Ójá það eru sko löngu komnar piparkökur í verslanir ef þið tókuð ekki eftir því! Við erum nú þegar búin með nokkur box og stefnum ótrauð á að halda áfram, hahaha! Það má hins vegar nota piparkökur í ýmislegt annað en það að borða þær beint upp úr boxinu.
Hér er til dæmis á ferðinni guðdómlegur sjeik með karamellu og piparkökum sem ég get lofað að mun koma ykkur skemmtilega á óvart!
Það var í það minnsta slegist um glösin á þessu heimili svo næst geri ég beint tvöfalda uppskrift svo allir geti fengið sitt eigið glas!
Piparkökusjeik
Uppskrift dugar í 2 stór glös
- 400 g vanilluís
- 200 ml nýmjólk
- 12 stk. Göteborgs hjartapiparkökur (+ meira til skrauts)
- 2 msk. karamelluíssósa (+ meira til skrauts)
- 1 tsk. vanilludropar
- ¼ tsk. kanill
- 150 ml þeyttur rjómi
- Byrjið á því að mylja 12 piparkökur í blandaranum og setja í skál.
- Þeytið einnig rjómann og leggið til hliðar.
- Setjið þá nokkrar matskeiðar af karamellusósu í aðra skál og nuddið glasbarminum í sósuna og því næst í piparkökumulninginn til að gera fallega piparkökubrún á glasið.
- Hellið því næst smá af karamellusósu í hliðarnar á glasinu.
- Þá má útbúa sjeikinn með því að setja ís, mjólk, restina af piparkökuduftinu, 2 msk. af karamellusósu, vanilludropa og kanil í blandarann og blanda vel.
- Skiptið niður í glösin, toppið með vel af þeyttum rjóma og skreytið með piparkökumulningi og/eða heilli hjartapiparköku.
Þessar eru svooooo góðar!
Mmmm og þessi sjeik, namm!
