Það elska allir súkkulaðibitakökur, hvernig sem þær eru. Nýbakaðar, aðeins volgar inní ennþá eru þær bestar, með ískaldri mjólk! Við fórum í Fjarðarkaup um helgina, ég eeeeeelska að fara í Fjarðarkaup, þar er allt til! Hulda valdi krúttleg páskaegg til að hengja á páskagreinarnar og við keyptum í þessar dýrindis páskakökur og hér koma þær fyrir ykkur til að baka um páskana!
Hér er stutt myndband sem sýnir hvernig best er að útbúa þessa dásemd!
Nammi namm!
Mmmmm…….munið, bestar nýbakaðar með ískaldri mjólk!
Súkkulaðibitakökur í páskaskapi
16-18 stykki
- 250 g smjör við stofuhita
- 190 g púðursykur
- 130 g sykur
- 1 egg
- 3 tsk. vanilludropar
- 400 g hveiti
- 1 tsk. matarsódi
- ½ tsk. salt
- 170 g súkkulaðidropar (+ meira til skrauts)
- 150 g M&M súkkulaðiegg (+ meira til skrauts)
- Þeytið smjör og báðar tegundir af sykri þar til létt og ljóst.
- Bætið þá eggi og vanilludropum saman við, skafið niður á milli og blandið vel.
- Hrærið öll þurrefni saman í aðra skál og bætið saman við, hrærið á lágum hraða.
- Að lokum má vefja súkkulaðidropum og súkkulaðieggjum saman við með sleikju.
- Notið síðan ísskeið/kökuskeið til þess að skammta um 2 msk. stóra skammta, rúllið í kúlu og setjið smá súkkulaði og M&M ofan á, raðið á bakka og frystið í 30 mínútur.
- Hitið þá ofninn í 175°C, takið kökurnar úr frystinum, raðið á bökunarpappír með gott bil á milli og bakið í 16-18 mínútur eða þar til kantarnir verða vel gylltir, kælið.
