Brauðbollur eru eitt það besta sem við fáum og eru margar útfærslur af slíkum hér á síðunni. Þessi hér fær sér færslu fyrir sig af því að í lok síðasta sumars fórum við í fjölskylduferð til Viðeyjar og tíndum þar ferskt, villt kúmen!
Ég vissi ekki einu sinni að villt kúmen yxi á Íslandi og því tók ég eðlilega svolítið af þessu með mér heim og notaði fræin síðan í brauðbollurnar nú um daginn. Þetta kúmen er aðeins fínlegra og bragðmeira en það sem maður kaupir í búðunum og mikið sem það var gaman að prófa að nota þetta í bakstur.
Brauðbollur með kúmeni
Um 35 stk
- 180 g smjör
- 530 ml nýmjólk
- 2 pk þurrger (2x 11,8 g)
- 140 g sykur
- 1020 g hveiti
- 1 tsk. salt
- 3 msk. kúmen
- Bræðið smjörið í potti og hellið mjólkinni saman við. Hitið þar til blandan velgist, takið af hellunni og hrærið gerinu út í blönduna, leyfið gerinu að liggja í pottinum á meðan annað er undirbúið.
- Setjið sykur, hveiti, salt og kúmen í hrærivélarskálina og blandið vel saman.
- Hellið mjólkurblöndunni rólega saman við á meðan þið hnoðið deigið með króknum þar til það myndar kúlu.
- Takið kúluna upp úr, hnoðið aðeins í höndunum og setjið hana síðan í skál sem búið er að pensla með matarolíu og snúið henni einu sinni í skálinni til að deigkúlan hjúpist öll með olíu.
- Plastið skálina og leyfið deiginu að hefast í 45-60 mínútur.
- Hitið ofninn í 220°C, skiptið deiginu niður í smærri einingar (um 35 stk) og hnoðið í bollur.
- Raðið þeim á bökunarpappír á bökunarplötu og leyfið þeim að hefast aftur í um 15-30 mínútur.
- Bakið að lokum í 10-12 mínútur eða þar til bollurnar verða vel gylltar.
Það má auðvitað sleppa því að setja kúmen í hluta deigsins ef einhverjir kjósa það heldur. Hér gerum við yfirleitt bland af hvorutveggja og frystum síðan restina og stelpurnar grípa með í nesti. Bestar þykja okkur þær með smjöri og osti nýbakaðar og með kakómalti með.
Megið endilega fylgja Gotterí líka á INSTAGRAM
