Þessi steikarloka, eða öllu heldur steikarsneið var frábærlega góð! Rifið nautakjöt í soyalegi er eitt það allra besta og passaði einstaklega vel með hvítlauks Aioli á brauðsneið sem þessari!
Kjötið má þessvegna hægelda deginum áður og hræra svo upp í á vægum hita í potti þegar setja á steikarlokuna saman.
Steikarloka uppskrift
Uppskrift dugar fyrir 5-6 sneiðar
Hægeldað nautakjöt í kryddlegi
- Um 700 g nauta chuck/ribeye/annað svipað
- 150 ml ólífuolía
- 100 ml nautasoð
- 100 ml soyasósa
- 2 x lime (safinn)
- 2 x jalapeno (skorið í sneiðar)
- 80 g púðursykur
- Smjör og ólífuolía til steikingar
- Lokið kjötinu með því að steikja það upp úr smjöri + ólífuolíu í pottinum og brúna það á öllum hliðum.
- Hitið ofninn í 160°C.
- Hrærið öll önnur hráefni saman og hellið yfir nautakjötið, lokið pottinum og leyfið að hægeldast í 3 klukkutíma, gott að snúa kjötinu 1 x á meðan.
- Tætið kjötið síðan niður og blandið öllu saman í sósunni/leginum. Ef þið viljið minna sterkt þá getið þið veitt jalapeno upp úr pottinum áður en þið tætið niður kjötið.
Önnur hráefni og samsetning
- 5-6 þykkar súrdeigssneiðar
- Stonewall Garlic Aioli
- Klettasalat
- ½ rauðlaukur
- 10-12 sveppir
- Basilika/kóríander (eftir smekk)
- Smjör og ólífuolía til steikingar
- Salt, pipar og hvítlauksduft
- Byrjið á því að smjörsteikja sveppina og krydda þá eftir smekk.
- Steikið næst brauðsneiðarnar á nokkuð háum hita upp úr smjöri/ólífuolíu þar til þær verða aðeins stökkar að utan en enn mjúkar að innan.
- Raðið síðan saman; brauðsneið, Garlic Aioli, klettasalat, vel af rifnu nautakjöti, rauðlaukur, sveppir og toppið að lokum með basiliku eða kóríander og meira af Garlic Aioli.
Þetta hvítlauks Aioli er eitthvað annað gott!
