Það leynast áhugaverðir staðir um allt landið og í Borgarnesi er fallegur veitingastaður á Landnámssetri Íslands.
Þar er ekki aðeins hægt að fá dýrindis veitingar heldur er þar ýmis önnur starfsemi. Við vinkonurnar kíktum þangað á leið okkar í Húsafell á dögunum og snæddum gómsætan kvöldverð og kynntum okkur starfsemina.
Fyrst ber að nefna sögusýningar en bæði er hægt að ganga í gegnum Egilssögusýningu og Landnámssögusýningu og fræðast um sögu okkar Íslendinga. Sjón er sögu ríkari og mikið lagt upp úr sýningarmunum og sögunni.
Gjafavöruverslun er á neðri hæðinni en þar er hægt að kaupa fallegt íslenskt handverk.
Vinkonur mínar voru ekki lengi að kaupa sér „dósalúffu“ en þetta skilst mér að sé hið mesta þarfaþing í útilegum sumarsins þegar kaldur drykkur er í hönd.
Veitingastaðurinn er fallega skreyttur og húsið er byggt inn í Búðarklett að hluta til.
Hægt er að sitja til borðs undir klöppinni og njóta notalegs umhverfis.
Það eru smáatriðin sem skipta máli á svona stöðum…
Veitingastaðurinn býður upp á fjölbreytta rétti, bæði mat, kökur, kaffi og aðra drykki. Í hádeginu er boðið upp á svokallað hollustuhádegi en það samanstendur af hlaðborði sem er hlaðið hollustu og hefur notið mikilla vinsælda.
Við vorum á ferðinni um kvöldmatarleyti og pöntuðum dásamlegar veitingar af matseðli veitingahússins.
Við fengum okkur fisk dagsins, lambafile og hamborgara, hvert öðru betra.
Að sjálfsögðu er síðan alltaf pláss fyrir eftirrétt!
Heit súkkulaðikaka með ís og rjóma…..hver getur staðist það!
Mokkakaka með þeyttum rjóma, namm hún var sko góð.
Það er fallegt í Borgarnesi og gaman að rölta um í kringum Landnámssetrið.
Mæli sannarlega með því að þið gerið ykkur ferð í Borgarnes til að kíkja í Landnámssetrið eða stoppið við á næsta ferðalagi.
