Hér er á ferðinni hið sívinsæla döðlugott með smá útfærslu. Uppskriftina fann ég á Gulur Rauður Grænn og Salt en þar er að finna fjölmargar girnilegar uppskriftir (reyndar breytti ég einhverjum innihaldsefnum). Ég hef gert svipaða uppskrift áður og getið þið fundið það lakkrísgott hér á síðunni. Þessi er örlítið léttari í sér en engu að síður dásamlega góð. Það er sniðugt að skera gottið í litla bita og eiga í frystinum þegar góða gesti ber að garði. Þá er hægt að sækja nokkra mola og njóta þegar hentar.
Döðlugott uppskrift
- 500 gr döðlur (smátt saxaðar eða settar í matvinnsluvél)
- 200 gr smjör
- 80 gr púðursykur
- 100 gr sýróp
- 3 stk Yankee súkkulaðistykki (skorin í bita)
- 140 gr Rice Krispies
- 2 pokar lakkrískurl
- 350 gr suðusúkkulaði
- Setjið döðlur, smjör, púðursykur, sýróp og Yankee í pott og hitið við miðlungshita. Hrærið vel í allan tímann og takið af hellunni þegar allt er orðið mjúkt og bráðið (um 10 mín).
- Hellið lakkrískurli og Rice Krispies saman við og hrærið vel.
- Setjið bökunarpappír í botn&hliðar á formi (um 20x30cm) og þjappið blöndunni vel þar í.
- Frystið í um 15 mínútur.
- Því næst er bræddu suðusúkkulaðinu hellt yfir og dreift jafnt út og fryst aftur í um 20-30 mínútur áður en skorið er í bita.
