Gotterí og gersemar

Eurovisionkaka



Já ég veit að það var ekkert Eurovision 2020! Það er ekki þar með sagt að það sé ekki hægt að halda Eurovisionpartý eins og elskulegi frændi minn hann Kristján gerði á dögunum. Það eru fáir jafn miklir “Eurovison fans” eins og hann og heldur hann úti like síðu á Facebook þar sem hann deilir hinum ýmsu hugrenningum sínum með landanum sem er algjör snilld.

Þegar ég hafði samþykkt að gera fyrir hann köku mundi ég eftir forlátum kökudiski sem hann á og plataði hann til að koma með hann til að ég gæti skreytt kökuna í stíl, enda ekki á hverjum degi sem ég fæ svona djásn í hendurnar. Ég gerði súkkulaðiköku með karamellukremi á milli botna, skreytta með hvítu vanillukremi að utan.

Eurovisionkaka

Botnar

  • 1 x Betty Crocker Devils Food Cake mix
  • 4 egg
  • 125 ml ljós matarolía
  • 250 ml vatn
  • 3 msk. bökunarkakó
  • 1 pk súkkulaði Royal búðingur (duftið)
  1. Hrærið saman eggjum, olíu og vatni.
  2. Bætið kökudufti og bökunarkakó saman við og hrærið vel, skafið niður á milli.
  3. Að lokum fer Royal búðingurinn saman við og hrært er lítillega þar til hann hefur samlagast deiginu.
  4. Spreyið 3 x 15 cm kökuform með matarolíuspreyi og skiptið deiginu jafnt niður á milli þeirra.
  5. Bakið við 160°C í um 25 mínútur eða þar til prjónn kemur hreinn út.
  6. Kælið og snyrtið örlítið ofan af hverjum botni til að jafna þá áður en þið setjið kökuna saman.

Karamellusósa

  • 150 g sykur
  • 70 g smjör við stofuhita
  • 90 ml rjómi
  • 1 tsk. salt
  1. Hafið öll hráefnin tilbúin í upphafi þar sem hræra þarf stanslaust í blöndunni.
  2. Setjið sykurinn í pott og hitið á meðalháum hita þar til hann er bráðinn og hrærið stanslaust í með sleif á meðan (þetta tekur um 6-8 mínútur).
  3. Setjið smjörið saman við sykurinn (það mun bubbla aðeins og það er allt í lagi) og hrærið vel þar til blandað.
  4. Blandið rjómanum þá út í pottinn og hrærið vel þar til blandað. Hér bubblar aftur og það má hækka hitann í 1-2 mínútur á því stigi og síðan taka af hellunni og setja saltið saman við.
  5. Gott er að hella karamellunni í aðra skál (ég setti strax 100 ml í mæliglas fyrir kremið og restina í aðra skál fyrir drippið).
  6. Karamellan þarf að ná stofuhita og þá má nota hana í kremgerð og drip.
  7. Ef hún verður of þykk áður en þið gerið drippið þá má setja hana 10-15 sek á meðalhita í örbylgjuofninn og hræra upp aftur (hún má samt vera frekar þykk þar sem hún lekur merkilega vel niður þó hún sé þannig).

Karamellukrem

  • 100 g smjör við stofuhita
  • 400 g flórsykur
  • 2 tsk. vanilludropar
  • Karamellusósa (sjá uppskrift að ofan)
  1. Þeytið smjörið þar til létt og ljóst.
  2. Bætið flórsykrinum saman við í nokkrum skömmtum.
  3. Setjið vanilludropana og karamellusósuna saman við og blandið vel. Setjið meiri flórsykur ef ykkur þykir kremið of lint.
  4. Smyrjið góðu (um 1 cm þykku) lagi á milli botnanna.

Hjúpur og skreyting

  • 2 x Betty Crocker Vanilla frosting
  • 200 g flórsykur
  • Matarlitir að eigin vali
  • Odense bronze duft
  1. Hrærið saman krem og flórsykur og grunnhjúpið kökuna.
  2. Kælið hana stutta stund og smyrjið næst öðru lagi (um ½ cm á þykkt) yfir hana alla.
  3. Kælið aftur þar til kremið stífnar og litið þá smá hluta af kreminu sem er eftir í þeim litum sem ykkur langar til að skreyta hana með. Setjið það krem síðan óreglulega á með kökuspaða.
  4. Blandið um 1 tsk. af Odense bronsdufti í nokkra dropa af vatni, takið stífan pensil og frussið óreglulega á kökuna.

Elsku snillingarnir mínir hjá Hlutprent sáu síðan til þess að hanna þetta frábæra skilti á toppinn á kökunni sem setti svo sannarlega punktinn yfir I-ið!

Megið endilega fylgja Gotterí líka á INSTAGRAM

Leave a Reply

Your email address will not be published. Required fields are marked *

Fylgstu með á Instagram