Ef þig vantar hina fullkomnu vatnsdeigsbollu uppskrift þá þarft þú ekki að leita lengra! Þetta er sú uppskrift sem ég nota alltaf í grunninn og síðan má leika sér með fyllingar og annað. Hér sprautaði ég bollunum til dæmis í hring til að útbúa „bolluköku“ og það er gaman að bera þær fram þannig.
Þessar eru algjör sælgætisbomba og svo góðar!
Vatnsdeigsbollur með sælgætisfyllingu
Vatnsdeigsbollur uppskrift
- 180 g smjör
- 360 ml vatn
- 200 g hveiti
- 1 tsk. lyftiduft
- ¼ tsk. salt
- 3-4 egg (160 g)
- Hitið ofninn í 180°C.
- Blandið hveiti, lyftidufti og salti saman í skál og leggið til hliðar.
- Pískið eggin í skál, vigtið og geymið. Ef eggin eru lítil gæti þurft aðeins meira en 3 egg.
- Hitið vatn og smjör saman í potti þar til smjörið bráðnar og leyfið aðeins að sjóða, slökkvið þá á hellunni.
- Setjið þurrefnin saman við og hrærið vel þar til „smjörbolla“ myndast.
- Færið þá deigið yfir í hrærivélarskálina og hrærið rólega með K-inu þar til mesti hitinn er farinn út því.
- Bætið eggjunum saman við í nokkrum skömmtum og hrærið áfram saman.
- Setjið deigið í sprautupoka með stórum stjörnustút (t.d 1M), teiknið hring á bökunarplötu (um 20-25 cm) og sprautið bollur með jöfnu millibili á hringinn (12 bollur). Sprautið stakar bollur á aðra bökunarplötu úr restinni (um 8 stykki).
- Bakið í 32-35 mínútur eða þar til bollurnar verða vel gylltar. Alls ekki opna ofninn til að kíkja á þær/botninn fyrr en í fyrsta lagi eftir 25 mínútur því þá eru meiri líkur á því að þær falli.
- Leyfið bollunum að kólna, skerið þær í sundur og fyllið.
Fylling í bollur
- 100 g Nóa Töggur
- 50 ml rjómi
- 400 ml þeyttur rjómi
- 200 g jarðarber
- 200 g Nóakropp (+ meira til að skreyta með)
- Bræðið Töggur og 50 ml af rjóma saman í potti þar til karamellusósa myndast.
- Setjið karamellusósu í botninn á hverri bollu og leyfið karamellunni að kólna áður en þið setjið rjómann yfir.
- Maukið jarðarberin og blandið þeim ásamt Nóakroppi saman við þeytta rjómann, setjið vel af rjóma á hverja bollu og setjið toppinn síðan yfir.
- Útbúið glassúr og skreytið.
Glassúr uppskrift
- 100 g brætt smjör
- 210 g flórsykur
- 3 msk. bökunarkakó
- 3 msk. uppáhellt kaffi
- 2 tsk. vanilludropar
- Pískið allt saman og setjið um eina teskeið yfir hverja bollu.
- Skreytið með Nóakroppi.
Nóakropp gerir lífið einfaldlega betra!
Ó svo góðar!
Þessi glassúr er síðan sá allra besti!
Það er gaman að bera bollurnar fram eins og köku.
