Maðurinn minn gat ekki hætt að dásama ostasalat frá Brauð og Co sem hann fékk í vinnunni hjá sér um daginn svo ég ákvað að skoða það salat aðeins nánar. Eftir að hafa smakkað salatið og skoðað innihaldslýsinguna vel ákvað ég að láta á þetta reyna og herma þetta góða salat eftir. Útkoman heppnaðist ofurvel og hér hafið þið dásamlega útgáfu af góðu ostasalati!
Salatið er gott bæði með brauði og kexi og hægt er að bjóða upp á svona salat við hin ýmsu tilefni! Ostasalöt eru einfaldlega alltof góð og ég skil ekki af hverju maður útbýr þau ekki oftar!
Ostasalat með döðlum
• 80 g Til hamingju saxaðar döðlur
• 1 x Piparostur – kryddostur
• 1 x Mexíkóostur – kryddostur
• 80 g Búri ostur
• 230 g Hellmann‘s majónes
• 2 tsk. dijon sinnep með hunangi
• 2 tsk. sítrónusafi
• 1 tsk. paprikuduft
• 1 tsk. aromat krydd
• 1 tsk. salt
• ½ tsk. pipar
• ½ tsk. Cheyenne pipar
- Skerið döðlurnar aðeins smærra niður og setjið í skál.
- Skerið alla ostana í litla teninga og bætið saman við döðlurnar.
- Hrærið restinni af hráefnunum saman í aðra skál og blandið síðan saman við ostana og döðlurnar.
- Berið fram með góðu brauði/kexi.
Mmmmm þetta salat var nokkrum númerum of gott!
Mæli með að þið prófið við fyrsta tækifæri!
