Gotterí og gersemar banner

Partýbakki fyrir Hrekkjavökuna



⌑ Samstarf ⌑
Hrekkjavaka partýbakki

Þegar ég var búin að liggja á veraldarvefnum í leit að einföldum hugmyndum af snarli fyrir Hrekkjavökuna útbjó ég þennan bakka. Ég setti saman allt það sem mér fannst sniðugt og meira til og útkoman var alveg stórkostleg. Hér eru á ferðinni uppskriftir og hugmyndir sem allir ættu að ráða við að gera, svo lengi sem þeir hafa smá þolinmæði og nennu fyrir því að raða fallega saman.

Hér er bæði snarl sem er matarkyns, grænmeti og ávextir í bland við kex, snakk og sælgæti þannig að allir ættu að geta fundið eitthvað við sitt hæfi.

Hugmyndir fyrir Halloween

Partýbakki fyrir Hrekkjavökuna

Oreo köngulær

  • Oreo kex
  • Gamaldags lakkrís
  • Hrekkjavökuaugu
  1. Skerið lakkrísplöturnar niður í mjóa strimla (fyrir köngulóarfætur).
  2. Ýtið varlega í kremið með tannstöngli á fjórum stöðum sitthvoru megin til að gera smá holu fyrir lakkrísinn/fæturna.
  3. Stingið lakkrísnum í og kroppið smá meira krem í tannstöngulinn til þess að setja á augun og festa þau með því.
Oreo köngulær

Það elska allir OREO og þetta er einföld og ljúffeng hugmynd sem setti sannarlega punktinn yfir I-ið á bakkanum!

Oreo kex fyrir halloween

Múmíupylsur

  • Pylsur (gott að miða við 1 á mann)
  • Tilbúið pizzadeig (upprúllað)
  • Hrekkjavökuaugu
  • Hunt‘s tómatsósa
  • Sinnep
  1. Hitið ofninn í 200°C.
  2. Rúllið pizzadeigið út og skerið niður mjóa strimla með pizzahníf til að vefja utan um pylsurnar.
  3. Vefjið 2-3 strimlum utan um hverja pylsu og reynið að láta endana snúa niður, raðið á bökunarplötu og bakið í 10 mínútur eða þar til deigið fer að gyllast.
  4. Augun festi ég eftirá með mví að setja smá tómatsósu á þau og „líma“ við.
  5. Sprautið tómatsósu í skál, sprautið sinnepi í miðjuna og nokkra hringi til viðbótar. Takið síðan tannstöngul og dragið frá miðjunni og út að brún skálarinnar, þá myndast „köngulóarvefur“.
Múmíupylsur eða Mummy hot dogs

Eplatennur

  • Epli
  • Hnetusmjör
  • Litlir sykurpúðar
  1. Skerið eplin niður í sneiðar
  2. Smyrjið hnetusmjöri á aðra hliðina á báðum sneiðunum.
  3. Raðið sykurpúðum ofan á hnetusmjörið á annarri sneiðinni til að búa til tennur og leggið hina sneiðina ofan á.
Veitingar fyrir Hrekkjavökuna

Hrískökumúmíur

  • 60 g smjör
  • 260 g sykurpúðar
  • 150 g Rice Krispies/blásið hrísmorgunkorn
  • Matarolíusprey
  • 300 g hvítt súkkulaði
  • Hrekkjavökuaugu
  1. Klæðið um 25 x 25 cm kökuform að innan með bökunarpappír og spreyjið næst með smá matarolíuspreyji svo auðveldara verði að ná kökunni úr til að skera hana í bita. 
  2. Bræðið smjör í potti við vægan hita.
  3. Blandið sykurpúðunum saman við og hrærið þar til þeir hafa bráðnað saman við smjörið og loftkennd blanda myndast.
  4. Takið af hellunni og hrærið hrísmorgunkorninu saman við. Blandan minnir smá á klístraðan köngulóarvef og þannig á hún einmitt að vera.
  5. Setjið nú alla blönduna yfir í kökuformið og þjappið niður með sleif, gott er að setja smá matarolíusprey á sleifina líka svo hún klístrist síður við.
  6. Þjappið niður eins og þið getið og sléttið úr toppnum, kælið síðan í um 30 mínútur.
  7. Nú ætti blandan að vera orðin stíf í sér og auðvelt að lyfta henni á bökunarpappírnum upp úr forminu yfir á borð/bretti. Skerið kökuna í tvennt og því næst í ílanga bita, blandan gefur um 16 „múmíur“.
  8. Bræðið hvíta súkkulaðið og dýfið hverri múmíu ofan í það (c.a 1/3 af kökunni), leggið á bökunarpappír og setjið hrekkjavökuaugu í súkkulaðið áður en það storknar.
  9. Þegar búið er að dýfa öllum kökunum og setja á þær augu má nota restina af súkkulaðinu og renna því óreglulega yfir, þvers og kruss til að klára að útbúa múmíu.
Sykurpúða hrískökur

Annað á bakka

  • Mandarínur með saltstöng til að gera „grasker“
  • BUBS nammi
  • Lakkrís Dumle karamellur
  • Hunangsmelóna
  • Ídýfa
  • Paprika, gulrætur og agúrka í strimlum
  • Maarud snakk með papriku
Snarl fyrir Hrekkjavökuna

Skildu eftir svar

Netfang þitt verður ekki birt. Nauðsynlegir reitir eru merktir *

Flokkar

0
    0
    Karfan þín
    Karfan er tómNetverslun