Þessa dásamlegu skyrköku hef ég útbúið ansi oft í gegnum tíðina eða allt frá því að Heiða mágkona mín kom með hana fyrst á neðri hæðina í Hamravíkinni á sínum tíma.
Hún er einföld, fljótlega og sjúklega góð!
Hægt er að setja hana í eina stóra skál eða nokkrar minni. Hér er hún í fallegri IVV glerkrús með loki frá Húsgagnahöllinni. Það er frábært að nota slíka krukku þar sem hægt er að skella lokinu á áður en hún fer í kæli og þannig geymist hún mun betur.
Ég á nokkrar svona glerkrúsir og þær gegna mismunandi hlutverkum. Dags daglega geyma þær pasta eða aðrar þurrvörur á eyjunni í eldhúsinu, í afmælum bregða þær sér í nammibarshlutverkið og síðan er æðislegt að setja í þær skyrkökur, ostakökur sem ekki þarf að baka, súkkulaðimús eða annað gotterí sem geyma þarf í kæli og gott er að geta sett lok á.
Hægt er að versla þessa fallegu krús með því að smella á myndina hér fyrir neðan.
Skyrkaka Heiðu
Innihald
- 1 pk LU bastogne kex
- 50 g smjör
- 500 g KEA bláberja- og jarðaberjaskyr
- 500 ml rjómi
- 70 g saxað suðusúkkulaði
- Bláber og jarðaber (um 125 g af hvoru)
Aðferð
- Myljið kexið niður (í poka með kökukefli eða í matvinnsluvél) og bræðið smjörið á pönnu og blandið smjörinu saman við kexmylsnuna.
- Leggið mulið kexið í botninn á krúsinni, ýtið aðeins upp á kantana og leyfið að kólna alveg.
- Þeytið rjómann og bætið skyrinu svo varlega útí með sleif þar til vel blandað.
- Setjið skyr- og rjómablönduna ofan á kexið.
- Stráið söxuðu suðusúkkulaði yfir skyrblönduna og að lokum berjunum.
- Kælið í um 1-2 klukkustundir áður en borið er fram, jafnvel yfir nótt.
Megið endilega fylgja Gotterí á INSTAGRAM
