Þessi kjúklingaréttur er fullkomin máltíð sem hægt er að snara fram á um 30 mínútum! Öllum í fjölskyldunni fannst hann æðislegur og allt kláraðist upp til agna!
Ég er forfallinn soyasósuaðdáandi og elska flest allt sem soyasósa snertir. Það gæti verið ég hafi verið asísk í fyrra lífi því ég elska líka allan asískan mat og get ekki hætt að hugsa um það hvenær ég kemst aftur til Asíu! Þegar slíkt er ekki í boði er þá lágmark að færa Asíu inn í eldhús eftir fremsta megni.
Kjúklingur í soyasósu
Fyrir um 5 manns
- Um 1,4 kg úrbeinuð kjúklingalæri (2 pakkar)
- 100 ml Kikkoman soyasósa
- 3 msk. sesamolía
- 2 msk. ólífuolía (+ meira til steikingar)
- 5 msk. púðursykur
- 1 msk.hvítlauksduft
- 1 tsk. paprikuduft
- 1 tsk. kjúklingakrydd
- 2 msk. sítrónusafi
- 4 hvítlauksgeirar
- Meðlæti: Hrísgrjón, naan brauð, sesamfræ og vorlaukur
- Þerrið kjúklinginn og leggið hann til hliðar.
- Blandið öllum öðrum hráefnum saman í skál nema hvítlauknum og hrærið saman.
- Blandið kjúklingnum saman við soyablönduna, rífið niður hvítlauksgeirana og steikið á miðlungshita upp úr smá ólífuolíu.
- Þegar hvítlaukurinn fer að brúnast aðeins og ilma vel má hella kjúklingnum út á pönnuna ásamt soyamarineringunni (ég skipti þessu niður á tvær pönnur).
- Steikið á meðalháum hita í um 10 mínútur eða þar til kjúklingurinn er eldaður í gegn og sósan aðeins farin að þykkna.
- Sjóðið á meðan hrísgrjónin, hitið naanbrauðið og skerið niður vorlauk.
Ég mæli svo sannarlega með þessum dúndurgóða kjúklingarétti í vikunni!
