Fylltur ananas

Þegar við vorum í Tælandi í vetur veit ég ekki hversu oft ég pantaði mér „Pineapple fried rice“ með rækjum eða öðru gúmelaði!

Ég hef hugsað um að prófa útfærslu af þessu síðan ég kom heim og núna loksins kom ég mér í þetta!

Þetta er svo dásamlega góður réttur og ekki skemmir fyrir hvað hann er hollur og sumarlegur líka, nammi namm!

Fylltur ananas með rækjum

2 x heill ananas
250 g brún hrísgrjón (óelduð)
500 g risarækja/tígrisrækja
½ lime (safinn)
Ólífuolía
5 x vorlaukur
½ – 1 ferskt chili (eftir smekk)
3 x hvítlauksgeiri
Salt, pipar, karrý og paprikuduft
2 msk Kikkoman soyasósa
2 msk Kikkoman Teriyaki bbq sósa
Ferskt kóríander
Til hamingju ristaðar kasjúhnetur

Byrjið á því að sjóða grjónin og kæla þau, þetta má gera daginn áður eða jafnvel fyrr. Það er auðveldara að eiga við köld grjón þegar útbúa á þennan rétt.
Þá er að helminga ananasinn, skera innan úr honum og útbúa nokkurs konar skál fyrir grjónin. Skera má ananasinn sem kemur innan úr í litla bita og geyma þar til síðar.
Blandið soyasósu og Teriyaki bbq sósu saman í skál og geymið.
Steikið risarækjuna upp úr ólífuolíu, karrý, salti, pipar og paprikudufti í um 3 mínútur eða þar til hún verður bleik á litinn, kreistið limesafa yfir og setjið á disk þar til síðar.
Saxið vorlauk, chili og hvítlauk og steikið í um eina mínútu upp úr kryddunum og bætið við olíu.
Bætið þá ananasbitunum og hrísgrjónunum á pönnuna, kryddið til og bætið olíu við eftir þörfum, hrærið vel saman og blandið sósunni saman við allt saman.
Að lokum hrærið þið risarækjunni saman við, fyllið 4 x ananashelming af dásamlegri hrísgrjóna- og rækjublöndu og stráið ristuðum kasjúhnetum og fersku kóríander yfir.

Best er að hafa ananasinn aðeins þroskaðann, finnið það með því að kreista hann aðeins og ef hann er grjótharður er hann óþroskaður og ekki eins góðu, hann þarf að gefa aðeins eftir, þá verður hann svo sætur og góður.