Þegar það sér fyrir endann á sumrinu fer maður í annan gír í eldhúsinu. Nú sit ég yfir súpu-, pasta- og ofnuppskriftum í bland við bökur, pæ og önnur huggulegheit. Það er svo gaman að breyta um takt í matseldinni í stíl við árstíðirnar svo ég verð að segja að ég er að detta í haustgírínn, hvernig svosem þetta sumar fór að því að líða svona hratt!
Þessi pastaréttur var alveg hreint undursamlegur. Ég hef ekki mikið notað Mascarpone ost í matseld í gegnum tíðina, fyrir utan kökur jú, og nú verður gerð breyting þar á. Mikið sem hann fór vel með þessum pastarétti og ég fæ alveg vatn í munninn við að skrifa þessa færslu. Ég hugsa það líði ekki á löngu áður en það verður skellt í þessa uppskirft aftur!
Tortellini með tómötum og Mascarpone
Fyrir 5-6 manns
- 700 g ferskt osta Tortellini (eða annað fyllt Tortellini)
- 800 g hakkaðir tómatar í dós (2 dósir)
- 150 ml rjómi frá Gott í matinn
- 150 g kastaníusveppir
- 1 laukur
- 150 g spínat
- Smjör og ólífuolía til steikingar
- Salt, pipar, oregano, hvítlauksduft
- Rifinn Grettir ostur
- 200 g Mascarpone ostur frá Gott í matinn
- Fersk basilíka
- Sjóðið pasta samkvæmt leiðbeiningum. Ef notast er við ferskt pasta tekur það aðeins örfáar mínútur að verða tilbúið.
- Saxið niður lauk og skerið sveppi í sneiðar, steikið upp úr blöndu af smjöri og ólífuolíu þar til mýkist. Bætið þá spínati á pönnuna og kryddið til með salti, pipar og hvítlauksdufti.
- Þegar grænmetið er orðið mjúkt má hella tómötum í dós ásamt rjóma yfir og leyfa að malla smá stund. Kryddið til eftir smekk.
- Þegar tortellini er tilbúið skal hella því á pönnuna og hræra saman við tómatblönduna.
- Setjið pastað næst í eldfast mót (nema pannan/potturinn megi fara í ofn), rífið vel af Gretti ost yfir allt saman og setjið að lokum vel af Mascarpone osti yfir það.
- Bakið í 200°C heitum ofni í um 10 mínútur eða þar til osturinn er bráðinn.
Ef þið lumið á góðum mataruppskriftum sem innihalda Mascarpone og þið viljið sjá hérna á blogginu megið þið endilega senda mér hana á gotteri@gotteri.is. Mig langar endilega að prófa fleiri gómsætar uppskriftir með þessum frábæra osti.
Það væri síðan frábært ef þið mynduð líka smella hér til að fylgja Gotterí á INSTAGRAM.
