Hér er á ferðinni ofureinfaldur eftirréttur sem tók mig um 15 mínútur að útbúa og koma í kæli! Það eru ekki mörg hráefni en það þarf að þrífa hrærivélarskálina 3 x í röð til að koma þessu heim og saman. Það er samt ekki hægt að kvarta yfir slíku þegar maður fær svona fallegt glas í hendurnar fyrir uppvaskið.
Þessi eftirréttur fór í smakk til nokkurra nágranna og það voru allir yfir sig hrifnir af þessum dásamlegheitum.
„The ROYAL“
Uppskrift dugar í 8-10 glös
Súkkulaðilag
- 1 pk. Royal súkkulaðibúðingur
- 300 ml nýmjólk
- 300 ml rjómi
- 2 msk. bökunarkakó
- Hrærið öllum hráefnum saman á meðalhraða þar til léttur og þykkur búðingur hefur myndast.
- Skiptið niður í falleg glös og geymið pláss fyrir næstu lög (gott að notast við sprautupoka/zip lock poka).
- Stráið smá Snickerskurli og krispkúlum yfir áður en þið setjið karamellubúðinginn.
Karamellulag
- 1 pk. Royal saltkaramellubúðingur
- 300 ml nýmjólk
- 300 ml rjómi
- Hrærið öllum hráefnum saman á meðalhraða þar til léttur og þykkur búðingur hefur myndast.
- Skiptið niður í glösin og geymið pláss fyrir rjóma og topp (gott að notast við sprautupoka/zip lock poka).
Toppur og annað hráefni
- 4 stk. Snickers súkkulaðistykki (rifin gróft niður)
- Litlar krispkúlur
- 300 ml þeyttur rjómi
- Sprautið rjómatopp efst í hvert glas og stráið Snickerskurli og krispkúlum yfir allt.
- Kælið fram að notkun.
Royalbúðingurinn klikkar ekki frekar en fyrri daginn og með því að þeyta hann upp í rjóma verður hann að dýrindis hátíðareftirrétti.
