Franskar makkarónur

Loksins lét ég verða af því að útbúa makkarónur!

Þetta er verkefni sem ég hef miklað svo fyrir mér og hreinlega ekki lagt í þrátt fyrir að vera búin að lesa litlu sætu „makkarónubókina“ sem ég keypti mér í Seattle spjaldanna á milli. Í lok sumars ákvað ég þó að drífa í þessu einn daginn og viti menn, þetta var alls ekki svo flókið ef fyrirmælum er fylgt vel og vandlega.

Ég studdist við uppskrift og tækni frá henni Beth „vinkonu“ minni á Youtube og notaði svo uppskriftir af fyllingum úr bókinni minni.

Mæli eindregið með því að þið horfið á þetta video og prófið ykkur áfram því makkarónur eru yndislega fallegar á borði, litlar, sætar og bragðgóðar.

Hér fyrir neðan er ég búin að setja saman uppskriftina frá Beth og tvær mismunandi uppskriftir af fyllingum úr bókinni „Irresistible macaroons“. Ég setti súkkulaðifyllingu á bleiku makkarónurnar og jarðaberjafyllingu á þær súkkulaði en að sjálfsögðu má líka hafa þetta súkkulaði+súkkulaði og jarðaberja+bleikt.

Franskar makkarónur

2 bollar flórsykur
1 bolli möndlumjöl
2 eggjahvítur
¼ bolli sykur
¼ tsk Cream of Tartar
Örlítið salt

Setjið möndlur (afhýddar) í blandara/matvinnsluvél og hakkið þar til fínt mjöl (eða kaupið tilbúið möndlumjöl).
Blandið möndlumjöli og flórsykri saman í skál.
Setjið flórsykursblönduna í gegnum sigti í aðra skál og geymið.
Setjið eggjahvítur, Cream of Tartar og salt í hrærivélina og þeytið þar til byrjar að lyftast.
Bætið sykrinum útí og þeytið í um 3-5 mínútur þar til stífþeytt og topparnir halda sér, bætið matarlit útí á þessu stigi og blandið vel.
Hellið flórsykursblöndunni saman við eggjahvíturnar og vefjið saman. Hér þarf að fara sér varlega og varast að hvorki hræra of mikið né of lítið. Beth miðar við að vefja á bilinu 65-75 sinnum og þá ætti blandan að vera teygjanleg og fín.
Setjið blönduna í sprautupoka með hringlaga stút sem er um 1,5cm í þvermál (eða klippið gat á sterkan poka.
Sprautið jafna hringi/doppur á bökunarpappír sem eru um 2,5cm í þvermál og hentar vel að sprauta 4×5 kökur á plötuna. Þessi uppskrift gefur um 2 plötur = 40 stk (sem síðan verða 20 þegar búið er að setja krem á milli).
Þegar búið er að sprauta 20 kökur skal slá plötunni nokkrum sinnum í borðið til að losna við loft úr kökunum.
Látið kökurnar standa í 30 mínútur áður en þær eru bakaðar og stillið ofninn á 130 gráður (blástursofn).
Bakið í 15-20 mínútur og kælið.
Skreytið með súkkulaði (ef vill). Bræðið og setjið í poka, klippið agnarlítið gat á eitt hornið og rennið fram og tilbaka á meðan kökurnar eru enn á bökunarpappír.
Þegar súkkulaðið hefur storknað skal para saman kökur og snúa á hvolf.
Sprautið að lokum kremi á botnana. Skiljið eftir smá pláss í kantinn því þegar þið klemmið saman pör þarf smá pláss til að geta ýtt þeim saman án þess að kremið fari of langt útfyrir.
Kælið (geymist vel í kæli allt að 5 daga).

Súkkulaði makkarónur: Skiptið um ¼ bolla af flórsykri út fyrir bökunarkakó

Súkkulaðifylling

120gr suðusúkkulaði (gróft saxað)
100ml rjómi
20gr flórsykur
30gr smjör (skorið í teninga)

Setjið súkkulaðið í hrærivélarskálina.
Hitið rjóma og flórsykur að suðu.
Hellið rjómablöndunni yfir súkkulaðið og hrærið rólega þar til súkkulaðið er bráðið.
Bætið smjörinu samanvið og hrærið þar til það leysist upp.
Kælið í nokkrar klukkustundir (yfir nótt) og setjið svo á kökurnar.

Jarðaberjafylling

50gr smjör við stofuhita
150gr flórsykur
1 bolli fersk jarðaber (unnin í gegnum sigti og safinn notaður)

Þeytið smjör og flórsykur saman þar til létt og ljóst.
Skerið jarðaberin í bita og kremjið með skeið í sigti til að ná safanum úr.
Þegar þið hafið náð 3msk af jarðaberjasafa er honum hellt útí flórsykursblönduna og blandað vel.
Setjið kremið í sprautupoka og klippið gat (um 1cm) eða notið sambærilegan stút og setjið um það bil magn sem nemur einni teskeið á hverja köku (minna/meira eftir smekk).

Ég prófaði bæði að sprauta beint á bökunarpappír líkt og Beth gerir og notast við sérstaka sílíkonmottu fyrir makkarónur. Ég verð að segja að mér fannst eiginlega bara betra að nota bökunarpappírinn en auðvitað urðu þær fullkomnari í laginu á mottunni svo ég mæli bara með að vanda sig og nota pappírinn.