Aspassúpa er algjör klassík. Þetta er súpa sem hefur fylgt okkur um aldur og ævi og nauðsynlegt að skella í ljúffenga aspassúpu annað slagið. Það er svo einfalt og fljótlegt að gera hana aðeins meira gúrme og þessi útfærsla var guðdómleg. Þessi súpa er hinn fullkomni kvöldverður í miðri viku eða sem forréttur fyrir hátíðirnar!
Ferskur aspas er svo góður, hér notaðist ég við „mini“ ferskan aspas og hentar hann mjög vel fyrir súpur en að sjálfssögðu er í lagi að nota þennan hefðbundna líka. Einnig væri gaman að prófa hvítan aspas, hann er stundum til yfir hátíðirnar og bragðast í raun alveg eins að mínu mati, örlítið mýkri í sér og svo er útlitið bara öðruvísi og skemmtilegt.
Aspassúpa uppskrift
Fyrir um það bil 4 manns
- 400 g ferskur aspas
- 2 skalottlaukar
- 2 hvítlauksrif
- 700 ml rjómi
- 700 ml vatn
- 2 pakkar TORO aspassúpubréf
- Salt + pipar
- Smjör til steikingar
- Brauðteningar
- Sýrður rjómi
- Skerið trenaða hlutann af aspasnum og skerið hann því næst í munnstóra bita. Hér er notast við mini-aspas og nokkrir heilir geymdir til þess að skreyta með en það er þó óþarfi.
- Saxið skalottlauk og hvítlauk og steikið upp úr smjöri ásamt aspasnum í góðum potti. Kryddið til með salti og pipar eftir smekk.
- Þegar grænmetið fer að mýkjast má hella rjóma og vatni í pottinn og píska bæði súpubréfin saman við, hitið að suðu.
- Lækkið þá hitann og leyfið að malla í um 15 mínútur, hrærið reglulega í súpunni á meðan og kryddið og smakkið til.
- Berið fram með sýrðum rjóma og brauðteningum.
TORO súpuduftið er einstaklega gott og flýtir virkilega fyrir í súpugerð sem þessari og sparar óþarfa vesen án þess að það komi niður á gæðum súpunnar.
