Bókaþrenna

Lýsing

Bókin Börnin baka inniheldur einfaldar og barnvænar uppskriftir. Bókinni er skipt upp í fimm kafla: Muffins og bollakökur, Kökur, Brauðmeti, Smákökur og gotterí og síðast en ekki síst Ís og drykki. Uppskriftirnar eru að mestu tengdar bakstri en í bókinni er einnig að finna uppskriftir að einföldu góðgæti sem ekki felur í sér bakstur. Í bókinni eru gefin góð ráð fyrir bakstur sem gott er að tileinka sér áður en hafist er handa í eldhúsinu ásamt því sem leiðbeiningamyndir eru við flóknari uppskriftir.
Markmið með bókinni er að fá börn til þess að æfa sig í að baka og öðlast sjálfstæði í eldhúsinu um leið og þau töfra fram ljúffenga rétti fyrir fjölskyldu og vini. Flest börn sem kunna að lesa, þekkja aðeins til í eldhúsinu sínu, og kunna á þau tæki og tól sem þar er að finna, ættu að ráða við uppskriftirnar í þessari bók. Önnur gætu þurft smávægilega aðstoð og síðan eru þetta allt saman góðar uppskriftir fyrir mömmur og pabba líka.
Berglind Hreiðarsdóttir er höfundur bókarinnar ásamt dóttur sinni, Elínu Heiðu Hermannsdóttur og er því um samstarfsverkefni þeirra mæðgna að ræða.

Bókin Saumaklúbburinn hefur að geyma yfir 140 uppskriftir fyrir hin ýmsu tilefni. Nafnið er tilkomið því oft er talað um að halda saumaklúbb þegar fólk hittist til þess að spjalla saman og snæða góðar veitingar. Í þessari bók er að finna uppskriftir sem henta bæði slíkum tilefnum sem og hversdagslegri matargerð. Uppskriftirnar spanna allt frá salötum yfir í ostagóðgæti, aðalrétti, smárétti, kökur og kræsingar og koma úr ýmsum áttum. Þær eiga það sameiginlegt að vera allar fremur einfaldar um leið og þær eru afar fjölbreyttar. Auk hefðbundinna uppskrifta eru settir fram saumaklúbbar hjá tíu frábærum konum sem bjóða upp á fjölbreyttar uppskriftir og mismunandi framsetningarmöguleika. Saumaklúbburinn er því hafsjór hugmynda þegar kemur að heimboðum og er tilvalin uppskriftabók til að skapa góðar stundir með fjölskyldu og vinum.

Uppskriftabókin Vinsælustu uppskriftirnar frá vinsælum matarbloggurum fylgir með í kaupbæti á meðan birgðir endast en í henni er að finna 120 gómsætar uppskriftir frá vinsælum matarbloggurum á Íslandi.