Einföld súkkulaðimús

Þessi súkkulaðimús er hinn fullkomni eftirréttur að mínu mati 🙂

Ekki skemmir fyrir að hún er afar einföld og fljótgerð og væri tilvalin fyrir áramótaveisluna á morgun!

Uppskriftin hér að neðan er fyrir um 8 manns.

Súkkulaðimús

500 ml stífþeyttur rjómi

400 g suðusúkkulaði (saxað gróft)

100 g smjör

4 egg

Aðferð

1. Súkkulaði og smjör brætt í vatnsbaði, tekið af hitanum og hitanum leyft að rjúka aðeins úr (í um 10 mínútur).

2. Eggin eru pískuð saman og bætt saman við súkkulaðiblönduna í litlum skömmtum og hrært vel á milli.

3. Blandið fyrst um 1/4 af rjómanum varlega saman við súkkulaðiblönduna með sleif og síðan restinni af rjómanum og vefjið áfram þar til slétt og fín blanda hefur myndast.

4. Hellið í litlar dessertskálar eða eina stóra skál og kælið í nokkrar klukkustundir eða yfir nótt.

Súkkulaðimúsin geymist vel í kæli svo lengi sem plast er yfir skálinni og hægt að gera hana með 2-3ja daga fyrirvara sé þess óskað.

Best er að bera músina fram með þeyttum rjóma og jarðaberjum. Ef skreyta á músina með þeyttum rjóma og berjum líkt og á myndinni mæli ég með að rjóminn sé settur á rétt áður en músin er borin fram svo hann gulni/leki ekki til.