Lambalæri með rauðvíns-sveppasósu og hasselback kartöflum

Ég hef lengi ætlað að prófa að útbúa hasselback kartöflur og lét loksins verða af því. Tinna og Gunnsteinn gáfu okkur ótrúlega sniðugt lítið trébretti fyrir nokkrum árum (já, tíminn líður allt of hratt) sem er sérhannað til að skera ekki niður úr kartöflunni og auðveldaði það verkið til muna.

Rauðvínssósan var dásamleg með Gran Coronas rauðvíninu frá Torres og þessi samsetning af máltíð fær hina bestu einkunn.

Lambalæri með rauðvínssósu og hasselback kartöflum

Fyrir 4-6 manns

Læri

1 stk læri (um 2,5 kg)
Bezt á lambið kryddblanda

Leyfið kjötinu að ná stofuhita og kryddið vel.
Pakkið inn í álpappír og grillið um 45 mínútur og takið þá úr álpappírnum.
Grillið lærið þá stutta stund bert á grillinu til þess að fá góða grillhúð á það og leyfið síðan að standa í um 15 mínútur áður en þið skerið það niður.

Rauðvíns-sveppasósa

250 g sveppir
40 g smjör
500 ml rjómi
Salt, pipar, hvítlauksduft
1 tsk kjötkraftur
1 tsk púðursykur
½ dl Gran Coronas rauðvín frá Torres

Steikið sveppina upp úr smjöri þar til þeir mýkjast, kryddið til með salti, pipar og hvítlauksdufti.
Hellið rjómanum saman við og leyfið að malla þar til sósan þykknar, bætið krafti og sykri saman við og mallið áfram.
Bætið að lokum rauðvíni saman við sósuna og berið fram með lærinu.

Hasselback kartöflur

Bökunarkartöflur (4-6 stk)
100-150 g smjör
Gróft salt, pipar
2 pressuð hvítlauksrif
Fersk steinselja

Skerið þunnar raufar í kartöflurnar án þess þó að skera alveg í gegn (skiljið smá kartöflubotn eftir sem heldur kartöflunni saman).
Bræðið smjör og setjið um 1 msk af saxaðri steinselju saman við, hvítlaukinn og saltið örlítið og piprið.
Penslið smjöri vel á hverja kartöflu og ofan í allar raufar.
Bakið í ofni við 190°C í um klukkustund eða þar til kartöflurnar mýkjast.
Gott er að pensla smjöri nokkrum sinnum á kartöflurnar meðan þær eru í ofninum og líka þegar þær eru teknar úr í lokin og þá líka strá smá steinselju yfir og grófu salti.

Salat