Gotterí og gersemar banner

Heilgrillaður kjúklingur



⌑ Samstarf ⌑
Heill grillaður kjúklingur á grilli

Að grilla heilan kjúkling á útigrillinu er ÆÐI! Fyrir ykkur sem ekki hafið prófað þá mæli ég 100% með. Mér finnst best að nota Weber kjúklingagrindina sem við fengum einu sinni í jólagjöf frá mömmu og pabba en þar situr kjúklingurinn vel, safinn lekur niður í grindina ef maður vill nota í sósu og minni líkur eru á að neðri hlutinn brenni. Svokallaður „Beer-Can-Chicken“ er vinsæll í Bandaríkjunum en þá er hægt að hálftæma bjórdós og láta kjúklinginn sitja á henni og slíkt má einmitt gera hér ef þið eigið ekki svona grind. Í þessari grind er hins vegar hólf sem má fylla með bjór, kryddjurtum eða öðru gómsætu til að gera kjúklinginn enn betri.

Grillaður kjúklingur uppskrift

Heilgrillaður kjúklingur uppskrift

Fyrir um 3-4

Kjúklingur á grilli

  • 1 heill kjúklingur (um 1,8 kg)
  • Ólífuolía til penslunar
  • Kjúklingakrydd
  • ½ Stella Artois dós eða magn sem passar í hólfið á standinum ef þið notið slíkan.
  1. Þerrið kjúklinginn vel, berið á hann ólífuolíu og kryddið vel allan hringinn.
  2. Hitið grillið í 180-200°C.
  3. Hellið bjór í hólfið á standinum eða opnið dósina með dósaopnara og hellið um helming bjórsins út (í glas til dæmis, haha).
  4. Komið kjúklingnum fyrir „sitjandi“ ofan á dósinni eða á standinum.
  5. Grillið við óbeinan hita við 180-200° í lokuðu grilli í um 65-75 mínútur eða þar til kjarnhiti sýnir um 74°C.
  6. Leyfið kjúklingnum að standa í að minnsta kosti 10 mínútur áður en þið skerið í hann.
Kjúklingur og STella Artois bjór

Grænmeti á grillið

  • 2 sætar kartöflur
  • 1 rauðlaukur
  • Ólífuolía
  • Salt, pipar, hvítlauksduft, annað krydd (t.d rósmarín)
  1. Skerið kartöflurnar niður í litla teninga og laukinn í stóra bita. Blandið öllu saman á grillpönnu, veltið upp úr ólífuolíu og kryddið eftir smekk.
  2. Grillið við óbeinan hita í um 40 mínútur eða þar til kartöflurnar verða mjúkar (tíminn fer eftir stærð bitanna). Gott er að hræra reglulega í kartöflunum allan tímann.
Kjúklingur og grænmeti á grillinu

Grillsósa uppskrift

  • 300 g sýrður rjómi
  • 2 rifin hvítlauksrif
  • ½ lime (safinn)
  • Salt, pipar, hvítlauksduft eftir smekk
  1. Pískið allt saman í skál og geymið í kæli fram að notkun.
Heilgrillaður kjúklingur á grilli

Þessi máltíð var svo góð og ekki skemmir fyrir að hún er einnig í hollari kantinum!

Skildu eftir svar

Netfang þitt verður ekki birt. Nauðsynlegir reitir eru merktir *

Flokkar

0
    0
    Karfan þín
    Karfan er tómNetverslun