Við í fjölskyldunni elskum asískan mat og getum ekki beðið eftir að ferðast aftur síðar til Asíu. Ef ég spyr yngstu mína hvað á að vera í matinn þá segir hún „bestu núðlurnar mínar“, hahaha! Það eru einmitt núðlur í Teriyaki sósu og ég leyfi mér að útfæra þær á mismunandi hátt. Hér stytti ég mér leið með elduðum kjúklingabringum og Teriyaki sósu á flösku og það tók án gríns kortér að útbúa þessa máltíð og hún sló aldeilis í gegn!
Einfalt og gott!
Kjúklinganúðlur uppskrift
Fyrir 4-5 manns
- 1 pakki Go-tan lífrænar eggjanúðlur
- 2 hvítlauksrif
- ½ kúrbítur
- 1 paprika
- 4-5 egg
- 2-3 eldaðar kjúklingabringur (ég notaði sous vide bringur í hvítlauk)
- 1 flaska Go-tan Teriyaki woksósa
- ½ flaska Go-tan Ketjap Sesam woksósa
- Saxaðar jarðhnetur
- Saxað kóríander
- Saxaður vorlaukur
- Ólífuolía til steikingar
- Salt og pipar
- Sjóðið eggin í 6-8 mínútur (eftir því hvernig þið viljið hafa þau).
- Hitið vatn að suðu fyrir núðlurnar og hellið þeim í pottinn og sjóðið í um 5 mínútur. Setjið þær síðan undir kalt vatn áður en þið bætið á pönnuna með grænmetinu.
- Skerið niður eldaðan kjúkling, papriku og kúrbít á meðan núðlur og egg eldast.
- Steikið grænmetið upp úr ólífuolíu, kryddið eftir smekk. Rífið hvítlaukinn á pönnuna í lokin.
- Bætið kjúklingnum saman við grænmetið þegar það er búið að mýkjast og hellið báðum woksósunum saman við. Hitið og blandið saman.
- Næst fara núðlurnar á pönnuna og blandið öllu saman.
- Skammtið á diska og toppið með jarðhnetum, kóríander, vorlauk og eggi.
Eggjanúðlur í Teriyaki sósu eru eitt það besta!
Það er einfalt og fljótlegt að nota tilbúna Teriyaki sósu á pönnuna!
