Á dögunum fórum við hjónin ásamt vinafólki okkar í dagsferð í Kerlingarfjöll. Ég hef aldrei áður komið þangað og maður minn, fegurðin! Í sumar hef ég kolfallið fyrir hálendi Íslands og stefni svo sannarlega á fleiri ævintýri á þeim slóðum. Á Instagram er hægt að sjá myndbönd og önnur skemmtilegheit frá þessum degi ásamt fleiri gönguferðum í Highlights, undir Gönguferðir.
Dagurinn hófst ansi snemma og við vorum farin af stað með rútu á vegum Fjallhalla Adventures klukkan 07:00 um morguninn! Við fengum alls konar veðurafbrigði í þessari ferð en þegar við skriðum inn á hálendið var heiðskírt og logn! Það gerist ekki oft á Íslandi að fánar liggi niðri svo þetta var klárlega góð byrjun á ferðinni.
Það var stutt stopp í skálanum áður en haldið var á Snækoll og ekki var veðrið verra sem tók á móti okkur þar. Þetta er svo krúttlegt og fallegt þarna uppfrá að okkur langar að fara með stelpurnar þarna uppeftir næsta sumar, gista í eins og tvær nætur, ganga um og kynna þær fyrir þessari fegurð.
Það var smá eins og að vera kominn aftur til fortíðar í skólaferðalag að koma inn í skálann en þar bæði byrjuðum við og enduðum daginn okkar.
Leifi rútubílstjóri kom okkur öruggum á áfangastað og hér erum við að búa okkur undir gönguna á Snækoll.
Jæja, hefjum þessa göngu! Við gengum Fannborgina yfir á Snækoll og virtum fyrir okkur Loðmund frá toppnum.
Sumir segja það sé kalt á toppnum og það var það svo sannarlega þennan daginn!
Maður getur hins vegar alveg gleymt kulda sem og öllu öðru þegar maður gengur um í svona umhverfi!
Ferðafélagar af betri gerðinni!
Hrafntinnan fallega leynist um allt í Kerlingarfjöllum og mikilvægt að virða hana vel fyrir sér!
Uppi var rok, frost og snjókoma á köflum og það var svo kalt að vatnið okkar fraus í brúsunum utan á töskunum! En þetta er bara partur af því að ganga um hálendið og búa á Íslandi. Broddarnir voru settir á skóna fljótlega og Snækollur genginn þannig því það er sannarlega betra að hafa gott grip í aðstæðum sem þessum.
Þarna fer þetta að styttast….
Brrrrr…….
Við vorum með frábæra leiðsögumenn í þessari ferð en það voru þeir Björn, Markús og Jónas. Björn tók þessa mynd af okkur fjórmenningunum þegar við riðum á vaðið og vorum fyrsti hópurinn til að fara alla leið upp á topp þennan daginn.
Ég tók að sjálfsögðu fjallapósuna mína frægu á toppi Snækolls, í hávaðaroki og á broddum, hahaha!
Gat ekki hætt að taka myndir af þessari fegurð og það má eiginlega segja að við höfum fengið hávetur í einn dag í byrjun september!
Jebb við vorum glaðar að komast aftur niður af toppnum!
Göngugarpar á niðurleið.
Það er mjög mikilvægt að horfa niður, horfa upp og út um allt til þess að missa ekki af neinum smáatriðum sem íslenska náttúran færir okkur.
Ég elska að taka myndir af náttúrinni, alveg eins og ég elska að taka myndir af mat, fólki og já bara öllu!
Fjölbreyttir litir, hiti, kuldi og allt þar á milli.
Tók þessa mynd þegar við vorum á bakaleið og fórum að nálgast hverasvæðið.
Að ganga niður að hverasvæðinu var eins og ganga inn í annan heim.
Þegar niður var komið gengum við aftur inn í lognið og það byrjaði að snjóa, svona fallegum og stórum jólasnjókornum, það var sko fallegt og alveg til að toppa daginn!
Vatnið sem þar rennur er volgt og almáttugur minn hvað mér finnst þetta svæði vera fallegt.
Við gengum um hverasvæðið dágóða stund og ég ætlaði ekki að tíma að fara.
Sáttir göngugarpar með afrek dagsins!
Á hverasvæðinu mættust þessir litir í ánni, hvítt og svart. Samkvæmt Birni leiðsögumanni stafar blöndun vatnsins eflaust af því að dökkur hveraleir hefur runnið úr einni á í þá næstu og þetta því blandast svona skemmtilega.
Við kvöddum hins vegar hverasvæðið á endanum og héldum af stað í heitu náttúrulaugina fyrir innan skálann.
Hér koma því síðustu myndirnar frá hverasvæðinu.
Það var notalegt að stinga sér í heita laugina eftir gönguna, sumir voru hins vegar kaldari en aðrir og böðuðu sig í ánni en við Máney létum heitu laugina duga. Strákarnir urðu eftir í skálanum að horfa á leik og fá sér bjór, hahahaha! Síðan voru enn aðrir mjög sniðugir og komu með freyðivín til að skála í en við vorum ekki þar á meðal, mynduðum bara fínheitin og munum ekki klikka á þessu í næstu ferð!
Selfies rokka!
TAKK FYRIR okkur elsku fallegu Kerlingarfjöll, „We’ll be back“!
