Hamborgarhryggur er á veisluborði margra landsmanna yfir hátíðirnar. Hann er algjör klassík en svo er gaman að prófa mismunandi gljáa og meðlæti með honum. Hér var ég að prófa appelsínukeim í gljáanum og möndluflögur yfir allan hrygginn og það kom ótrúlega vel út.
Þessi var alveg fullkominn!
Hamborgarhryggur með appelsínu- og möndlugljáa
Fyrir um 6 manns
Hamborgarhryggur eldun
- Um 3 kg Ali hamborgarhryggur
- 1 l vatn
- 180 ml appelsínusafi
- 200 g púðursykur
- 1 msk. dijon sinnep
- 120 g hunang
- 70 g möndluflögur
- Byrjið á því að útbúa gljáann með því að hita saman appelsínusafa, púðursykur, sinnep og hunang þar til sykurinn er uppleystur.
- Hellið 1 l af vatni í ofnskúffu neðst í ofninum og stillið hitann á 150°C.
- Setjið hamborgarhrygginn á ofngrind, penslið 1 x með gljáanum (geymið 3 msk. fyrir sósuna og síðan restina til að pensla á hrygginn á meðan á eldun stendur).
- Stingið kjöthitamæli inn í hann miðjan og komið grindinni fyrir í ofninum fyrir ofan skúffuna með vatninu. Penslið 1-2 x á hrygginn á meðan hann er í ofninum á þessum tíma. Ef þið eigið ekki kjöthitamæli er gott að miða eldunartíma við 45 mín til klukkustund á hvert kíló.
- Eldið hrygginn með þessum hætti þar til kjarnhiti sýnir um 55°C og hækkið þá hitann á ofninum í 200°C.
- Blandið möndluflögunum nú saman við restina af gljáanum, setjið yfir hrygginn og eldið þar til kjarnhiti sýnir 67°C og takið hrygginn þá út og hvílið í að minnsta kosti 15 mínútur áður en þið skerið í sneiðar.
Sveppasósa uppskrift
- 250 g sveppir
- 40 g smjör
- 170 ml vatn
- 500 ml rjómi
- 2 msk. kjötkraftur
- 3 msk. gljái
- 50 ml rauðvín
- Salt, pipar, hvítlauksduft og cheyenne pipar
- Maizenamjöl
- Skerið sveppina niður og steikið upp úr smjöri og kryddið eftir smekk.
- Steikið þar til þeir mýkjast og bætið þá vatni, rjóma, krafti og gljáa á pönnuna, hitið að suðu og lækkið síðan vel niður hitann og leyfið sósunni að malla á meðan hryggurinn er í ofninum.
- Smakkið til og bætið krafti/kryddum við eftir smekk og í lokin má þykkja sósuna með Maizenamjöli og bæta rauðvíninu saman við.
Brúnaðar kartöflur
- 1 kg forsoðnar kartöflur
- 200 g sykur
- 50 g smjör
- Sigtið allan vökva frá kartöflunum og hitið sykurinn á pönnu.
- Hristið pönnuna reglulega og þegar sykurinn fer að bráðna má bæta smjörinu saman við, lækka hitann og hella kartöflunum á pönnuna.
- Veltið kartöflunum upp úr sykurbráðinni með sleikju/sleif og leyfið þeim að malla þar til þær eru heitar í gegn.
Mandarínusalat
- 3 lúkur spínat
- 3 lúkur klettasalat
- ½ pera
- 1 mandarína
- ½ granatepli
- 40 g pekanhnetur
- Fetaostur
- Skerið niður peruna, losið mandarínuna í sundur, náið fræjunum úr granateplinu og saxið hneturnar smátt.
- Blandið öllu saman í skál og setjið fetaost saman við eftir smekk.
Ferskt og góð tilbreyting frá waldorf salatinu.
Ali hamborgarhryggurinn er okkar uppáhald!
