Nú er ég í sumargír og litríkir og léttir réttir líta dagsins ljós í eldhúsinu! Þessi undursamlegu grillspjót ásamt meðlæti voru hinn fullkomni kvöldverður í vikunni og ef það er ekki rétti tíminn til að grilla þessa dagana þá veit ég ekki hvað.
Suðræn grillspjót
Fyrir um 4 manns
- 1 poki Rose Poultry kjúklingalærakjöt (um 700 g)
- Caj P Honey grillolía
- 2 x rauðlaukur
- 2 x paprika (ein rauð og ein græn)
- ½ ferskur ananas
Dressing og meðlæti
- 1 dós sýrður rjómi (180 g)
- 2 msk. majónes
- 1-2 tsk. Tabasco sósa
- ½ lime (safinn)
- 2 msk. kóríander (saxað)
- Salt og pipar
- Maísstönglar
- Afþýðið kjúklinginn og skerið niður í hæfilega stóra bita (ég tók hvert læri í 3 hluta).
- Setjið bitana í skál með um 8 matskeiðum af grillolíu, veltið þeim upp úr olíunni, plastið og leyfið að marinerast í kæli í að minnsta kosti klukkustund (yfir nótt væri líka í lagi).
- Skerið lauk, papriku og ananas í bita og þræðið það ásamt kjúklingabitum upp á grillspjót. Ef þið eruð að nota tréspjót er gott að leggja þau í bleyti í að minnsta kosti klukkustund (eða yfir nótt) áður en þau eru sett á grillið.
- Útbúið dressinguna með því að hræra öllu vel saman og kæla fram að notkun.
- Gott er síðan að sjóða maísstönglana á meðan spjótin eru grilluð.
- Spjótin má grilla á meðalheitu grilli í um 15 mínútur og pensla aðeins aftur yfir kjúklinginn með grillolíunni síðustu mínúturnar. Dressinguna má síðan nota bæði með spjótunum sjálfum og til þess að smyrja á maísstönglana.
Kjúklingurinn varð dásamlegur með hunangs grillolíunni frá Caj P og hentar hún afar vel fyrir ýmiss konar kjöt og grillmeti. Kjúklingalærakjötið verður einnig mýkra og betra að mínu mati á svona pinnum en bringur/lundir.
Sumarlegur og léttur kvöldverður!
Megið endilega fylgja Gotterí líka á INSTAGRAM
