Það elska allir sem ég þekki heita brauðrétti!
Ég hef útbúið þá nokkra í gegnum tíðina og einhvern veginn gerir maður alltaf sömu réttina. Nú ætla ég hins vegar í átak að prófa nýja brauðrétti og þessi hér er algjört dúndur!
Fyrir sósuna sem hellt er yfir réttinn notaði ég púrrulaukssúpu frá TORO og allir sem réttinn smökkuðu voru á einu máli um að hann væri frábærlega góður og því er um að gera að hugsa út fyrir kassann í brauðréttagerð!
Heitur púrrulauksbrauðréttur uppskrift
- ½ fransbrauð
- 1 lítill brokkolihaus
- 1 stk. paprika
- ½ púrrulaukur
- 1 pk. TORO púrrulaukssúpa
- 500 ml rjómi
- 300 ml vatn
- 200 g skinka
- 1 stk. brie ostur
- Rifinn ostur
- Smjör og olía
- Salt, pipar og hvítlauksduft
- Smyrjið eldfast mót vel með smjöri og skerið skorpuna af brauðinu.
- Þekið botninn vel með brauði og geymið restina af sneiðunum þar til síðar.
- Skerið brokkoli í munnstóra bita og saxið papriku og púrrulauk. Steikið brokkoli í olíu og kryddið til með salti, pipar og hvítlauksdufti. Þegar það byrjar að brúnast má setja eins og 5 msk af vatni á pönnuna og leyfa því að gufa upp (þannig mýkist kálið).
- Bætið þá lauk og papriku saman við ásamt meiri olíu og kryddið til.
- Dreifið grænmetisblöndunni yfir brauðið í botninum og útbúið sósuna á meðan á pönnunni.
- Hrærið púrrulauksduftinu saman við rjómann og vatnið og hrærið vel þar til þykkist, takið þá af hellunni.
- Skerið brie ostinn í litla bita ásamt skinkunni. Dreifið því óreglulega yfir grænmetið ásamt restinni af brauðinu (rífið það niður).
- Því næst má hella sósunni yfir allt saman og rífa vel af osti yfir.
- Bakið síðan við 180°C í um 30 mínútur eða þar til osturinn fer að gyllast.
Megið endilega fylgja Gotterí á INSTAGRAM
