Marengs stendur alltaf fyrir sínu og hér kemur ein guðdómleg uppskrift sem hentar fyrir hvaða tækifæri sem er!
Marengshringur með jarðaberjarjóma og Marssósu
Marengs
- 6 eggjahvítur við stofuhita
- 290 g sykur
- 3 tsk. kartöflumjöl
- 3 tsk. hvítvínsedik
- Fræ úr einni vanillustöng
- Hitið ofninn 110°C.
- Teiknið hring um 30 cm í þvermál á bökunarpappír og annan minni inn í (um 20 cm) til að hafa línur til viðmiðunar þegar sprauta á marengsinn.
- Þeytið eggjahvíturnar þar til þær verða froðukenndar.
- Bætið sykrinum saman við í nokkrum skömmtum og hrærið vel á milli, þeytið síðan þar til stífþeytt.
- Blandið kartöflumjöli, ediki og vanillustöng saman í litla skál og setjið saman við marengsblönduna og hrærið stutta stund til viðbótar.
- Setjið í stóran sprautupoka/zip-lock poka með um 2 cm gati á endanum.
- Sprautið í vel bústnar litlar pavlovur allan hringinn, ættuð að ná um 10 slíkum sem mynda nokkurs konar krans.
- Holið hverja aðeins í miðjunni með bakhliðinni á skeið til að gera pláss fyrir fyllingu síðar.
- Bakið í eina klukkustund og 10 mínútur og slökkvið þá á ofninum og leyfið marengsnum að kólna í ofninum (ég geri þetta oft kvöldinu áður og geymi í ofninum yfir nótt).
Marssósa
- 3 stk. Mars súkkulaðistykki
- 5 msk. rjómi
- Sett saman í pott og hitað á meðalháum hita þar til vel bráðið, hrærið vel í allan tímann.
- Takið af hellunni og leyfið hitanum að rjúka úr.
Fylling, skraut og samsetning
- 400 ml þeyttur rjómi
- 250 g jarðaber (stöppuð með gaffli)
- 2 Mars súkkulaðistykki (skorin í bita)
- Hindber, rifsber, granatepli eða önnur ber/ávextir sem þið kjósið
- Þeytið rjómann og vefjið stöppuðum jarðaberjum saman við.
- Setjið um 1 msk. af Marssósu ofan í hvern marengs/pavlovu.
- Sprautið þá næst vel af jarðaberjarjóma ofan á hvern botn.
- Dreifið óreglulega úr Marssósu yfir rjómann aftur og setjið Marsbita, hindber, rifsber og granatepli ofan á hverja pavlovu.
- Geymið í kæli þar til njóta á dásemdarinnar.
Hugmyndina af þessari útfærslu af marengshring sá ég á síðunni hjá Mörthu Stewart og fannst sniðugt að raða svona litlum pavlovum í hring sem mynda krans, þá er auðvelt að skera eina og eina köku frá hringnum.
Megið endilega fylgja Gotterí líka á INSTAGRAM
