Saltlakkrís bollakökur

Súkkulaði og lakkrís bollakökur

2 bollar hveiti
1 ½ bolli sykur
8 msk bökunarkakó
1 tsk salt
1 tsk matarsódi
3 egg
2 tsk vanilludropar
¾ bolli olía
1 bolli kalt vatn
100gr saxað lakkrískurl
100gr gróft saxað suðusúkkulaði
100gr gróft saxað hvítt súkkulaði

Sigtið saman hveiti, sykur, kakó, salt og matarsóda, leggið til hliðar.
Þeytið saman egg, olíu, vatn og vanilludropa þar til það verður létt í sér.
Bætið þurrefnunum rólega samanvið og skafið vel niður á milli.
Bætið lakkrískurli ásamt dökku og hvítu súkkulaði við í lokin og blandið útí (deigið verður vel þykkt og „chunky“)
Skiptið niður í um 20 bollakökuform og bakið við 180 gráður í um 20 mínútur.

Saltlakkrís frosting

5 stórar eggjahvítur

1 bolli sykur

¼ tsk Cream of tartar

Örlítið salt (fínt)

1 msk saltað lakkríssýróp (má nota meira ef þið viljið sterkara bragð)

Setjið allt nema lakkríssýrópið í skál og hrærið saman með písk. Sjóðið vatn í potti (rúmlega botnfylli) þar sem skálin getur hvílt á og pískið blönduna yfir hitanum þar til sykurinn er allur uppleystur. Getið tekið smá af blöndunni og nuddað milli tveggja fingra og þegar engar sykuragnir finnast er blandan tilbúin (um 4 mín).

Færið þá skálina yfir í hrærivélastandinn/gerið handþeytara tilbúinn og þeytið á „low speed“ í 4 mínútur, því næst á „medium speed“ í 7 mínútur og undir lokin á „high speed“ í um 2 mínútur. Að lokum er sýrópið sett útí stífa blönduna og hrært á „low speed“ þar til allt er orðið ljósbrúnt á litinn. Varist að ofvinna þetta krem því þá fellur það frekar.

Sprautið kreminu á bollakökurnar og skreytið að vild. Best er að geyma kökur með þessu kremi í kæli því þá fellur það síður.

Hugmyndin af þessum lakkrísbollakökum kviknaði þegar ég heyrði af bollakökum með smjörkremi frá henni Elsu sem eitt sinn kom á námskeið til mín. Hún hafði sett sýrópið í smjörkrem og á súkkulaðibollakökur svo það er greinilega hægt að leika sér með þetta hráefni að vild.

Lakkríssýrópið er frá LAKRIDS by Johan Bulow og keypti ég það í Epal.