Kristján sonur Írisar vinkonu varð 3 ára á dögunum og var sjóræningjaþema hjá honum. Þar sem ég á enga stráka finnst mér alltaf gaman að fá að taka þátt í slíkum undirbúningi hjá vinkonum mínum. Mig hefur lengi langað að útbúa sjóræningjapinna en aldrei látið verða af því svo hér koma þeir!
Kökukúlurnar
- 1x Betty Crocker Devils kökumix (bakað skv.leiðbeiningum á pakka)
- 1/2-2/3 af Betty Crocker Vanilla Frosting
- 1 poki hvítt Candy Melts
- 1/2 poki rautt Candy Melts
- Matarolía til þynningar
- Kökupinnaprik (um 30stk)
- Hvítt kökuskraut, rauð hjörtu (kökuskraut), lítið smarties eða annað rautt kökuskraut og svartur matarlitarpenni
Aðferð
- Myljið kökuna og blandið kreminu saman við.
- Rúllið í jafnstórar kúlur (rúmlega 1msk hver), plastið og kælið í 2-3 klst (eða yfir nótt).
- Bræðið Candy Melts og þynnið eftir þörfum.
- Dýfið pinnunum fyrst alveg í hvíta hjúpinn og leyfið að storkna.
- Dýfið því næst 1/2 pinnanum í rauðan hjúp og dýfið örlítið á ská. Raðið hvítu kökuskrauti á rauða hlutann áður en hann storknar (einnig hægt að bíða þar til storknar og útbúa hvítar doppur með hvítu súkkulaði)
- Takið til rautt kökuskraut/smarties og rauð hjörtu.
- Setjið örlítið af rauðu súkkulaði á aðra hlið kökupinnans með tannstöngli og festið smarties/kökuskraut og rautt hjarta á hvern pinna.
- Leyfið pinnunum að storkna og teiknið þá andlit með svörtum matarlitapenna.
