Bjargarsteinn Mathús – Grundarfirði
Ég veit ekki hvar ég á að byrja því veitingastaðurinn Bjargarsteinn á Grundarfirði er hreint út sagt dásamlegur staður. Saga hússins er ein sú krúttlegasta sem ég veit, maturinn upp á tíu, útsýnið ekki af verri endanum og frábærlega skemmtilegir þjónar!
Gunni, eigandi Bjargarsteins galdraði hvern dýrindis réttinn á fætur öðrum fram fyrir okkur. Við hjónin sátum ásamt stelpunum okkar heila kvöldstund að snæða svo það hlýtur að segja til um hversu gott var að borða á Bjargarsteini!
Húsið sem veitingastaðurinn er rekinn í er gamalt íbúðarhús sem flutt var í heilu lagi á Grundarfjörð. Núverandi eigendur ráku augun í þetta hús til sölu á Akranesi, fundu fallega sjávarlóð á Grundarfirði og létu drauminn rætast. Hægt er lesa nánar um sögu hússins á heimasíðu Bjargarsteins.
Húsmunir og öll umgjörð á Bjargarsteini er einstök. Safnað hefur verið saman munum frá allri fjölskyldunni og setur það sannarlega sinn brag á húsnæðið. Á efri hæðinni er setustofa og virkilega kósý og heimilislegt að koma inn á þennan dásamlega veitingastað. Gæðin og matreiðslan leynir sér síðan ekki og greinlegt að mikið er lagt í það að töfra fram bragðgóðar og fallegar veitingar.
Útsýnið frá borðinu okkar var yfir sjóinn og Kirkjufellið fallega.
Næst er komið að matnum og hér leyfi ég myndum og nokkrum línum að fylgja með fyrir hvern rétt.
Fallegir kokteilar í fallegu umhverfi, hvað er hægt að biðja um meira!
Einn af forréttunum var þessi flotti harðfiskur ásamt söli og smjöri.
Hemmi fékk sér hangikjöt með rauðrófum, bláberjum og balsamik, algjört lostæti.
Matarmikil skelfiskssúpa sem var undursamleg, namm!
Þorskur með rjómalöguðu byggi og grænmeti, virkilega fallegur og góður réttur.
Lamb Boulangére.
Fiskur dagsins þegar við vorum í heimsókn var rauðspretta og drottinn minn, eruð þið að sjá þessa fallegu rétti, vildi að þið gætuð smakkað í gegnum skjáinn!
Heimalagaður rjómaís, hér kláruðu dömurnar hvern einasta bita! Súkkulaði, vanillu, jarðaberja og lakkrís….namm!
Volg súkkulaðikaka var desert dagsins með lakkrís ís, held ég þurfi að fá uppskrift!
Skyr-þeytingur með berjakrapís….já ég gæti þurft uppskrift að þessum líka!
Það var svo gaman að koma í heimsókn á þennan fallega veitingastað.
Krakkar fengu líka kokteil…..án áfengis að sjálfsögðu!
Pink Panther er drykkur sem ég þarf að mastera, namm!
Innlit á efri hæðina, hversu krúttlegt!
Hér fyrir miðju má sjá íbúðarhúsið sem flutt var í heilu lagi. Matsalur var byggður við fyrir framan og gamall beitningaskúr sem var á svæðinu sem sést hér til hægri var gerður upp og er nú notaður sem undirbúningseldhús.
Mælum einnig með því að kíkja á Kirkjufellsfoss og Kirkjufell í heimsókn til Grundarfjarðar.
