Grillað lambalæri

Grillað lambalæri er máltíð sem klikkar seint! Hér er á ferðinni einföld útgáfa af grilluðu lambalæri og grænmeti í álpappírsvasa með kaldri grillsósu. Máltíð sem hentar fullkomlega í ferðlagið jafnt sem heima við!

Mmmmm…….það borðuðu allir vel á þessu heimili þetta kvöldið!

Grillað lambalæri uppskrift

Fyrir um 6 manns

Lambalæri

Lambalæri um 2 – 2,5 kg
Caj P grillolía Original

Penslið lambalærið vel með grillolíu.
Vefjið lærið þétt inn í álpappír og gott er að hafa að minnsta kosti tvö lög.
Grillið á meðalheitu grilli í 1 – 1 ½ klukkustund, snúið á 20 mínútna fresti. Gott er að nota kjöthitamæli og þegar kjarnhiti sýnir á bilinu 60-70° er lærið tilbúið (fer eftir því hvernig þið viljið hafa það eldað).
Síðustu mínúturnar má síðan taka álpappírinn af og grilla lærið á báðum hliðum stutta stund til að fá stökka húð.
Leyfið lærinu að standa í um 15 mínútur áður en þið skerið í það.

Tabasco Sriracha grillsósa

100 g majónes
250 g sýrður rjómi
2 msk. Tabasco Sriracha sósa (30 g)
1 msk. saxaður kóríander
½ lime (safinn)

Pískið allt saman í skál og geymið í kæli fram að notkun.

Grænmeti í álpappírsvasa

Um 600 kartöflur
Um 300 g ferskur aspas
2-3 rauðlaukar (eftir stærð)
Ólífuolía
Salt, pipar og hvítlauksduft

Skerið grænmetið niður í munnstóra bita. Kartöflurnar mega þó vera í aðeins minni bitum svo eldunartími sé jafnari.
Setjið allt í stóra skál og veltið upp úr ólífuolíu og kryddum.
Búið til 6 álpappírsvasa úr tvöföldum álpappír.
Skiptið grænmetinu niður og klemmið álpappírinn saman.
Grillið við lágan hita eða á efri grindinni í um 45 mínútur. Gott er að opna reglulega einn poka og stinga í kartöflurnar, þegar þær eru mjúkar má taka grænmetið af grillinu. Það geymist vel heitt í álpappírsvasanum en nóg er að setja það á grillið þegar lærið hefur verið í um 20-30 mínútur í eldun.