Þessi lambahryggur er eitthvað sem þið verðið að prófa! Að pensla hann með Caj P grillolíu og elda á útigrillinu var svo svakalega gott að ömmuhryggurinn minn góði er kominn í hættu, hahaha! Það er gaman að prófa eitthvað nýtt og það er búið að vera svo mikið vor í lofti undanfarið, orðið bjart langt frameftir öllu svo grillið má sannarlega vera notað meira á næstunni.
Heilgrillaður lambahryggur og meðlæti
Fyrir um 6-7 manns
Lambahryggur uppskrift
- Lambahryggur (um 2,5 kg)
- Caj P Original grillolía
- Lambakjötskrydd
- Álbakki
- Leyfið hryggnum að standa við stofuhita í að minnsta kosti klukkustund áður en hann fer á grillið.
- Skerið í skorpuna niður með hryggnum beggja vegna og síðan á ská í báðar áttir til að olían og kryddið njóti sín sem best og skorpan verði stökk.
- Penslið allan hrygginn vel með Caj P olíunni, kryddið þar á eftir og færið yfir á álbakka.
- Grillið við óbeinan hita (um 190-200°C), við erum með 3 brennara og slökktum á miðjubrennaranum og settum hrygginn þar og pössuðum að hitinn færi ekki yfir 200°.
- Hryggurinn er tilbúinn þegar kjarnhiti sýnir um 65-70° en þessi hryggur var í klukkustund á grillinu og var alveg fullkominn, örlítið bleikur á breiðari endanum og eldaður í gegn á þeim mjórri svo allir fengu kjöt eldað eins og þeir vildu.
- Hvílið kjötið í að minnsta kosti 10 mínútur áður en þið skerið í það.
Sætkartöflufranskar uppskrift
- 3 stórar sætar kartöflur
- 5 msk. ólífuolía
- Salt og pipar
- Parmesanostur
- Kóríander
- Flysjið kartöflurnar og skerið þær langsum til helminga. Skerið þær síðan niður í mjóar lengjur/franskar (um 1 x 1 cm).
- Veltið þeim upp úr ólífuolíu og kryddi og dreifið úr á tvær bökunarskúffur með bökunarpappír.
- Bakið í 200° gráðu heitum ofni í um 25-30 mínútur eða þar til þær verða mjúkar að innan og stökkar að utan (snúið nokkrum sinnum á eldunartímanum).
- Þegar ykkur finnst þær vera tilbúnar má rífa vel af parmesanosti yfir þær og baka aftur í örfáar mínútur.
- Saxið síðan kóríander og stráið yfir þær þegar þið berið þær á borð.
Köld grillsósa uppskrift
- 300 g sýrður rjómi
- 30 g Tabasco Sriracha sósa
- ½ lime (safinn)
- 1 tsk. salt
- 1 msk. saxað kóríander
- Pískið allt saman í skál og geymið í kæli fram að notkun.
Salat
- Klettasalat 1 poki
- Fetaostur ½ krukka
- 1 tsk. rauðlaukur
- Grillaðar nektarínur, 2 stykki
- Smá hunang
- Skerið nektarínur í sneiðar og grillið stutta stund á grillinu, penslið síðan með hunangi og geymið.
- Blandið salati, osti og rauðlauk saman í skál og dreifið úr nektarínunum yfir.
