Salat vefjur hafa verið ansi vinsælar undanfarið og ég varð auðvitað að hoppa á vagninn og prófa útfærslu af slíkum! Útkoman var stórgóð og allir á heimilinu ansi sáttir með þetta uppskrift svo hér kemur hún fyrir ykkur að njóta.
Namm!
Kjúklinga BLT vefjur
Uppskrift gerir 6 vefjur (fyrir um 4 manns)
- 6 stórar vefjur
- 700 g Rose Poultry kjúklingalundir (1 poki)
- ½ flaska Caj P hvítlauks grillolía
- 8 beikonsneiðar
- ½ salathaus (romaine eða iceberg)
- 1 x avókadó
- ½ rauðlaukur
- 150 g piccolo tómatar
- 2/3 box Philadelphia rjómaostur
- Jógúrtsósa (sjá uppskrift hér að neðan)
- Kjúklingakrydd, hvítlauksduft, salt og pipar
- Setjið kjúklingalundirnar í grillolíuna og veltið vel uppúr henni, kryddið einnig eftir smekk og grillið síðan á meðalheitu grilli í nokkrar mínútur á hvorri hlið. Leyfið kjúklingnum að hvíla á meðan annað er undirbúið.
- Eldið beikon í ofni/grilli þar til stökkt og saxið síðan gróft niður.
- Skerið salat, avókadó, tómata og kjúkling niður í litla bita, saxið rauðlaukinn.
- Hellið öllu í skál ásamt beikoninu og setjið um ½ af jógúrtsósunni yfir og blandið vel.
- Smyrjið hverja vefju að innan með um 1 msk af rjómaosti og skiptið salatblöndunni síðan á milli vefjanna.
- Rúllið upp, skerið í tvennt og njótið.
Jógúrtsósa uppskrift
- 3 msk. grísk jógúrt
- 3 msk. Heinz majónes
- ½ sítróna (safinn)
- 2 msk. jómfrúarolía
- Hvítlauksduft, salt og pipar
- Pískið allt saman og setjið um helminginn yfir salatið áður en það fer í vefjurnar og berið afganginn fram með fyrir þá sem vilja meira.
Það gerir vefjuna extra djúsí og góða að smyrja hana að innan með rjómaosti áður en salatið fer í hana.
Það er svo þægilegt að grilla kjúklingalundir því þær eru bara nokkrar mínútur á grillinu!
Þessi færsla er unnin í samstarfi við Gerum daginn girnilegan!
