Höldum áfram með fljótlega og góða heimilisrétti! Þessi hérna réttur er svo góður og mesta snilldin er að það er hægt að skella honum saman á um kortéri og síðan ganga frá öllu og leggja á borð á meðan hann mallar í ofninum í tuttugu mínútur.
Hollt, gott og fljótlegt!
Ofnbakaður lax með hrísgrjónum
Fyrir 4-6 manns
- 250 g Tilda basmati hrísgrjón
- 900 g laxaflök
- 1 rauð paprika
- ½ blaðlaukur
- 2 hvítlauksrif
- 200 g Philadelphia rjómaostur með sweet chilli
- 550 ml rjómi
- Rifinn ostur
- Salt, pipar og hvítlauksduft
- Ólífuolía til steikingar
- Hitið ofninn í 180°C.
- Sjóðið hrísgrjónin samkvæmt leiðbeiningum á pakka á meðan þið undirbúið annað.
- Skerið laxinn í bita og skerið einnig niður papriku og blaðlauk.
- Steikið papriku og blaðlauk upp úr ólífuolíu og kryddið eftir smekk.
- Bætið hvítlauknum á pönnuna þegar paprika og blaðlaukur er búið að mýkjast og hitið saman í um mínútu.
- Bætið þá rjóma og rjómaosti saman við og hrærið þar til rjómaosturinn er bráðinn.
- Setjið síðan hrísgrjónin í botninn á eldföstu móti, næst laxabitana og hellið síðan rjómaostasósunni jafnt yfir allt.
- Toppið með vel af rifnum osti og bakið í ofninum í 20 mínútur.
Philadelphia rjómaosturinn með sweet chilli gefur réttinum einstaklega gott bragð!
Þessi færsla er unnin í samstarfi við Gerum daginn girnilegan!
