Gotterí og gersemar

Púðursykurmarengsinn hans pabba



Marengsterta

Ég ætlaði ekki að trúa því að þessi uppskrift væri ekki komin hingað inn fyrr en ég var búin að leita fram og til baka hér á síðunni og í uppskriftasafninu mínu í tölvunni. Ég hef gefið þessa uppskrift í blöðum og hún farið víða og finnst mér magnað að hún hafi ekki ratað hingað inn!

Þetta er ofureinföld og ótrúlega góð marengsterta sem hann pabbi minn kenndi mér að útbúa. Ætli það sé ekki sökum þess að hann er duglegri að útbúa hana en ég að þessi uppskrift hefur ekki náð lengra en uppí munn og ofan í maga undanfarin ár. Þegar ég er að undirbúa veislur fer oft allt púðrið í flóknar kökuskreytingar og þá reddar pabbi alltaf einni marengstertu á veisluborðið.

Púðursykurmarengs

Nú er hún þó komin inn fyrir ykkur að prófa. Í kvöld setti ég rjóma á milli á þessum botnum, góðan kökuhlemm yfir og inní ísskáp fram að 17.júní. Þá verður þessi elska dregin fram fyrir gesti og gangandi. Það er nóg að setja rjómann á milli sólahring áður en mér persónulega finnst hún alltaf best á öðrum eða jafnvel þriðja degi því þá er marengsinn búinn að mýkjast vel upp.

Marengs með súkkulaði

Það er því tilvalið að skella í botnana eftir vinnu á morgun og setja svo rjómann á milli eftir kvöldmat, þá eruð þið komin með dýrindis hnallþóru í tilefni dagsins þegar þjóðhátíðardagurinn sjálfur rennur upp!

Uppskrift

  • 4 eggjahvítur
  • 5 dl púðursykur
  • 600 ml rjómi
  • 100 gr suðusúkkulaði (saxað)

Aðferð

  1. Hitið ofninn 130°C
  2. Stífþeytið eggjahvítur og púðursykur.
  3. Teiknið hring (um 20cm í þvermál) á bökunarpappír og leggið pappírinn á sitthvora bökunarplötuna.
  4. Skiptið stífþeytta marengsnum á milli og jafnið út að línunni, takið svo gaffal og teiknið toppa á marengsinn.
  5. Bakið í um 60 mínútur, slökkvið á ofninum og leyfið botnunum að kólna með ofninum svo þeir falli síður.
  6. Takið um 30gr af suðusúkkulaðinu og bræðið. Hellið í lítinn poka og klippið smá gat á eitt hornið, rennið því næst fram og aftur um þann botn sem þið ætlið að hafa ofaná kökunni.
  7. Stífþeytið rjómann og blandið  restinni af söxuðu suðusúkkulaðinu varlega saman við.
  8. Smyrjið á milli botnanna og leyfið kökunni að stand í ísskáp í amk sólahring áður en hún er borin fram.

 

 

Megið endilega fylgja mér á INSTAGRAM og mér þykir gaman þegar þið merkið mig þar þegar þið prófið uppskriftir!

Tags:

2 Replies to “Púðursykurmarengsinn hans pabba”

  1. Sæl..
    Þegar þu bakar à tveimum plötum i einu.. Ertu þà að nota blàstur? Er það ekki tilfellið hér?
    Kv.Sandra

Leave a Reply

Your email address will not be published. Required fields are marked *

Fylgstu með á Instagram