Hindberjasnúðar

Hér eru á ferðinni guðdómlegir og undurmjúkir snúðar með hindberjafyllingu! Ég er mikið fyrir flöffí kanilsnúða en þessir voru eitthvað algjörlega nýtt og dásamlegt.

Mæli innilega með að þið prófið þessa útfærslu!

12 stykki

Deig fyrir snúða

80 g smjör (+ 50 g brætt fyrir penslun)
180 ml nýmjólk
120 ml vatn
60 g sykur
1 pk þurrger (um 12g)
630 g hveiti
1 tsk. salt
1 egg
2 tsk. vanilludropar

Bræðið smjörið í potti og bætið mjólk og vatni saman við þegar bráðið. Hrærið vel saman og takið af hitanum. Blandan ætti að vera volg, ef hún verður of heit þá má hella henni í annað ílát og leyfa henni að kólna aðeins niður.
Hellið þá sykri og þurrgeri saman við, hrærið vel og leyfið að standa á meðan annað er undirbúið.
Setjið hveiti og salt í hrærivélarskálina og setjið krókinn á.
Hellið næst gerblöndunni saman við og bætið eggi og vanilludropum næst saman við.
Hnoðið í nokkrar mínútur og færið yfir í skál sem búið er að pensla með olíu að innan.
Veltið deigkúlunni upp úr olíunni, plastið og leyfið að hefast í 1,5 klukkustund.
Setjið á meðan hindberin fyrir fyllinguna (sjá að neðan) inn í frysti).
Rúllið deiginu síðan út í um 40 x 50 cm og setjið á það fyllinguna.
Rúllið því næst upp, skerið í 12 einingar og raðið í vel smurt skúffukökuform (um 25 x35 cm) og hefið að nýju í eina klukkustund.
Smyrjið með bræddu smjöri og bakið síðan við 175° í 25-30 mínútur eða þar til snúðarnir verða vel gylltir.
Kælið aðeins niður áður en þið setjið rjómaostatoppinn á.

Fylling

250 g Driscolls hindber (fryst í um klukkustund)
150 g sykur
2 tsk. vanillusykur
1 tsk. kartöflumjöl

Hrærið öllu saman og smyrjið yfir útflatt deigið og rúllið upp.

Rjómaostatoppur

80 g Philadelphia rjómaostur við stofuhita
50 g smjör (brætt)
200 g flórsykur
30 ml nýmjólk
2 tsk. vanilludropar
Driscolls hindber til skrauts
Saxað hvítt súkkulaði til skrauts
Pískið allt saman nema hindberin og súkkulaðið. Smyrjið yfir snúðana og toppið með hindberi og smá hvítu súkkulaði.