Ætli það sé ekki nauðsynlegt að fylgja aðeins heilsuæðinu sem janúar hefur í för með sér. Ég er mikill sælkeri en aðhyllist að sjálfsögðu uppskriftir sem eru gómsætar og hollari en margar aðrar. Ég er búin að vera í smá tilraunastarfsemi með heilsusamlegri uppskriftir undanfarið og mun ég birta ýmsar hugmyndir hér á síðunni á næstunni svo endilega fylgist með.
Þessir litlu bollaköku-hrákökuísar eru yndislega gómsætir og frábært að útbúa marga litla og eiga í frystinum þegar ykkur langar í eitthvað smá sætt og gott án þess að fá allt of mikið samviskubit.
Hrákökubotn
- 1 bolli möndlumjöl
- 2 msk kókosmjöl
- 3 msk brædd kókosolía
- 2 msk bökunarkakó
- 2 tsk vanilludropar
- 6 döðlur
- Setjið öll hráefnin í matvinnsluvél og maukið.
- Setjið um 1 msk af blöndu í bollakökuform sem komið hefur verið fyrir í álformi. Hér notaðist ég við formin úr IKEA en þau eru hærri og grennri en mörg hver og kemur þetta ótrúlega vel út í þeim.
Jógúrtís
- 4x 180gr af vanillu léttjógúrti (eða öðru jógúrti sem ykkur þykir gott)
- 150 ml léttþeyttur rjómi (má sleppa og nota aðeins jógúrt)
- Fersk hindber frá Driscoll‘s
- Setjið 4x jógúrt saman í skál.
- Þeytið rjómann og blandið saman við jógúrtið með sleif ef þið kjósið að nota rjóma.
- Hellið blöndu yfir hrákökubotnana og stingið nokkrum hindberjum ofan í.
- Frystið í amk 2 klst.
- Gott er að plasta þann hluta sem ekki á að njóta strax og laumast síðan í einn og einn góðan ís þegar hentar án mikils samviskubits. Gott er að taka ísinn út aðeins áður en hans á að njóta til að mýkja hann örlítið upp.
- Þessi blanda gerir um 12-16 litla „bollakökuísa“
