Bollakökur með lakkrískeim

Hér eru á ferðinni undursamlegar bollakökur með lakkrískeim í kökunni sjálfri og silkimjúku súkkulaði smjörkremi, namm!

Það er eitthvað með blöndu af lakkrís og súkkulaði sem hreinlega getur ekki klikkað.

12-14 stykki

Bollakökur uppskrift

2 egg
100 g sykur
100 g púðursykur
80 ml ljós matarolía
120 ml súrmjólk
2 tsk. vanilludropar
110 g hveiti
40 g bökunarkakó
1 tsk. lyftiduft
½ tsk. matarsódi
½ tsk. salt
1 pakki Eitt sett Royal búðingur

Hitið ofninn í 170°C og takið til bollakökuform. Best þykir mér að nota álform með pappaformum inn í.
Þeytið saman egg og báðar tegundir af sykri þar til létt og ljós blanda myndast.
Pískið saman matarolíu, súrmjólk og vanilludropa, geymið.
Hrærið hveiti, kakó, lyftiduft, matarsóda og salt saman, geymið.
Blandið nú til skiptis þurrefnunum og súrmjólkurblöndunni út í eggjablönduna og skafið niður á milli.
Að lokum má hræra búðingsduftið saman við stutta stund.
Skiptið næst niður í 12-14 bollakökuform og bakið í 20-22 mínútur.
Kælið áður en þið setjið kremið á.

Súkkulaði smjörkrem uppskrift

150 g smjör við stofuhita
50 g bökunarkakó
500 g flórsykur
3 msk. kaffi (uppáhellt)
3 msk. hlynsýróp
2 tsk. vanilludropar

Þeytið smjör og kakó þar til létt og ljóst, skafið niður á milli.
Bætið öðrum hráefnum saman við til skiptis og þeytið áfram í nokkrar mínútur, skafið niður á milli.
Setjið í sprautupoka með stórum stjörnustút (ég notaði 1M frá Wilton) og sprautið upp í spíral.
Skreytið með lakkrískurli ef þess er óskað.

Ég hef oft bætt Royal búðingsdufti í kökudeig og útkoman hefur hingað til ekki klikkað. Búðingurinn gerir kökuna aðeins blautari í sér og bætir bragðið!