefa mér upp samsetninguna á þessari brjálæðislega góðu humarloku og ég lofa því að reyna að leika hana eftir og koma með uppskrift fyrir ykkur hingað inn á næstunni!
Eftir geggjaðan dag var farið í kósý upp í bústað, spilað, borðað nóg af gotteríi og snakki, spjallað fram á nótt og allt eins og það átti að vera.
Sunnudagurinn byrjaði svo á því að kíkja á Stórhöfða en sumir segja að það sé vindasamasti staðurinn í allri Evrópu. Það var nú alveg rok þar þegar við komum en ekki þannig að það stoppaði okkur frá því að hlaupa þar um og skoða.
Næsti viðkomustaður var SeaLife Trust en þar eru mjaldrarnir fallegu, Litla Hvít og Litla Grá. Þar var einnig heilmargt annað spennandi að skoða og krakkarnir ætluðu aldrei að vilja fara.
Náðum að draga þessa út með því að hún fengi eina Litlu Hvít með sér heim.
Áður en Herjólfur ferjaði okkur aftur yfir hafið röltum við um í bænum og enduðum á því að borða dásemdar Crépes á Tanganum í síðbúinn hádegisverð.
Það voru allir sammála um að koma aftur til Vestmannaeyja, kanna fleiri gönguleiðir, fara í bátsferð og síðan er alveg spurning um að skella sér bara með allt gengið á Þjóðhátíð einn daginn!
