Gotterí og gersemar banner

Laukhringir



Heimagerðir laukhringir og bjór

Ég elska laukhringi og fæ mér þannig iðulega á veitingastöðum. Við fórum oft á Red Robin veitingastaðina í Seattle þegar við bjuggum þar og fengum okkur reglulega svona laukhringjafjall í forrétt.

Laukhringir og Stella bjór

Ég hef nokkrum sinnum áður djúpsteikt laukhringi en það hefur alltaf verið upp úr sama deigi og ég hef djúpsteikt fisk í. Sú aðferð er líka mjög góð og auðvitað tilvalið að slá tvær flugur í einu höggi og fá sér „Fish & Chips“ og laukhringi með! Ég ákvað hins vegar að prófa eitthvað annað í þetta skiptið og notaði brauðrasp og uppskar því mun stökkari laukhringi svo það má sannarlega segja þessir séu „krönsí“ og góðir.

Laukhringir og blooming sósa

Laukhringir uppskrift

Um 30-40 hringir

  • 3 stórir laukar
  • 120 g hveiti
  • 40 g lyftiduft
  • 2 msk. paprikukrydd
  • 2 egg
  • 320 ml nýmjólk
  • 1 msk. salt
  • 1 msk. hvítlauksduft
  • 1 tsk. pipar
  • 300 g brauðraspur
  • 1 l steikingarolía
  1. Skerið laukinn í um ½ cm þykka hringi, losið þá í sundur og haldið eftir stærstu hringjunum (getið sett hina í poka og nýtt síðar í aðra matargerð).
  2. Blandið saman hveiti, lyftidufti og paprikudufti og veltið laukhringjunum upp úr hveitiblöndunni, leggið á bakka.
  3. Pískið saman egg og nýmjólk og kryddið, pískið saman við það sem eftir stendur af hveitiblöndunni (sem er megnið af henni).
  4. Setjið brauðrasp í aðra skál og dýfið hringjunum fyrst upp úr eggjablöndunni og hjúpið næst með brauðraspi, leggið á bakka og hitið olíuna.
  5. Steikið síðan 3-4 laukhringi í senn á meðalháum hita (tekur um 1-2 mínútur), leyfið olíunni að leka af og raðið á grind með eldhúspappír undir til að fitan leki öll af og hringirnir haldist stökkir.
  6. Berið fram með „Blooming“ kokteilsósu (sjá uppskrift hér að neðan).

„Blooming“ kokteilsósa uppskrift

  • 80 g majónes
  • 130 g sýrður rjómi
  • 50 g piparrótarsósa
  • 30 g tómatsósa
  • 1 tsk. paprikukrydd
  • 1 tsk. hvítlauksduft
  1. Vigtið allt saman í eina skál og pískið saman þar til kekkjalaust.
  2. Kælið í að minnsta kosti klukkustund áður en sósan er borin fram með heitum laukhringjum.
Gott snarl með bjór

„Blooming“ kokteilsósa er kölluð þessu nafni erlendis því oft er svokallaður „Blooming onion“ í boði á matseðli en það er risastór laukur sem búið er að skera í á sérstakan hátt og djúpsteikja. Síðan getur maður slitið sér bita og bita og dýft í sósuna.

Laukhringir uppskrift

Skildu eftir svar

Netfang þitt verður ekki birt. Nauðsynlegir reitir eru merktir *

Flokkar

0
    0
    Karfan þín
    Karfan er tómNetverslun