Ég er mikið fyrir stökka kjúklingavængi, hvort sem ég er að kaupa mér „Hot Wings“ á KFC, stökka BBQ vængi á Barion eða útbúa þá heima. Þessi uppskrift lukkaðist virkilega vel og þetta eru með bestu kjúklingavængjum sem ég hef smakkað. Þeir munu án efa verða útbúnir reglulega á þessu heimili á komandi árum, það nokkuð er víst.
Asískir kjúklingavængir uppskrift
Kjúklingavængir
- Um 1,2 kg kjúklingavængir (2 pakkar)
- 2 msk. lyftiduft
- 1 tsk. salt
- ½ tsk. cheyenne pipar
- ½ tsk. pipar
- Asísk sósa (sjá uppskrift)
- Vorlaukur
- Sesamfræ frá Til hamingju
- Skerið vængina í sundur á liðamótunum svo þið endið með þrjá hluta, hendið minnsta hlutanum og raðið í ofnskúffu.
- Blandið saman lyftidufti og kryddum í skál og stráið yfir kjúklinginn á báðum hliðum svo hann hjúpist allur, gott er að nota lítið sigti.
- Raðið vængjunum þá á ofngrind (með skúffu undir) og bakið í 120° heitum ofni í 25 mínútur, hækkið hitann í 220° og bakið í aðrar 25 mínútur eða þar til vængirnir verða gylltir og stökkir. Gott er að útbúa sósuna á meðan.
- Takið úr ofninum, setjið bitana í skál, hellið sósunni yfir og vefjið saman við með sleif þar til allir bitar eru vel hjúpaðir.
- Færið yfir á disk/fat og skreytið með vorlauk og sesamfræjum.
Asísk sósa
- 1 tsk. ólífuolía
- 2 rifin hvítlauksrif
- 4 msk. Kikkoman Teriyaki BBQ sósa með hunangi
- 2 msk. Kikkoman Teriyaki sósa með hvítlauk
- 5 msk. Kikkoman soyasósa
- 7 msk. púðursykur
- 1 tsk. lime safi
- Setjið allt saman í pott, hitið að suðu og leyfið að sjóða saman í 5-8 mínútur.
- Þegar blandan fer aðeins að þykkna má hella henni yfir stökka vængina.
