Gotterí og gersemar banner

Vanillukaka með saltkaramellu



⌑ Samstarf ⌑
Vanillukaka með karamellukremi

Hér er á ferðinni undursamleg vanillukaka með saltkaramellu! Karamellukrem fer einstaklega vel með léttum vanillubotnunum og þessi var einstaklega góð. Ég sá köku skreytta á svipaðan hátt á Pinterest en þróaði sína mína eigin samsetningu hvað kökuna varðar og eins og svo oft áður kom vinkona mín Betty til bjargar.

Saltkaramella uppskrift

Vanilla og karamella = fullkomin blanda!

Saltkaramella heimatilbúin

Vanillukaka með saltkaramellu uppskrift

Kaka uppskrift

  • 1 x Betty Crocker vanilla kökuduft
  • 1 x Royal vanillubúðingur
  • 4 egg
  • 100 ml matarolía
  • 200 ml vatn
  1. Hitið ofninn í 160° og hrærið eggjum, olíu og vatni saman.
  2. Bætið kökuduftinu saman við og hrærið í nokkrar mínútur, þá má bæta búðingsduftinu við og blanda stutta stund til viðbótar.
  3. Skiptið niður í 3 x 15 cm kökuform sem búið er að spreya vel að innan með matarolíuspreyi.
  4. Bakið í um 25 mínútur eða þar til þið sjáið að kantarnir losna örlítið frá forminu efst, kælið.

Saltkaramella uppskrift

  • 360 g sykur
  • 130 g smjör við stofuhita
  • 120 ml rjómi
  • 2 tsk. sjávarsalt
  1. Hellið sykrinum á pönnu og hitið við háan hita þar til hann fer að kristallast, hrærið mjög reglulega.
  2. Þegar hann byrjar að bráðna má lækka hitann í meðalháan og hræra áfram þar til sykurinn er uppleystur.
  3. Þá má bæta smjörinu á pönnuna og hræra vel og því næst rjómanum og hræra þar til samfelld karamella hefur myndast. Hér er saltinu síðan hrært saman við.
  4. Takið af hitanum og hellið í skál, leyfið að kólna áður en notað með kreminu.

Vanillukrem uppskrift

  • 180 g smjör við stofuhita
  • 680 g flórsykur
  • 2 tsk. vanillusykur
  • 150 ml rjómi
  1. Þeytið smjörið þar til létt og ljóst.
  2. Bætið flórsykri, vanillusykri og rjóma saman við í nokkrum skömmtum.
  3. Skafið vel niður á milli og hrærið þar til létt krem hefur myndast.

Samsetning

  1. Skerið aðeins ofan af öllum kökubotnunum og smyrjið um ½ sm þykku lagi af smjörkremi ofan á neðsta botninn og því næst smjörkremsvegg með hringlaga stút yst á botninn (þetta gert til þess að karamellan leki ekki út). Fyllið upp í með saltkaramellu.
  2. Leggið botn númer 2 ofan á og endurtakið og lokið síðan með þriðja botninum og kælið kökuna í um 30 mínútur.
  3. Hjúpið næst alla kökuna með þunnu lagi af smjörkremi og kælið aftur í um 10 mínútur.
  4. Þá má setja lokaumferð af kremi á kökuna sem er um 1 sm þykkt smjörkremslag. Áður en þið sléttið úr kreminu má setja smá af karamellu hér og þar með skeið/hníf og draga með kreminu þegar það er sléttað með kökuspaða. Að lokum smá strá smá grófu salti efst á kökuna og best er að geyma hana í kæli.
Betty Crocker vanillukaka

Vanillu kökuduftið frá Betty finnst mér virkilega ljúffengt og að gera kökupinna með því er himneskt, svona ef þið ætlið að fara út í frekari kökugerð en þessa hér!

Vanillukaka með ljúffengu karamellukremi

Skildu eftir svar

Netfang þitt verður ekki birt. Nauðsynlegir reitir eru merktir *

Flokkar

0
    0
    Karfan þín
    Karfan er tómNetverslun