Regnbogakaka

Gleðigangan er handan við hornið og efast ég ekki um að margir Íslendingar ætli að leggja leið sína í miðbæinn næsta laugardag til að taka þátt í hátíðarhöldunum! Það væri nú vel við hæfi að skella í eina regnbogaköku í tilefni dagsins og hér fyrir neðan koma leiðbeiningar um hvernig er hægt að baka eina slíka.

Harpa Karin dóttir mín hefur mikinn áhuga á bakstri og kökuskreytingum og verð ég að segja að á tímum erum við hreint að drukkna úr kökum og góðgæti því alltaf langar okkur mæðgum að prófa eitthvað nýtt. Eftir að hún horfði á Youtube myndband með Nerdy Nummies um daginn var hún staðráðin í að baka regnbogaköku en vildi svo hafa sinn háttinn á skreytingunni sjálfri.

Hér fyrir neðan tók ég saman skrefin í regnbogakökugerð eftir að hafa fylgst með litla bakarameistaranum mínum.

Innkaupalisti

2 x hvítt kökumix eða 2 x þessi uppskrift
5 x Betty Crocker hvítt vanillukrem eða þreföld smjörkremsuppskrift (sjá hér að neðan)
Matarlitir (gulur, appelsínugulur, rauður, grænn, fjólublár og blár)
2D eða 1M stjörnustútur frá Wilton
20-22cm kökuform

Smjörkrem

125gr smjör (mjúkt)
500gr flórsykur
1 egg
2 tsk vanilludropar
2 msk sýróp

Aðferð

Útbúið tvöfalt vanilludeig í hrærivélinni.
Skiptið því jafnt niður í 6 skálar og litið með matarlit (setjið vel af lit því hann dofnar við baksturinn).
Bakið botnana og kælið vel (athugið að bökunartíminn er styttri en venjulega því þetta eru þunnir botnar).
Jafnið botnana með kökuskera/tvinna/hníf svo allir verði jafn háir.
Útbúið kremið og skiptið einnig niður í 6 skálar og litið með sömu litum. Gerið aðeins meira af bleiku því gott er að þekja kökuna með þeim lit því hann er efstur.

Byrjið að raða kökunni saman, fjólublár kemur fyrst, svo blár, grænn, gulur, appelsínugulur, rauður (bleikur) og alltaf krem af sama lit ofaná hvern botn.
Þekjið kökuna svo með þunnu lagi af bleiku kremi áður en stjörnurnar eru sprautaðar á.

Sprautið óreglulega með einum lit í einu og ef þið eruð aðeins með einn stút er þannig hægt að skola hann á milli lita.
Munið að sprauta stjörnurnar þétt og með nokkuð flatan botn til að þær festist vel á hliðunum.

Ég hvet ykkur einnig til að kíkja á regnboga bollakökurnar hér á síðunni ef þið viljið frekari hugmyndir fyrir helgina og svo skelli ég eflaust inn fleiri litríkum færslum fyrir helgi 🙂